Kimisagara: Abana bagera ku bihumbi bitatu ntibanditse mu bitabo by’irangamimerere

Yanditswe na Kanamugire Emmanuel
Kuya 24 Ugushyingo 2016 saa 12:34
Yasuwe : XX
91 54

Ubuyobozi bw’Umurenge wa Kimisagara uherereye mu Karere ka Nyarugenge mu Mujyi wa Kigali, buvuga abana ibihumbi bitatu bari munsi y’imyaka 18 batarandikishwa mu bitabo by’irangamimerere.

Bwabitangaje kuri uyu wa Gatatu tariki ya 23 Ugushyingo 2016 mu muhango wo gutangiza Ukwezi kw’irangamimerere mu Mujyi wa Kigali.

Itegeko rishya rigenga umuryango riteganya ko umubyeyi yandikisha umwana we mu gitabo cy’irangamimerere mu minsi 30 akimara kuvuka, mu gihe mbere iyo yarenzaga iminsi 15 yacibwaga amande cyangwa akabanza kujya mu rukiko.

Umunyamabanga Nshingwabikorwa w’Umurenge wa Kimisagara Ruzima Serge, yaboneyeho gusaba abaturage bo muri uyu Murenge batari bandikisha abana babo mu bitabo by’irangamimerere kwihutira kubandikisha muri uku kwezi kubera ko ari ubuntu.

Yagize ati “ Iyi gahunda y’Ukwezi kw’irangamimerere yo kwandika abana batanditswe, ni gahunda twafashe kugira ngo tubikore tubegereye cyane cyane ko mu baturage bakabakaba ibihumbi 42 batuye muri uyu murenge, hari ibihumbi bitatu batanditswe mu bitabo by’irangamimerere kandi bari munsi y’imyaka 18.”

Yakomeje avuga ko yizeye ko abaturage bose bo muri uyu murenge bafite abana batandikishije bazabikora muri uku kwezi.

Bamwe mu babyeyi bari bafite abana batanditse bishimiye iyi serivisi bahawe igiye kumara ukwezi kose.

Umugwaneza Clementine yagize ati “ Ndishimye cyane kuko nari mfite abana babiri, umukuru afite imyaka itandatu ariko bose ntibari banditse ku buryo bose ejo nzaba mbandikishije.”

Uyu mubyeyi yavuze ko bari baramubwiye ko bazamuca amande kubera ko kutabikora ku gihe.

Umuyobozi w’Akarere ka Nyarugenge, Kayisime Nzaramba yasabye abo bturage kwandikisha abana babo mu bitabo by’irangamimerere kuko bituma igenamigambi ry’igihugu rigenda neza.

Yagize ati “ Buri munyarwanda wese akwiye kwiyandikisha mu irangamimerere kugira ngo tumenye amakuru ye kuva avutse kugeza yitabye Imana; rero birakenewe kubera ko n’iyo umuntu yitabye Imana ntimwihutire kumusibisha muri biriya bitabo tumubara nka wa muntu muzima ku buryo bituma igenamugimbi ritagenda neza.”

Meya Kayisime yashishikarije abaturage kwandikisha abana bakoresheje serivise za Irembo batarinze gukora ingendo bajya ku biro bw’Utugari cyangwa imirenge batuyemo.

Biteganyijwe ko nyuma y’ukwezi, umuturage wese uzajya kwandikisha umwana we mu bitabo by’irangamimerere atinze ashobora kuzajya abihanirwa.

Abayobozi bitabiriye umuhango wo gutangiza ukwezi kwahariwe irangamimerere mu Murenge wa Kimisagara
Ruzima Serge, Umunyamabanga Nshingwabikorwa w'Umurenge wa Kimisagara
Umuyobozi w'Akarere ka Nyarugenge, Kayisime Nzaramba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE