Kirehe: Inka enye zapfiriye by’amarabira mu rwuri, harakekwa amarozi

Yanditswe na Uwishyaka Jean Louis
Kuya 30 Ukwakira 2016 saa 10:30
Yasuwe :
0 0

Inka enye zirimo imwe yari imaze amezi arindwi ihaka, zapfiriye by’amarabira mu rwuri ruherereye mu Kagari ka Ntaruka, Umurenge wa Nasho, mu Karere ka Kirehe.

Izi nka zose ni iz’umworozi Ntijyinama Juvenal, usanzwe utuye mu Karere ka Ngoma, mu Murege wa Murama.

Ntijyinama yabwiye IGIHE ko izi nka zafashwe ejo ku wa Gatandatu tariki 29 Ukwakira, saa kumi n’imwe n’igice z’umugoroba aho zari mu rwuri zirisha, umushumba wari uziragiye abona zigize ikibazo gitunguranye zikajya zitura hasi, nyuma gato zirapfa.

Ati "Umushumba yari azihagazeho akajya kubona rwose zigize ikibazo kandi gitunguranye, imwe ikagira itya igasa n’ikunkumura amatwi igahita yibirundura ikagwa nta bundi burwayi ibanje kugaragaza. Ubwo rero twahamagaye umuvetereneri araza arahagera arakurikirana, arareba. Yahageze ariko ntabwo zamaze amasaha nk’abiri, zahise zipfa uko ari enye kandi zegeranye ahantu hamwe kuko imwe itandukanyijwe n’indi na metero eshatu, ziregeranye cyane."

Yakomeje avuga ko Vetereneri yazisuzumye abura icyaba cyazishe, bimwe mu byo bakeka ko byazishe ni amarozi.

Ati "Vetereneri yazikoreye isuzuma, yanazibaze akuramo ibyo munda, apima imyijima, areba ibihaha, asanga nta n’inyama yo mu nda irwaye cyangwa ngo agaragaze ikintu zaba zamize cyagaragarira amaso y’abantu ko cyazishe. Kwemeza ko baziroze ni ikindi kibazo ariko kubera ko Vetereneri w’umurenge yashatse icyaba cyazishe kikaba kitagaragara, mu myumvire yacu tuvuga ko zishobora kuba zahumanyijwe."

Umunyamabanga Nshingwabikorwa w’Umurenge wa Nasho, Nizeyimana Théoneste, yavuze ko izo nka zapfuye koko ndetse ngo bakomeje gushakisha icyaba cyazihitanye.

Ati "Nibyo, ahagana saa mbiri nijoro nibwo natwe batubwiye ko hari inka zirimo zigwa hasi, batubwira ko hamaze kugwa inka enye, nyuma tuza kumenya ko hari kugenda hapfa imwe imwe, twoherezayo abashinzwe umutekano n’abavetereneri bagezeyo barazisuzuma, nyuma baje kutubwira ko isuzuma ryakozwe basanze nta kintu cyagaragaye cyazishe."

Nizeyimana avuga ko bahise bahamagara inzego zibakuriye maze babizeza ko hari buze abaganga b’amatungo bafite ubumenyi buhanitse baturutse muri Minisiteri y’Ubuhinzi n’Ubworozi kugira ngo bazisuzume bagaragaze icyaba cyishe izi nka, ndetse ubwo twandikaga iyi nkuru ngo abo baganga bari mu nzira bajya ahabereye iki kibazo.

Nyir’izi nka avuga ko mu myaka 17 amaze yororera muri uru rwuri ari bwo bwa mbere ahuye n’iki kibazo.

Izi nka ngo zapfuye nta kindi kibazo zibanje kugaragaza
Bazipimye habura icyazishe gusa haracyekwa ko zaba zahumanyijwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza