Kigali Leading TVET School yohereje mu birwa bya Maurice abanyeshuri icyenda bagiye gukomeza amasomo

Yanditswe na Sekamana Mathias
Kuya 14 Kanama 2019 saa 11:27
Yasuwe :
0 0

Ishuri ryigisha ubukerarugendo n’amahoteli rya Kigali Leading School ryasezeye ndetse riha impanuro abanyeshuri icyenda bagiye gukomereza amasomo ya kaminuza muri Jeet’s Hospitality and Tourism Management yo birwa bya Maurice.

Aba banyeshuri barimo abahungu batanu n’abakobwa bane, bahawe impanuro kuwa Mbere, bagiye mu birwa bya Maurice binyuze mu masezerano amashuri yombi afitanye.

Ibi bigo bibiri byasinyanye amasezerano y’ubufatanye umwaka ushize arimo kohereza abanyeshuri kwiga yo, guhanahana abarimu n’imfashanyigisho.

Ku ikubitiro muri Werurwe uyu mwaka, Kigali Leading TVET School yohereje abanyeshuri batanu muri iyi kaminuza, bose bishingiwe na Jeet’s Hospitality and Tourism management/Mauritius

Kuri iyi nshurio hagombaga kohererezwa abandi 10 bagiye kwishingirwa kuri 50%, ariko umwe mu batoranijwe yagize ikibazo cy’uburwayi.

Umuyobozi wa Kigali Leading TVET School waherekeje aba banyeshuri akabageza aho bagiye kwiga, Habimana Alphonse, yavuze ko batoranya aba banyeshuri bagendeye ku mitsindire n’imyitwarire yabo, ariko hakazamo no kumvikana n’ababyeyi.

Ati “Tugendera ku manota bagize, tukagendera ku myitwarire yabo hano ku ishuri ariko tukanakorana n’ababyeyi babo mu kugira ibindi twuzuza nk’abo dufatanya kurera.”

Ishimwe Uwineza Clarisse wavuze mu izina ry’abandi banyeshuri bajyanye, yashimye ubuyobozi bw’ikigo bukora ibishoboka byose ngo bushakire abana bwareze ibyiza, yizeza ababyeyi ko bazakora ikibajyanye uko bikwiye.

Ati “Turashimira ubuyobozi butahwemye kutuba hafi. Turizeza ababyeyi ko tuzakora ibyo badutumye, tukabahesha ishema.”

Umuyobozi w’inama y’ababyeyi barerera muri Kigali Leading TVET School, Uwibambe Libérée, yibukije aba bana ko bagomba kuzarangwa n’indangagaciro nyarwanda kuko bahagarariye igihugu cyababyaye.

Ati “Mugiye mu birwa bya Maurice ariko muri abanyarwanda. Muzahagararire u Rwanda neza, muzakore ibizatuma mugira icyo mwimarira mukadutera ishema nk’ababyeyi.”

Yabibukije kandi ko bagomba kuzarangwa n’ikinyabupfura aho bagiye kuko ari ishingiro ry’ibindi byose umuntu ashobora gukora bikamutandukanya n’abandi mu buryo bwiza.

Safari Valens uyobora inama y’ubutegetsi bw’iri shuri we yabwiye aba banyeshuri kuzakora bike bibafitiye akamaro muri byinshi bazaba bemerewe.

Ati “Mugende muduhagararire neza. Ntimuzasibire barumuna banyu amayira. Muzakore bike bibafitiye umumaro muri byinshi muzaba mwemerewe.”

Ubuyobozi bwa Kigali Leading TVET buvuga ko bwemerewe kujya bwohereza abanyeshuri 15 muri iyi kaminuza buri mwaka, ariko ngo bizeye ko bashobora kwiyongera bakagera kuri 50 mu biganiro umuyobozi w’ishuri azagirana n’ubuyobozi bwa Jeet’s Hospitality and Tourism management nagezayo aba banyeshuri.

Ababyeyi bafite abana bagiye gukomereza amasomo mu birwa bya Maurice
Ababyeyi bari baherekeje abana babo kumva impanuro ku ishuri mbere yuko bagenda
Abanyeshuri bagiye gukomereza amasomo y'ubukerarugendo n'amahoteli mu birwa bya Maurice
Abanyeshuri bagiye kujya mu Birwa bya Maurice bishimanye n'umuyobozi wa Kigali Leading TVET School,Alphonse Habimana
Abanyeshuri, ababyeyi babo n'abakozi ba Kigali Leading School bafashe ifoto y'urwibutso
Alphonse Habimana yashimiye ababyeyi batahwemye kubafasha kugira ngo kohereza aba bana bishoboke
Bahawe impanuro nyinshi
Ishimwe Uwineza Clarisse wavuze ahagarariye abandi yijeje ababyeyi ko bazakora neza ikibajyanye
Safari Valens yasabye aba banyeshuri kuzahitamo ibifite akamaro mu byo bazaba bemerewe byose
Umuyobozi wa Kigali Leading TVET School, Alphonse Habimana yaherekeje aba banyeshuri
Uwibambe yasabye aba bana kuzarangwa n'imyitwarire myiza

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza