Kwamamaza

Bwa mbere Abanyarwanda bagiye guhatanira miliyoni y’amadolari

Yanditswe kuya 7-10-2016 saa 13:07' na IGIHE


Itsinda ry’abanyeshuri bo muri Kaminuza y’u Rwanda rigiye kwitabira amarushanwa yo ku rwego rw’Isi azwi nka Hult Prize, agamije gushakira ibisubizo bimwe mu bibazo byugarije Isi.

Amarushanwa ya Hult Prize yibanda ku bibazo isi ifite birimo inzara, ubukene, amashanyarazi adahagije n’ubuzima,hashakwa ibisubizo byo gukemura ibyo bibazo mu baturage bo mu byaro binyuze mu buryo bw’ubucuruzi.

Igihembo gitangwa ku bufatanye bw’ishuri ry’ubucuruzi rya Hult International n’umuryango w’uwahoze ari Perezida wa Leta Zunze Ubumwe za Amerika, Bill Clinton, witwa Clinton Global Initiative (CGI).

Bill Clinton atoranya ingingo yo guhatanaho akayimenyesha abazitabira amarushanwa muri Nzeri buri mwaka. Insanganyamatsiko y’uyu mwaka iragira iti ‘Gukangura ubushobozi bwa muntu’, ikaba yibanda ku mpunzi.

Abatsinze bahabwa miliyoni imwe y’amadolari nk’intangiriro y’ubucuruzi bakagenerwa n’ubujyanama mu bigo mpuzamahanga by’ubucuruzi.

Ni ku nshuro ya mbere u Rwanda ruhagarariwe mu marushanwa y’abanyeshuri yo ku rwego nk’uru agamije guteza imbere ibitekerezo by’ubucuruzi buzamura rubanda binyuze mu gukemura ibibazo bikomeye bibugarije.

Umuhuzabikorwa w’aya marushanwa muri Kaminuza y’u Rwanda, Elie Mandela, yatangarije The New Times ko abanyeshuri barimo gukorera mu matsinda nyuma abazarusha abandi bakazatoranywa bakajya guhatanira kiriya gihembo.

Yagize ati “Bamwe bari mu myiteguro, abandi barimo gutegura ibitekerezo by’ubucuruzi. Ku rundi ruhande abanyeshuri basabwe gushyira umutima ku bitekerezo byabo.”

Mandela avuga ko uretse kwitabira amarushanwa, bifuza ibitekerezo byose barimo guhuza bizashyirwa mu bikorwa mu Rwanda.

Kwiyandikisha birakomeje kugeza kuwa 5 Ugushyingo, ijonjora ry’ibanze rikaba ryitezwe mu Ugushyingo hagati. Muri iri jonjora, amatsinda icumi ya mbere yo muri Kaminuza y’u Rwanda bazahatana ku rwego rw’igihugu mu Ukuboza.

Abazatsinda kuri uru rwego bazahita bitabira icyiciro cya nyuma cyo ku rwego rw’akarere giteganyijwe kubera mu mujyi umwe hagati ya Boston, San Francisco, London, Shanghai cyangwa Dubai murWi erurwe umwaka utaha.

Abazaba aba mbere muri iki cyiciro bazahatana mu cyiciro cya nyuma kizaba muri Nzeri 2017.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved