Kinuthia Charles waregwaga ubutekamutwe muri Kigali Convention Centre yakatiwe gufungwa imyaka ibiri

Yanditswe na Rabbi Malo Umucunguzi
Kuya 16 Nzeri 2019 saa 07:43
Yasuwe :
0 0

Umunyakenya Kinuthia Charles wareganwaga na bagenzi be batatu ubutekwamutwe bushingiye ku nama bakoranyirije muri Kigali Convention Centre, yakatiwe gufungwa imyaka ibiri hamwe n’ihazabu ya miliyoni 3 Frw, mu gihe bagenzi be bagizwe abere.

Uko ari bane baregwaga ko ku wa 25 Kamena bakoranyije abantu ibihumbi biganjemo urubyiruko muri Kigali Convention Centre, mu nama yiswe ’Wealth and Fitness Summit’.

Abitabiriye bavugaga ko bijejwe ubumenyi ku kwihangira imirimo na $197 kuri buri muntu, ariko basabwa kubanza kwishyura nibura 4,500 Frw kugira ngo bemererwe kuyitabira. Byaje guteza akavuyo cyane ko inama yitabiriwe n’umubare uruta uwari witezwe ndetse hakekwaho amayeri y’ubwambuzi, birangira ihagaritswe na Polisi n’abayiteguye batabwa muri yombi.

Kuri uyu wa Mbere nibwo urubanza rwasomwe n’Urukiko rw’Ibanze rwa Kagarama. Abaregwaga ni Dr Kinuthia, Rachel Matipei Nashipai na Vivian Khisa bakomoka muri Kenya n’Umunyarwanda Mohamad Niyonkuru, bashinjwa kwambura abantu ibyabo hakoreshejwe uburiganya no gutegura inama binyuranyije n’amategeko.

Urukiko rwahamije Kinuthia wari uyoboye itegurwa ry’inama yo muri Kigali Convention Centre, icyaha cyo kwihesha ikintu cy’undi hakoreshejwe amayeri, mu gihe kuri Matipei Rachel rwasanze ibimenyetso ubushinjacyaha bwatanze bidahagije ngo ahamwe n’icyaha cy’ubwambuzi kimwe na Vivian Khisa. Mohammed Niyonkuru we urukiko rwasanze mu bimenyetso byatanzwe harimo ugushidikanya.

Ku kindi cyaha bari bakurikiranweho cyo gukoresha inama mu buryo butemewe n’amategeko, abaregwa bose bakigizweho abere.

Ubushinjacyaha bwari bwasabiye abaregwa igifungo cy’imyaka itatu n’amezi atandatu.

Inkuru wasoma: Abashinjwa ubutekamutwe muri Kigali Convention Centre basabiwe gufungwa imyaka itatu


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza