Kirehe: Rurageretse hagati y’abaturage n’abakozi ba EUCL babaciriye Cash Power

Yanditswe na Uwishyaka Jean Louis
Kuya 28 Nzeri 2016 saa 01:43
Yasuwe :
0 0

Abaturage 32 bo mu Kagali ka Muhamba,umurenge wa Gahara, akarere ka Kirehe, barasaba ubuyobozi kubarenganura nyuma y’uko abakozi b’Ikigo gishinzwe gukwirakwiza amashanyarazi EUCL muri ako karere, baje bagatwara cash power 25 ku nzu z’abaturage bavuga ko bahawe amashanyarazi mu buryo butemewe n’amategeko, nyamara ngo bijya gukorwa byarakorewe mu biro by’icyo Kigo.

Tariki ya 22 Nzeri 2016 mu masaha ya mbere ya saa sita ni bwo abaturage ngo bagiye kubona babona abakozi ba EUCL, ishami ry’Akarere ka Kirehe bayobowe na Rushingabigwi Clement bageze mu ngo zabo mu kagali ka Muhamba bagenda bakata Cash Power ku nzu zabo bakazijyana, ibintu abaturage bita akarengane.

Karebu Ngezahimana uhagarariye ingo 32 zishyize hamwe zikururira umuriro w’amashanyarazi zibifashijwemo n’abakozi bakoreraga mu biro bya EUCL muri Kirehe, yatangaje ko babwiwe n’iki kigo ko abakozi babahaye uwo muriro ngo atari ababo ahubwo ko babiyitiriye, mu gihe barakoreraga mu biro byayo.

Ati”Tariki ya 15 Mata 2016 twagiye ku Kigo cya EUCL tubabaza uburyo twabona amashanyarazi mu kagali kacu, batubwiye ko bazaza gupima bakadufasha.Ku itariki ya 20 Mata, Ntiganzwa Alex twari tuzi ko ari umukozi wa EUCL, yaje azanye n’undi mukozi badukorera umuyoboro bazana n’urutsinga, amashanyarazi araboneka."

Yakomeje agira ati "Amashanyarazi amaze kuboneka, abo bakozi ba EUCL badusabye ko buri muturage yishyura cash power kuri konti ya EUCL BK/KIREHE 00067117-23, twatangiye kwishyura ariko n’abafite make na bo barabemereraga bakajya bishyura buhoro buhoro. Ni ibintu byadutwaye amafanga arenga miliyoni esheshatu kandi hari n’ibyo ntabariyemo, kuza rero bakabikata bakabijyana kandi atari twe twakoze amakosa ni ikibazo."

Gusa ngo byageze aho abo baturage bakajya basabwa n’abo bakozi kohereza ayo mafaranga bakoresheje telefoni (Mobile money) aho kuyacisha kuri konti ya EUCL nkuko byari bisanzwe bikorwa.

Umuyobozi w’Umurenge wa Gahara, Ntambara John, na we yatangaje ko ibyo byabaye ndetse bakaba bari gushaka ukuntu abaturage batabirenganiramo kuko ikibazo cyabereye mu buyobozi bwa EUCL.

Ati” Twavuganye n’umukozi uhagarariye EUCL muri Kirehe atubwira ko ibyo byakozwe n’abakozi b’ikompanyi bakoranaga yitwa Intercom ndetse bakaba bamaze gutanga ikirego muri polisi kugira ngo abo babikoze mu izina rya EUCL bahanwe kuko mu masezerano bari bafitanye gukora imiyoboro y’amashanyarazi bitarimo.”

Yongeyeho ati” Twibajije impamvu bihutiye kuza gukuraho cash power nyamara ikibazo bagifitanye n’abo bakoranaga babiyitiriye biratuyobera. Iyo urebye usanga umuturage we atari kumenya umukozi n’utari umukozi wa EUCL kandi byarakorerwaga mu biro byabo ndetse akaba ari na bo babandikaho cash power nyuma yo kwishyura kuri konti y’icyo kigo. Ni ikosa bakoze twabasabye ngo bakemure ikibazo cyabaye hagati yabo n’abo bakoranaga kuko abaturage bacu bo bararenganye.”

EUCL irashinja abo baturage kwiba Cash Power

Rushingabigwi Clement,Umukozi wa EUCL mu karere ka Kirehe ari na we wakuyeho cashpower ku nzu z’aba baturage, ubuyobozi bw’Akagali bukamuhagarika amaze gukuraho 25, yatangaje ko nta kosa bakoze ubwo bakuragaho izo cashpower bitewe n’uko ngo basanze zari zaribwe, bityo ngo nta kubarenganya kurimo.

Ati” Abo bakozi babiri bakoze ayo manyanga bakoreraga Intercom twari dufitanye amasezerano yo gutanga amashanyarazi (installation) ariko bakabikora ahatarenze metero 35. Ntabwo bari bemerewe gukora imiyoboro cyangwa gutanga cash power. Impamvu tuvuga ko ayo mashanyarazi bayahawe mu buryo butemewe n’amategeko ni uko uwo muyoboro atari twe twawukoze kandi no mu buryo bwa tekinike ukozwe nabi.”

Ikindi Rushingabigwi avuga ni uko abo bakozi bibye cash power mu karere ka Rwamagana bakajya bazizana muri Kirehe kuzigurisha abaturage kandi akaba nta kindi yari gukora igihe ibyibwe bibonetse uretse kubibambura.

Yongeyeho ko abo baturage nabo ubwabo bashukaga abaturage b’abakene bakagurisha cash power zabo ku udufaranga tudakwiriye bakajya kwishyirira ku nzu zabo kandi ko ibyo na byo ari ubujura.

Uyu muyobozi wa EUCL yatangaje ko bamaze kugeza ikirego muri Polisi kugira ngo abiyitiriye ikigo cyabo bakurikiranwe kuko bakoze amanyanga.

Abaturage bo bavuga ko ibyakozwe byose byabazwa abo bakozi ba EUCL kuko kuba abo bakozi barakoreraga mu biro byabo ari bo ngo bagombaga kubimenya.

Ahari akaziga ku nsinga ni ho abakozi ba bakase Cash power barayijyana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza