Kwamamaza

Kuba hari ibigo by’ubucuruzi bifunga imiryango ntabwo ari ikibazo- Gatare

Yanditswe kuya 7-11-2016 saa 15:34' na Rabbi Malo Umucunguzi


Umuyobozi w’Ikigo cy’Igihugu cy’Iterambere, RDB, Francis Gatare, yagaragaje ko kuba hari ibigo by’ubucuruzi bifunga imiryango atari bibi, mu gihe abatangije ibyo bikorwa baba bamaze kubona ko bitazatanga inyungu yari itegerejwemo.

Raporo igaragaza uko ibihugu byorohereza abantu gukora ubucuruzi yerekana k0 u Rwanda ruza ku mwanya wa Kabiri muri Afurika n’uwa 56 ku Isi n’amanota 69.81, nyuma y’amavugurura menshi yagiye akorwa, kwandikisha ubucuruzi mu Rwanda bikaba bitarenga amasaha atandatu.

Gatare avuga ko nubwo hari ibigo byinshi byandikwa ariko nyuma bigafunga imiryango, biterwa n’uko ba nyirabyo baba bamaze kubona ko nta nyungu bibazanira.

Mu kiganiro yagiranye n’abanyamakuru kuri uyu wa Mbere kuri raporo ya “Doing Business” ya 2017 yakozwe na Banki y’isi, Francis Gatare yavuze ko gufunga ibi bigo bidakwiye gufatwa nk’aho ari bibi.

Ati “Ntabwo ari ikibazo gufunga business. Mu by’ukuri gufunga business ni byiza kuko dukangurira abashoramari n’abikorera gutangiza ubucuruzi kugira ngo barebe amahirwe arimo ariko ntabwo ari buri bucuruzi bwose bwatangiye bukura ngo bwunguke buzabe bunini.’’

Gatare yavuze ko nubwo aba ari igitekerezo umuntu yashyize mu bikorwa agashoramo amafaranga atari ko buri gihe icyo washyize ku isoko kikungukira nk’uko wabishakaga.

Ati “Icyiza ni iyo umushoramari ashoboye kumenya hakiri kare ko ubushabitsi bwe umurongo yafashe atari mwiza, akabufunga agahindura uwundi murongo, agatangira ikindi gishya. Kuko imibare igaragaza ko nibura 60% by’ubushabitsi buciriritse butangiye, ubwinshi ku Isi bufunga mbere y’uko bwuzuza imyaka itatu kubera ko baba babonye ko bakeneye guhindura ho gato bakajya mu bundi.”

Abanyamahanga bakomeje kongera ishoramari mu Rwanda

Gatare yavuze ko mu mishinga minini iri mu Rwanda, kubera amafaranga aba asabwa gushorwamo, bisaba ko habaho ubufatanye bw’abikorera bo mu Rwanda n’abo hanze, rimwe na rimwe imishinga ikiharirwa n’abikorera baturutse hanze bitewe n’uko umushinga ungana n’igisabwa.

Ati “Ntabwo bikwiye kumvikana ko abashoramari batururutse hanze bitabwaho cyane kurusha Abanyarwanda, iyo urebye aya mavugurura akorwa agamije gufasha abikorera baciriritse, kuko iyo gutangiza ubucuruzi bihenze, nibo bigiraho ingaruka cyane kurusha na babandi bakomeye baturutse hanze cyangwa bo mu gihugu.’’

“Ishoramari mu gihugu cyacu rikomeje gutera imbere. Amafaranga aturuka hanze akomeje kwiyongera. Umwaka ushize twari twarihaye intego ya miliyari $1.2, twarayarengeje iyo urebye amafaranga y’abashoramari muri rusange yagiye mu bukungu bwacu, arenga 65% yaturukaga mu bashoramari baturutse hanze. Uyu mwaka twihaye intego yo kugeza kuri miliyari $1.3.”

Yavuze ko harebwe umuvuduko ishoramari riri kugenderaho bizeye ko naryo rizagerwaho, gusa ngo hategerejwe kureba uko mu mpera z’umwaka bizaba byifashe, byose bishingiye ku mavugururwa akomeza gukorwa agamije kurushaho korohereza abashoramari.

Kuva kuri raporo ya ‘Doing Business 2005’ kugeza kuya 2017, u Rwanda rumaze gukora amavugurura 47 ku nzego zitandukanye.

Muri raporo ya 2017, ibihugu 14 nibyo bitateye intambwe mu bijyanye no kwandikisha ubucuruzi, aho nko muri Venezuela bisaba iminsi 230 ngo umuntu abe yatangiye ubucuruzi, mu gihe impuzandengo ku Isi hose ari iminsi 21.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved