Ku myaka 11 yatangiye kumenya kuvuga

Yanditswe na Kanamugire Emmanuel
Kuya 25 Ugushyingo 2016 saa 03:28
Yasuwe :
0 0

Sibomana Charles ni umwana w’imyaka 11 uri gutangira kwiga kuvuga mu gihe abo mu muryango we barimo na mama we batekerezaga ko afite ubumuga bwo kutavuga kubera igihe cyose yari amaze nta jambo na rimwe abasha gusohora.

Sibomana yavutse ari umwana wa cyenda wa Muhorakeye, wagize ibyago byo gupfusha umugabo we nyuma y’amezi umunani uyu mwana we avutse.

Nk’uko Muhorakeye abisobanura, nyuma y’urupfu rw’umugabo we nibwo yaje kubona ko Sibomana atandukanye n’abandi bana bavukana atangira gutekereza ko afite ikibazo cy’imikorere y’ubwonko dore ko atanavugaga.

Ati” Abantu benshi bamufataga bitandukanye. Benshi bamwakiraga uko ari, abandi bagatekereza ko ntacyo amaze ndetse bakamuhimba amazina. Abantu bavuga ibyo bashaka.”

Kuva uyu mwana yajyanwa mu ishuri ribanza rya Gahanga ariko yahise atangira kuvuga kuko yahuye n’umwalimu wahuguwe muri gahunda n’Umuryango w’Abakorerabushake (Volunteer Service Overseas, VSO) mu rwego rwo gufasha abafite ubumuga kurushaho kwisanga mu muryango.

Muhorakeye avuga ko afite imyaka umunani aribwo yashashe umwanzuro wo kumujyana mu ishuri bwa mbere, icyo gihe akaba nta jambo na rimwe yashoboraga kuvuga. Yahise ashyirwa mu ishuri ry’inshuke ariko iyo mwalimu yasohokaga ibintu bikaba byarabaga bibi kuko atakundaga umuntu umubwira nabi.

Atangiye umwaka wa mbere yajyanywe mu ishuri ribanza rya Gahanga, ari naho yatangiye kwigishirizwa na Esperance Niyomufasha wari warahawe amahugurwa na VSO ku bijyanye no gufasha abana bafite ubumuga mu ishuri.

Niyomufasha ati ”Mbere yo guhabwa amahugurwa byari bigoye kubasha kumushyira ku murongo umwe n’abandi mu ishuri. Rimwe wasangaga yabitaruye. Nize uburyo natuma yiyumva mu bandi binyuze mu gutegura amasomo yihariye n’imyitozo byo kumuha ndetse nkashishikariza abandi bana kumufasha.”

Yakomeje avuga ko mu bigaragara yatangiye kwiyumva muri bagenzi be ku buryo ubona ko hari intambwe ikomeye agenda atera.

Ati” Iyo abandi bari kwandika, nawe uba ubona agenda amenya ibintu bike ndetse akiga kuvuga amwe mu magambo. Ashobora kutabikora neza ku rugero rumwe n’abandi ariko abikora mu buryo bwe.

Mu ishuri yigamo, bagenzi ba Sibomana ubona bamufasha uko bishoboka ku buryo n’iyo mwalimu abajije agasubiza neza bose bamukomera amashyi, ibi bikaba bituruka ku myitwarire ya mwalimu wabo.

Hakizimana w’imyaka 10 avuga ko babizi ko mugenzi wabo akwiye gufashwa uko bishoboka kandi ko iyo adafite ibikoresho adatindiganya kumutiza ibye.

Umuryango ukeneye ubufasha ngo abashe kuvuzwa

Muhorakeye avuga ko nubwo umuhungu we atangiye kumenya kuvuga atigeze abasha kumuvuza ngo amenye ikibazo afite kuko yamujyanye ku kigo nderabuzima ntibikunde ko yoherezwa ku bitaro bikuru.

Avuga ko ariko yizeye ko azabona ubufasha akabasha kumujyana kwa muganga kugira ngo barebe niba yarushaho kumererwa neza.

Ku itariki ya 3 Ugushyingo, hizihizwa umunsi mpuzamahanga w’abafite ubumuga, mu 2016 uyu munsi wahuriranye n’uko umuryango VSO wizihiza imyaka 10 utanga ubufasha mu Rwanda.

Sibomana Charles (uri kumwe na nyina) atangiye kumenya kuvuga ku myaka 11

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza