Kigali: Umunya-Canada yasanzwe muri hoteli yapfuye

Yanditswe na Evariste Nsengimana
Kuya 3 Mutarama 2018 saa 11:46
Yasuwe :
0 0

Umugabo ufite ubwenegihugu bwa Canada witwa Vicash Chandra Mishra uri mu kigero cy’imyaka 60, yasanzwe yapfiriye muri Hotel Okapi iherereye ku Muhima mu Karere ka Nyarugenge, ku wa 2 Mutarama 2018.

Umuvugizi wa Polisi y’u Rwanda mu Mujyi wa Kigali, SP. Hitayezu Emmanuel, yabwiye IGIHE ko bamenye iby’urupfu rw’uyu mugabo ariko ko amakuru arambuye aza kuyatangaza mu kanya katarambiranye.

Ati “Ni Umunya-Canada ariko nta makuru ndabifatishaho neza.”

Amakuru agera kuri IGIHE ni uko uwo mugabo yatangiye gucumbika muri Hotel Okapi guhera muri Mutarama 2017.

Kuri uyu wa Kabiri, uwo mugabo ngo yiriwe nta kibazo afite, nyuma aza kumva amerewe nabi, atumiza umuti muri Pharmacy, ku gicamunsi abakozi b’isuku ba hoteli bamusanga mu cyumba yashizemo umwuka.

Umuyobozi Mukuru wa Hotel Okapi, Egide Ruzindana, yabwiye IGIHE, ati “Ni umuntu wari umaze igihe hano. Ejo saa tatu yari muzima, umukozi yamushyiriye ifunguro rya mu gitondo baraganira, aza gusubirayo mu ma saa munani, amushyiriye icupa ry’amazi asanga yapfuye.”

Abajijwe ku bijyanye n’uko hari umukozi wa hoteli nyakwigendera yatumye umuti muri Pharmacy, Ruzindana yasubije ati “Ibyo nibyo, yari amaze igihe hano, buri wese agira uwo yisanzuraho. Yabwiye uwo mukozi ko yumva ababara mu rutugu, ko ashobora kuba yaryamye nabi, amutuma umuti (Pomade). Nta bundi burwayi twari tumuziho.”

Yongeye ati “Ntawe barwanye, ntiyahubutse ku ibaraza, ari nayo mpamvu nyine twabihariye Polisi. Yego ntiwabihamya kuko nta bizamini bya muganga, ariko icyo benshi bemezaga ni uko yagize ikibazo cy’umutima.”

Yakomeje asobanura ko umukozi yinjiye mu cyumba cye, agasanga yarambitse indorerwamo ze hafi, yafunguye amazi yari agiye gukaraba, aryamye hasi kandi nta gikomere na kimwe afite, bagahita bamenyesha Polisi.

Hotel Okapi yapfiriyemo Vicash Chandra Mishra

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza