Kigali: Yatewe inda afite imyaka 16 ashukishijwe telefone (Video)

Yanditswe na Thamimu Hakizimana
Kuya 26 Mutarama 2021 saa 10:09
Yasuwe :
0 0

Gakumi (Izina ryahinduwe), ni umukobwa uvuka mu Murenge wa Bugarama, Akarere ka Rusizi watewe inda afite imyaka 16 y’amavuko ashukishijwe telefone ubwo yigaga mu mwaka wa kabiri w’amashuri yisumbuye.

Uyu mwana w’umukobwa umaze kuzuza imyaka 17 ubu atuye mu Murenge wa Kigali, ashimangira ko kugira irari ry’iby’Isi aribyo byatumye atwara inda imburagihe.

Yabwiye IGIHE ko yaje mu Mujyi wa Kigali agiye gukora akazi ko mu rugo yari yarangiwe n’umukobwa bavuka mu gace kamwe ariko nyuma aza guterwa inda n’umuhungu w’imyaka 25 babaga mu gipangu kimwe.

Yavuze ko umusore babyaranye yamushukishaga utuntu dutandukanye kugira ngo baryamane ku buryo ari nabyo byaje kumuviramo gutwara inda akiri muto mu buryo butunguranye.

Ati “Yanshukishaga utuntu, akanzanira utuntu, akaba yanzanira udukeke, biscuit na jus yanampaye na telefone.”

Yemeza ko uwo musore bakundaga gupanga uko bazaryamana iyo abakoresha babo babaga bagiye ku kazi.

Gakumi yavuze ko akimara gutwara inda atahise abimenya ndetse ko atazibagirwa ubuzima bubi yanyuzemo nyuma y’aho.

Ati “Sinabimenye ahubwo mabuja niwe watangiye kubimbaza ndabimuhakanira noneho ajyana kwa muganga baba aribo babitubwira. Natangiye kugira ubuzima bubi mabuja arambwira ngo ntiyarera ikinyendaro aranyirukana atampembye kuko ukwezi kwanjye kwari kutararangira, ndagenda ndangara kubera ko nta n’itike nari mfite yo kunsubiza mu rugo.”

Yavuze ko atahise abimenyesha ubuyobozi n’Urwego rw’Igihugu rw’Ubugenzacyaha, RIB kuko yari yataye umutwe anumva ko nta n’ikintu izo nzego zamufasha.

Ababazwa n’uko umwana we atazigera amenya se cyane ko yamenye ko yasamye uwo musore yaramaze kuva muri urwo rugo.

Ati “Narababaye cyane kubera ko n’uwo muhungu ntabwo yari akiba muri icyo gipangu yari yarimutse nta buryo najya mu rugo […] hari n’abambwiraga ngo nyikuremo mbona nabipfiramo ndabyihorera.”

Gakumi yavuze ko nyuma y’uko ahuye n’umubyeyi w’umugiraneza akajya kumurera, ubuzima bwe bwaje guhinduka cyane kuko yaje no kwiyakira.

Ati “Mbere nabonaga bagenzi banjye basubiye ku ishuri nkagira isoni n’ipfunwe bikanambabaza ariko nyuma yaje kunsaba kwiyakira anyumvisha ko bibaho nanjye ntangira kwigarurira icyizere.”

Kugeza ubu uyu mukobwa avuga ko we n’umwana we batabayeho neza kuko batabasha kubona iby’ingenzi bakeneye byose, cyane ko n’umuryango umurera utifashije.

Yemeza ko aramutse abonye abamwishyurira amashuri nawe yakongera akiga kugira ngo we n’umwana we babashe kugira ubuzima bwiza aboneraho gusaba abakobwa bagenzi be kwirinda kugira irari ry’iby’Isi no kwishora mu busambanyi kugira ngo birinde kuba nkawe.

Yatewe inda afite imyaka 16 ashukishijwe telefone

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .