Kimisagara: Afunzwe akekwaho kwicisha ipiki mugenzi we

Yanditswe na Kanamugire Emmanuel
Kuya 17 Ukwakira 2016 saa 02:30
Yasuwe : XX
0

Uwimana Valens wo mu Kagari ka Kamuhoza, Umurenge wa Kimisagara afungiye kuri sitasiyo ya Polisi ya Kimisagara akekwaho kwica Twizeyimana Fulgence amukubise ipiki mu mutwe.

Ku Cyumweru tariki ya 16 Ukwakira ni bwo Uwimana Valens w’imyaka 28 yishe Twizeyimana Fulgence ufite imyaka 24 amukubise ipiki mu mutwe amuziza ko yamusambanyirizaga umugore.

Umunyamabanga Nshingwabikorwa w’Umurenge wa Kimisagara, Ruzima Serge yabwiye IGIHE ko ubu bwicanyi bwabaye ahagana saa yine z’ijoro, aba bombi bakaba babanje gusangira inzoga mu kabari.

Yagize ati “ Nibyo yamwishe ejo nijoro, yamwicishije ipiki ayimukubise mu mutwe bapfa ko yamusambanyirizaga umugore, ngo akaba yari ari kumwigambaho ko babyaranye umwana.”

Yakomeje asaba abaturage kwirinda kwihorera kuko bitemewe ndetse anabashishikariza gutanga amakuru ku gihe y’ingo cyangwa y’abantu bafitanye amakimbirane mu rwego rwo gukumira impfu nk’izo.

Kugeza ubu Uwimana Valens afungiye kuri Sitasiyo ya Polisi ya Kimisagara mu gihe umurambo wa nyakwigendera wajyanywe ku bitaro bya Kacyiru.

Ingingo ya 140 y’igitabo cy’amategeko ahana iteganya igihano cy’igifungo cya burundu ku muntu wese uhamwe n’icyaha cy’ubwicanyi, iya 142 y’icyo gitabo igateganya igihano nk’icyo ku wo ari we wese uhamwe n’icyaha cyo kwica uwo bashakanye.

Umunyamabanga Nshingwabikorwa w’Umurenge wa Kimisagara, Ruzima Serge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza