Kiliziya Gatolika yakomoje ku nyigisho z’idini mu guhangana n’ingaruka za Jenoside

Yanditswe na Iradukunda Serge
Kuya 21 Kamena 2019 saa 01:17
Yasuwe :
0 0

Kiliziya Gatolika yashinjwe uruhare muri Jenoside yakorewe Abatutsi mu 1994, ndetse kiliziya zayo zigera kuri 60 mu gihugu zahindutse ahantu hiciwe Abatutsi.

Arkiyepiskopi wa Kigali, Musenyeri Kambanda Antoine, yavuze ko nyuma ya Jenoside Kiliziya yibanze mu gutanga inyigisho z’ubumwe n’ubwiyunge ariko aya masomo akenewe cyane cyane ko hari ibindi bibazo bishya bigenda bivuka.

Musenyeri Kambanda yabigarutseho ku wa Kane mu nama y’iminsi itatu iri kubera i Kigali yiga ku kongera imbaraga mu nyigisho z’amadini nyuma ya Jenoside, imbogamizi n’icyizere gihari.

Iyi nama mpuzamahanga igamije kunga abantu no kongera kubaka ubuzima, yateguwe n’Umuryango w’AbaJezuwiti mu Rwanda nk’umusanzu bageneye Kiliziya Gatolika n’Abanyarwanda.

Ihuje abihaye Imana, abashakashatsi baturutse mu bihugu bitandukanye ku Isi, n’Abanyarwanda.

Musenyeri Kambanda watanze ikiganiro ku ‘ruhare rw’itorero mu rugendo rw’ubwiyunge mu Rwanda’ yikije ku kugaragaza ko Kiliziya Gatolika yafashije Abanyarwanda benshi kwiyunga hagati yabo no kongera kwegerana n’Imana.

Yagize ati “Mu myaka 25 ishize, u Rwanda ruri mu rugendo rwo kwiyubaka kandi itorero ritanga umusanzu waryo mu guteza imbere ubumwe n’ubwiyunge.’’

Kambanda agaragaza ko hakiri imbogamizi zikigaragara nyuma ya Jenoside zibangamira ihame ryo guca bugufi, amahoro n’ubumwe n’ubwiyunge.

Muri zo harimo abahoze bafunzwe basubizwa mu buzima busanzwe nyuma yo gusoza ibihano bahawe, abana bamenya uruhare ababyeyi babo bagize muri Jenoside, impfubyi n’izindi.

Kambanda yavuze ko “Hari ibibazo bitandukanye bijyanye n’imbogamizi nshya zigaragara. Hari ibintu byinshi dukeneye gukemura.’’

Perezida w’Inama y’Abepiskopi mu Rwanda, Musenyeri Philippe Rukamba, yavuze ko itorero rikeneye kugira uruhare rukomeye mu kwigisha Abanyarwanda kuba abaturage beza batimakaza ingengabitekerezo zitandukanya abantu n’izibiba urwango.

Umubikira Thérèse Mukabacondo wo mu Muryango wa Benebikira, yavuze ko itorero ryihariye 40% by’ibigo by’amashuri abanza mu gihugu rifite umusanzu ukomeye mu burezi bwacyo.

Yagize ati “Dukeneye gushishikariza ababyeyi kugira uruhare mu burezi buhabwa abana babo no kubafasha muri uyu mukoro rimwe na rimwe ubaganza.’’

Yavuze ko imbogamizi zikiri mu burezi bw’u Rwanda zirimo ihohoterwa rikorerwa mu miryango rigira ingaruka ku bana, gutandukana kw’abashakanye no kubura ababyeyi b’intangarugero babera icyitegererezo imiryango mishya by’umwihariko igizwe n’ababaye imfubyi kubera Jenoside.

Kiliziya Gatolika yakunze gushinjwa uruhare muri Jenoside yakorewe Abatutsi. Muri Mata 2019, Minisitiri w’Ubutabera akaba n’Intumwa Nkuru ya Leta, Johnston Busingye, yatangaje ko abapadiri 25 baburanishijwe ku byaha bya Jenoside mu gihe hakiri n’abandi bagishakishwa.

Jenoside yakorewe Abatutsi yaguyemo abapadiri, ababikira n’aba- frères bo muri Kiliziya Gatolika bagera kuri 200.

Musenyeri Kambanda yavuze ko Kiliziya imaze urugendo rw’imyaka 25 ishyize imbere ivanjili y’ubwiyunge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza