Kigali: Ubuzima buteye inkeke ku bana b’abakobwa bo mu muhanda

Yanditswe na Thamimu Hakizimana
Kuya 10 Kanama 2017 saa 02:48
Yasuwe :
0 0

Ubuzima bw’ubuzererezi ntibukiri umwihariko w’abahungu kuko hirya no hino mu Mujyi wa Kigali by’umwihariko mu Karere ka Nyarugenge hagaragara n’abakobwa bavuga ko batewe impungenge n’imibereho yabo y’ahazaza.

Nubwo Leta y’u Rwanda idahwema gushyira imbaraga muri gahunda yo guca ubuzererezi bw’abana, iyo utembereye mu bice bitandukanye by’Umujyi wa Kigali usanga bakigaragara.

Muri Nyabugogo munsi ya gare ahagana ku kiraro gitandukanya Umurenge wa Muhima n’uwa Kimisagara ahacururizwa indabo, ubasanga biremye amatsinda y’abahungu n’abakobwa aho bamwe baba bakina urusimbi abandi bari kunywa ibiyobyabwenge, abaryamye ndetse n’abamesa imyenda.

Muraganira bakakubwira ko bahisemo kwibera mu buzima bwo mu muhanda kubera ibibazo bitandukanye birimo ubukene n’amakimbirane mu miryango bavukamo n’ibindi.

Igitangaje ni uko uhasanga n’abagore bafite n’abana babaho mu buzima bwo mu muhanda.

Bamwe muri aba bana birarira mu muhanda yo muri aka gace. Icyakora abakobwa bavuga ko bababangamirwa cyane n’uko abahungu bagenzi babo(inzererezi) bamaze gukura basigaye babafata ku ngufu ku buryo hari n’abo biviramo gutwara inda zitateguwe.

Umwe muri bo w’imyaka 17 yagize ati “Ubuzima bwo mu muhanda bwo kurara muri gare cyangwa hano muri za ruhurura twarabumenyereye, ahubwo ikibazo dufite ni uko basaza bacu basigaye badusambanya, nyine hari igihe ubona nk’umuhungu ukurusha ingufu akubwiye ngo umuhe, ukemera kubera kwanga ko baguca ku iseta.”

Mugenzi we w’imyaka 15 na we yemeza ko hari umuhungu uherutse kumufata ku ngufu.Akomeza avuga ko hari abandi batari bake bamaze guterwa inda muri izo nzira ku buryo rimwe na rimwe ari na byo bituma batifuza no gusubira iwabo.

“Ikibazo si ukubikora ahubwo ni uko babikora nta gakingirizo wakabibutsa bakabyanga ku buryo umuntu aba afite ubwoba ko bamuteye na sida.”

Ubuyobozi bw’Akarere ka Nyarugenge bubivugaho iki?

Umuyobozi w’Akarere ka Nyarugenge wungirije ushinzwe imibereho myiza y’abaturage, Ndayisenga Jean Marie Vianney , we avuga ko aba bana bagiye kujya bajyanwa mu kigo gishinzwe igororamuco (NRS).

Yagize ati “ Aba mbere twabasubije mu miryango yabo, bariya ni abandi bahaza umunsi ku wundi ariko ubu ku bufatanye bwa Minisiteri y’Ubutegetsi bw’Igihugu n’Umujyi wa Kigali tugiye kubafatira hamwe tubajyane mu kigo gishinzwe igororamuco.”

Iki kibazo cy’abana bo mu muhanda cyakunze kugarukwaho n’abayobozi banyuranye barimo na Perezida Paul Kagame, wavuze ko bitumvikana ndetse ko bitanakwiye ko umwana w’umunyarwanda aba mu muhanda, asaba inzego bireba gukemura iki kibazo.

Minisiteri y’Uburinganire n’Iterambere ry’Umuryango ndetse n’abandi bafatanya na yo, bagiye bavuga ko bagiye guhagurukira iki kibazo kigakemurwa vuba ariko na abana nk’abo baracyagaragara.

Iyo biriwe muri iki gishanga nijoro barara muri gare ya Nyabugogo
Aba bakobwa barimo n'abafite abana baba barimo kumesa imyenda
Mu matsinda yabo bamwe baba banywa itabi abandi bakina urusimbi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza