Kwamamaza

Komora ibikomere by’amateka mabi birasaba ubufatanye- Ndayisaba

Yanditswe kuya 10-11-2016 saa 16:02' na Rabbi Malo Umucunguzi


Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge, Fidèle Ndayisaba, yavuze ko komora ibikomere by’Abanyarwanda atari ikintu cyakorwa umunsi umwe, kandi hakenewe gukoreshwa n’uburyo bushoboka mu kubaka amahoro arambye.

Yabigarutseho mu gihe impuguke zisaga 100 zaturutse mu bihugu birimo u Rwanda, Uganda, Kenya, Chypre, Repubulika ya Centrafrique, Sudani y’Epfo, u Bubiligi, Leta Zunze Ubumwe za Amerika n’u Budage, zakoraniye i Kigali mu nama y’iminsi ibiri yiga ku isanamitima n’uko barushaho gukorana.

Ndayisaba yavuze ko nyuma y’ingaruka za Jenoside yakorewe Abatutsi mu 1994, ibihugu bigomba kutihanganira ingengabitekerezo yayo haba hitwajwe ubwisanzure muri politiki cyangwa kuvuga icyo umuntu atekereza, ahubwo uwo ari we wese wabangamira ubumwe bw’umuryango akabihanirwa.

Ati “Hagomba gukomeza umuhate mu kuvura ibikomere, kandi mu kuvura ibikomere ntabwo ari ibintu bikorwa no kwa muganga bisanzwe, ntabwo ari ibintu bikorwa n’umuntu runaka w’impuguke gusa, ahubwo bisaba ubufatanye”

“Bisaba ko Abanyarwanda dufatanya komorana, tukakirana [bibanzirizwa no kwiyakira] kandi abaturanyi, ababana mu muryango bakumva neza ingorane ufite ibikomere yasigiwe n’amateka yacu cyane cyane ingaruka za jenoside yakorewe abatutsi, bakumva ububabare aba afite igihe ababazwa nibyo bikomere, ntibamutererane ahubwo bakamuba bugufi.’’

“Ibipimo bigaragaza ko Abanyarwanda biyunze kugera kuri 92.5%, aho mu mibanire myiza hagati y’Abanyarwanda ho bigeze kuri 96%. Gusa ibyo ntibibuza ko hari imbogamizi zigihari nubwo ubufatanye bw’Abanyarwanda butanga umusaruro, kuko mu mbogamizi ku bumwe n’ubwiyunge, ibikomere bya Jenosede bifitemo 4.6%, mu gihe mu 2010 byari bifitemo 11.5%.

Mu bushakashatsi bwakozwe na Dr Munyandamutsa mu 2012, mu muryango Nyarwanda muri rusange, abagera kuri 26.1% bari bagifite ingaruka z’ibyo banyuzemo muri Jenoside.

Umuyobozi ushinzwe ibikorwa bya Never Again Rwanda, Eric Mahoro, yagaragaje ko mu bihugu byahuye n’ibibazo bikomeye, ubwiyunge buba bugomba kujyana n’isanamitima, kuko ubwiyunge bureba ku mibanire myiza y’abantu, ariko bikarenga guturana badatongana bakagera no ku cyiciro cyo gukira ibikomere byayikomotseho.

Umuyobozi w’Umuryango Interpeace muri Afurika yo Hagati n’Iburasirazuba, wagize uruhare mu gutegura iyi nama, Jean Paul Mugiraneza, yagaragaje ko abagifite ibikomere baba bakeneye umwanya wo kwitabwaho ngo bagire intambwe batera, kuko abenshi bitaborohera kwirekura ngo bavuge icyo batekereza.

Ati “Burya ushobora kubaka umuhanda, ushobora kubaka ikiraro, ugasana inzu yasenyutse, ariko gusana umuntu birakomeye, ni inziraikomeye. Ugomba gushyiraho uburyo butuma agufungurira umutima we, aguhishurire icyumba kirimo ububabare bwe. Ibyo bisaba igihe, bigasaba gukorera hamwe no kwigira ku bandi bakize ibyo bikomere,’’

Ibarura ryo mu 2005 ryagaragaje ko icyo gihe umwana umwe muri bane yari impfubyi ku mubyeyi umwe, mu gihe inyigo ya Dr Naason Munyandamutsa yagaragaje ko hafi 80% by’Abanyarwanda bahuye n’igikorwa kibahungabanya.

Bamwe mu bitabiriye inama ku isanamitima
Ambasaderi wa Suède mu Rwanda, Jenny Ohlsson
Abari mu nama bungurana ibitekerezo
Umunyamabanga Nshingwabikorwa wa Komisiyo y'Igihugu y'Ubumwe n'Ubwiyunge, Fidèle Ndayisaba
Iyi nama yitabiriwe n'abahanga mu isanamitima baturutse mu bihugu bitandukanye
Iyi nama y'iminsi ibiri yitabiriwe n'abagera ku 120
Fidèle Ndayisaba, yavuze ko komora ibikomere by’Abanyarwanda atari ikintu cyakorwa umunsi umwe
Umuyobozi w'Icyubahiro wa Never Again Rwanda, Dr Butera Mushi Jean Bosco

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved