Kigali Leading TVET School yahaye impamyabushobozi abarangije mu bukerarugendo n’amahoteli

Yanditswe na David Eugène Marshall
Kuya 6 Ukwakira 2018 saa 08:04
Yasuwe :
0 0

Abagera kuri 234 barangije amasomo yabo mu mashami y’ubukerarugendo n’amahoteli mu ishuri Kigali Leading TVET School, kuri uyu wa Gatandatu bahawe impamyabushobozi.

Barimo abize amasomo amara imyaka itatu bahawe impamyabushobozi ya A2, abize amara umwaka umwe ndetse n’ay’amezi atatu.

Umuyobozi wa Kigali Leading TVET School, Alphonse Habimana, yavuze ko iki ari icyiciro cya gatandatu bahaye impamyabushobozi abarangije muri iri shuri rimaze imyaka itanu ritangiye.

Yavuze ko uretse uburezi bufite ireme n’ikinyabupfura gitozwa abiga muri iri shuri, hari n’agashya k’uko ubuyobozi bw’Ishuri bwashyizeho gahunda yitwa Alumnae Network, ituma ishuri rikurikirana uwaharangije rikamuhuza na ba rwiyemezamirimo baba baje kurambagiza abakozi muri iryo shuri.

Ati “Dufite urubuga duhuriraho n’abanyeshuri bose, kandi ushoje hano dusigarana aderesi ye na numero za telefoni ku buryo ibigo biza kudusaba abakozi barangije hano duhita duhamagara abatarakabona.”

Abanyeshuri bahize abandi mu manota mu byiciro bitandukanye bahawe ibihembo bitandukanye, birimo no gutemberezwa muri za Pariki z’igihugu nka Nyungwe, Akagera ndetse no mu Birunga.

Batanu mu bitwaye neza kandi bahawe Buruse zo gukomereza amasomo yabo mu gihe cy’umwaka n’igice muri Kaminuza ya Jeet’s Hospitality and Tourism mu Birwa bya Maurice, aho buri munyeshuri azishyurirwa amadolari ibihumbi bine.

Mu gihe azaba ari muri icyo gihugu kandi akazanibafatanya no gukorera amafaranga mu bigo n’amahoteli azaba akoreramo imenyerezamwuga.

Umuyobozi w’Akarere ka Nyarugenge Kayisime Nzaramba, yashimiye cyane Kigali Leading TVET School uburyo yaje nk’igisubizo cyuzuza imihigo y’akarere ayobora, kandi amashuri yigisha ubumenyingiro n’imyuga yihariye 60% naho amasomo asanzwe akagira 40%.

Yavuze ko muri gahunda ya Guverinoma y’imyaka irindwi 2017/ 2024 harimo guhanga imirimo miliyoni imwe n’igice, kandi amashuri yigisha imyuga n’ubumenyingiro akazabigiramo uruhare runini.

Yabwiye abashoje amasomo ati “Umuco mwiza mwakuye mu kigo cyanyu muwusakaze aho muzaba muri hose, umuntu wese uzajya ababona ajye abahuza n’Ikigo mwizeho kugira ngo bihe amahirwe n’abandi bifuza kukigamo”.

Yabasabye kugaragaza ko bafite umwihariko nk’abanyeshuri bize muri Kigali Leading TVET School.”

Ufitumuhoza Jean Gentil umwe mu bize muri Kigali Leading TVET School, yishimira ko ubu afite akazi ko gutembereza ba mukerarugendo.

Ati “Kwiga iby’amahoteli n’ubukerarugendo ni byiza, ariko kwiga muri iri shuri ni akarusho kuko rwose ntawakwiga hano ngo abure akazi ntibishoboka, cyane ko ishuri rinadushakira akazi iyo bibaye ngombwa”.

Uwitonze Nadia ushoje imyaka itatu mu bukerarugendo yavuze ko kwiga muri iri shuri byatumye amenya u Rwanda rwose n’Isi yose.

Iri shuri rivuga ko rizakomeza gushakira umubano n’ibindi bigo, byiyongera ku byo basanzwe bakorana birimo amahoteli akomeye nka Radisson Blu & Kigali Convention Centre, ibigo nta Wilson Tours yatanze ibihembo ku banyeshuri n’ababyeyi barere muri iri shuri mu kuzabatembereza u Rwanda n’ibindi.

Ishuri rya Kigali Leading TVET School ryatangiye mu 2013 ritangirana abanyeshuri 16, none ubu rifite abanyeshuri 438.

Mbere y'uko ibirori bitangira, haririmbwe indirimbo yubahiriza igihugu
Banyujijemo banica akanyota mu gikorwa cyabimburiye ibindi cyo gusangira n'ababyeyi n'incuti zabaherekeje kwizihiza ibi birori
Umuyobozi w'Akarere ka Nyarugenge Kayisime Nzaramba yashimiye Kigali Leading TVET School umusanzu wayo mu burezi bw'igihugu n'Akarere by'umwihariko
Umuyobozi w'Ikigo Kigali Leading TVET School yasezeranije bake batarabona akazi ko Ikigo kibazirikana, kandi kibizeza inkunga mu kwihangira imirimo no kubahuza na Rwiyemezamirimo bandi
Uwitonze Nadia ashoje imyaka itatu mu ishami ry'ubukerarugendo, akaba ahugukiwe no gutembereza ba mukerarugendo ashimira ubumenyi n'ubuhanga yahawe na Kigali Leading TVET School
Abayobozi n'abafatanyabikorwa batandukanye baturuka mu mahanga n'imbere mu gihugu bari mu bitabiriye ibi birori
Itorero ry'Abanyeshuri ryasusurukije ababyeyi n'abarezi biratinda

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza