Kwamamaza

Kiliziya yasobanuye iby’itangazo risaba imbabazi kuri Jenoside ritasomwe hose mu maparuwasi

Yanditswe kuya 21-11-2016 saa 23:14' na Rabbi Malo Umucunguzi


Mu butumwa busoza umwaka wa Yubile y’Impuhwe z’Imana, Kiliziya Gatolika yasabye imbabazi ku bw’abayoboke bayo bagize uruhare muri Jenoside yakorewe Abatutsi mu 1994, mu itangazo ryashyizweho umukono n’abepisikopi icyenda bayobora Diyosezi Gatolika zose zo mu Rwanda.

Muri iryo tangazo ryanditseho ko “Rizasomwa nyuma ya misa mu gihe cy’amatangazo ku wa 20 Ugushyingo 2016” abasenyeri bavuga ko “muri iyi myaka ishize yose, abapapa bagiye badusaba kudatinya kureba ukuri kw’amateka yacu n’ingorane zayabayemo”.

Perezida w’Inama y’Abepisikopi Gatolika akaba n’Umushumba wa Diyosezi ya Butare, Musenyeri Filipo RUKAMBA, yavuze ko yabonye amakuru ko ritasomwe muri Diyosezi ya Kigali ndetse n’impamvu zabyo zizwi.

Ati “Aho nzi bambwiye ni i Kigali kandi naho barabyivugiye, Musenyeri wabo ntari ino, ubwo naza bazabikora kuko Diyosezi igengwa na Musenyeri ntigengwa n’umuntu wundi. Nkanjye ndi Perezida w’Inama y’Abasenyeri ariko rero ntabwo nyobora Diyosezi ya Kigali.”

Hari n’amakuru avuga ko hari zimwe muri Paruwasi zo muri Diyosezi ya Byumba ritasomwemo, ariko Musenyeri Nzakamwita Servilien uyiyobora avuga ko baryohereje ahantu hose hashoboka.

Ati “Njye ntabyo nzi, [ibaruwa] twayohereje hose no mu masantarali. [Aho nasomeye misa] Ni nanjye wayisomeye. Ariko mu misa zose, njye nasomye iya kabiri, [iyo baruwa] narayisomye ndetse abakirisitu bakoma amashyi, sinzi icyatumye bayakoma ubundi iyo umuntu amaze kwigisha ntabwo bakoma amashyi.”

Musenyeri Nzakamwita yavuze ko agiye kubaza aho bivugwa ko iyo baruwa yaba itarasomwe, ku buryo hazamenyekana impamvu byaba bitarakozwe.

Musenyeri Filipo Rukamba avuga ko aho azi batasomye ririya tangazo ari muri Diyosezi ya Kigali

Kiliziya yasabye imbabazi mu izina ry’abakirisitu

Mu itangazo ry’Abepiskopi Gatolika bo mu Rwanda bavuze ko mu 2000 ubwo hasozwaga Yubile y’imyaka 100 u Rwanda rwari rumaze rwakiriye Inkuru Nziza ya Yezu Kristu, ubuyobozi bwa Kiliziya bwasabye imbabazi mu izina ry’abakirisitu, bityo uyu mwaka wa Yubile y’impuhwe z’Imana wahise utanga “uburyo bwiza bwo kongera gushyira mu bikorwa icyifuzo cyo kureba amateka y’Igihugu cyacu tuyarebana amaso y’ukwemera.”

Bati “Nubwo Kiliziya ntawe yatumye kugira nabi, twebwe abepisikopi gatolika, ku buryo bw’umwihariko, twongeye gusaba imbabazi kubera bamwe mu bana bayo, abasaseridoti, abihayimana n’abakirisitu bagize uruhare muri jenoside yakorewe abatutsi.”

Hari n’aho bagira bati “Twebwe abepisikopi banyu, mu izina ry’abakirisitu gatolika bo mu gihugu cyacu, muri uku gusaba imbabazi twitandukanya ku buryo bwose n’icyaha cya jenoside yakorewe abatutsi muri 1994, tunitandukanyije n’imigirire yose n’imyumvire yose bijyanye n’ivangura n’irondakoko bigikomeza gutoneka ibikomere twasigiwe na jenoside yakorewe abatutsi.”

Bavuze ko basaba imbabazi “kubera abayobozi b’abakirisitu bose batumye haba amacakubiri mu bantu bakabiba imbuto mbi y’urwango kimwe n’abarenganyije abandi ntibite ku burenganzira bwa muntu mu mirimo bashinzwe.”

Abepisikopi Gatolika kandi batangaje ko nyuma ya yubile y’impuhwe z‘Imana, ku itariki ya 7 Ukwakira 2017 Kiliziya izasoza Yubile y’imyaka 100 abasaserdoti ba mbere b’abanyarwanda, Padiri Balitazari Gafuku na Padiri Donati Reberaho, bahawe ubupadiri, bakaba barabimburiye abanyarwanda benshi babaye abasaserdoti.

Bati “Mu mwaka wa 2018 tukazakomeza gutekereza ku bumwe n’ubwiyunge by’abanyarwanda n’inkunga yacu nk’abakirisitu gatolika kugira ngo u Rwanda rube koko igihugu kirangwa n’ituze, amahoro, ubumwe n’ubwumvikane byo bimenyetso by’ubumwe bwacu n’Imana.”

Musenyeri Nzakamwita yabwiye IGIHE ko amaze kurisoma abakirisitu bakomye amashyi gusa ko atazi impamvu babikoze

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved