Kwamamaza

Kigali: Polisi yerekanye batatu bakurikiranyweho kunyereza imisoro isaga miliyari

Yanditswe kuya 5-11-2016 saa 10:30' na Uwishyaka Jean Louis


Polisi y’Igihugu yerekanye abagabo batatu bakurikiranyweho gutanga inyemezabuguzi ku bandi bacuruzi babafasha kugabanya imisoro ku nyongeragaciro(TVA), isaga gato miliyari y’amafaranga y’u Rwanda.

Aba bagaragajwe kuri uyu wa Gatanu, tariki ya 4 Ugushyingo 2016, bakaba ari abahagarariye sosiyete eshatu zirimo Quality Business Center Ltd, Reason Trading Company Ltd, na Bei Rahisi Company Ltd, zose ziri muri 25 zikurikiranyweho kunyereza umusoro binyuze mu gukoresha nabi EBM.

Amafaranga yatswe na Union Trading yageraga kuri miliyoni 145, Quality Business yatse miliyoni 390 na ho Bayi Layisi yaka miliyoni 210. Nanone Bayi Layisi yari ishigaje kwaka miliyoni 39 mu mpapuro zayo, Quality Business isigaje 152 mu gihe Reason Trading yasabaga kugarurirwa imisoro ingana na miliyoni 76.

Bivugwa ko bafunguraga ikigo bakiyandikisha muri RRA, bakajya bagirana imikoranire n’abandi bacuruzi bakabafasha kubona inyemezabuguzi kandi nta bicuruzwa baguze.

Mbera Emmy, Umuhuzabikorwa w’umushinga wa EBM mu kigo cy’igihugu cy’imisoro n’amahoro, RRA, yagize ati "Aba bantu ibyaha bakoze ni uko bafashije abantu kunyereza umusoro ku nyongeragaciro (TVA) ku buryo bagiye bafasha abantu babaha inyemezabuguzi za EBM, kandi mu by’ukuri nta bicuruzwa bigaragara baguze, ahubwo bakabafasha kugabanya umusoro wakagombye kwishyurwa buri kwezi cyangwa se ku gihembwe."

Mbera avuga ko ibintu byo kunyereza umusoro muri ubu buryo ari gishya gusa ngo nta wakwicara ngo aterere agati mu ryinyo nubwo ababikora baba ari bake cyane ugereranyije n’abakoresha izi mashini.

Yasabye abantu bose bagura ibicuruzwa binyuranye kujya baka inyemezabuguzi za EBM, ariko nabwo bakarushaho kuba maso kugira ngo bataza guhabwa iz’impimbano.

Umwe mu bafashwe uhagarariye sosiyete ya Quality Business Center, yabwiye itangazamakuru ko iyi sosiyete ye yayifunguye mbere y’uko imashini za EBM zitangira gukoreshwa, gusa ngo nyuma nibwo yaje kugwa mu gishuko cyo gucuruza inyemezabuguzi abisabwe n’abacuruzi bashakaga kunyereza imisoro.

Ati "Mfungura kompanyi nari ngamije gucuruza nkunguka kuko nayifunguye mbere y’uko EBM ibaho mu 2011, nari mfite ibyambombwa byose byuzuye n’iby’ubunyangamugayo muri RRA, ariko nanjye naje kwisanga nagiye muri ayo makosa yo gucuruza inyemezabuguzi mbisabwe n’abacuruzi batandukanye kugira ngo barebe uko bagabanya umusoro. Ndabyemera kandi ndasaba imbabazi umuntu ugomba kuzisabwa wese."

Uyu mugabo kimwe na bagenzi be avuga ko yakoze ibi bikorwa kuva mu mwaka ushize wa 2015, asobanura ko bahaga abacuruzi inyemezabuguzi zemeza ko hari icyo baguze kandi mu by’ukuri nta gicuruzwa cyaguzwe, bagamije kunyereza umusoro ku nyongeragaciro.

Umuvugizi wa Polisi y’u Rwanda mu Mujyi wa Kigali, Superintendent of Police (SP) Emmanuel Hitayezu, yatangaje ko aba bantu bafashwe nyuma y’amakuru yatanzwe n’abaturage bavuga ko batanga inyemezabuguzi mu buryo butemewe n’amategeko.

Ati "Iki ni igikorwa polisi imazemo iminsi ifatanya n’Ikigo cy’Igihugu cy’Imisoro n’Amahoro, twabitangiye dushingiye ku makuru twagiye duhabwa n’abaturage y’uko hari abantu bafite imashini zitanga inyemezabuguzi za EBM noneho zigatangwa kugira ngo babashe kurigisa imisoro n’amahoro, aho babikora bashingiye kuri sosiyete bafunguye noneho bakajya bafatanya n’abo bacuruzi bashaka kurigisa imisoro n’amahoro."

SP Hitayezu avuga ko aba bafashwe biyongera ku bandi bamaze gufatwa banafunzwe, bityo ngo bakaba bagiye gukorerwa dosiye kugira ngo bashyikirizwe ubushinjacyaha.

Asaba abaturage kurushaho gutanga amakuru y’abakora ibikorwa nk’ibyo kugira ngo babashe gufatwa bahanwe. Yasabye kandi abantu bashobora kuba barabonye inyemezabuguzi mu buryo budaciye mu mucyo kubigaragaza kugira ngo bikurikiranwe hakiri kare.

Mu rutonde rwa sosiyete 25 ruherutse gushyirwa ahagaragara zikekwaho kunyereza imisoro zifashishije imashini ya EBM, abantu 10 bazihagarariye bamaze gutabwa muri yombi, gusa ngo iperereza rirakomeje kugira ngo hafatwe n’abandi.

Aba bagabo baramutse bahamwe n’icyaha bahanishwa ingingo ya 369 mu gitabo cy’amategeko ahana ibyaha mu Rwanda, iteganya igifungo kuva ku mezi atandatu kugeza ku myaka ibiri n’ihazabu ingana n’agaciro k’umusoro wanyerejwe.

Batatu bakurikiranyweho gutanga inyemezabuguzi ku bacuruzi babafasha kugabanya imisoro ku nyongeragaciro
Mbera Emmy, Umuhuzabikorwa w’umushinga wa EBM mu kigo cy’igihugu cy’imisoro n’amahoro, RRA
Umuvugizi wa Polisi y’u Rwanda mu Mujyi wa Kigali, Superintendent of Police (SP) Emmanuel Hitayezu

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved