00:00:00 IGIHE NETWORK KN KINYARWANDA EN ENGLISH FR FRANCAIS

Kubera iruka rya Nyiragongo, ingendo z’indege mu bice bimwe na bimwe bya Congo zahagaritswe

Yanditswe na Muhonzire Sylvine
Kuya 25 Gicurasi 2021 saa 09:45
Yasuwe :
0 0

Sosiyete y’ubwikorezi bwo mu kirere muri Repubulika Iharanira Demokarasi ya Congo, Congo Airways, yasubitse ingendo zijya mu duce twa Goma, Bunia na Isiro kubera iruka ry’ikirunga cya Nyiragongo giheruka kuruka bitunguranye tariki 22 Gicurasi 2021.

Izi ngendo zizakomeza guhagarikwa kugeza igihe hazasohoka amabwiriza mashya, bigendanye n’amakuru y’ikirunga nyuma yuko kirutse.

Iri subikwa ry’izi ngendo rije nyuma y’uko ku munsi w’ejo tariki 24 Gicurasi, Minisitiri ushinzwe ingendo n’itumanaho muri Congo, Chérubin Okende Senga, ategetse ko ikibuga cy’indege cya Goma gikomeza gufungwa ariko icya Kavumu giherereye i Bukavu kigafungurwa.

Abagenzi bava i Goma [Umurwa Mukuru w’intara ya Kivu y’Amajyaruguru] bajya mu mijyi ya Kinshasa, Lubumbashi, Kindu, Kalemie, Mbuji-Mayi na Kananga bazajya baca ku kibuga cy’indege cya Kavumu kiri Bukavu kuko cyo kiri gukoreshwa.

Bukavu na Goma ni imijyi yegeranye cyane ndetse urugendo rw’indege ruhuza uduce twombi rufata iminota 15 gusa.

Izi mpinduka zose zatewe n’iruka ry’ikirunga cya Nyiragongo cyarutse gitunguranye nyuma y’imyaka 19, ndetse kikaba kikiri gukurikiranwa kugira ngo kitangiza ubuzima bw’abantu.

Impamvu ingendo z’indege zihagarikwa iyo ikirunga cyarutse ni uko imyotsi igiturukamo iba igizwe n’uturahura duto tutagarara, ishobora kwangiza ibice bitandukanye by’indege igakora impanuka, cyangwa se igahuma ikirahure cy’aho umupilote arebera bityo ntabone aho ajya.

Kuva mu 1935 kugeza mu 2008, Ikigo Mpuzamahanga kigenga iby’indege za gisivili, ICAO, cyatangaje ingendo z’indege 83 zahuye n’imyotsi y’ikirunga ubwo zari mu nzira. Indege umunani muri zo, moteri zazo zarangiritse.

Iyamenyekanye cyane ni indege ya British Airways 747 yakoze urugendo mu 1982 inyura mu kirere kirimo imyotsi y’ikirunga cyarutse cyo muri Indonesia cyitwa Galunggung, moteri zayo enye zirangirika, gusa ku bw’amahirwe umupilote Eric Moody yakoze ibishoboka ageza indege aho yari igiye amahoro.

Indege ya Congo Airways yahagaritse ingendo zijya i Goma, Bunia na Isiro kubera iruka ry'ikirunga cya Nyiragongo / Ifoto: 7sur7

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .