Kigali: Kiliziya Gatolika yujuje Hotel ifite agaciro ka miliyari umunani itazinjizwamo agakingirizo

Yanditswe na Umurerwa Emma Marie
Kuya 6 Werurwe 2017 saa 09:55
Yasuwe :
4 1

Kiliziya Gatolika mu Rwanda yujuje Hotel nini yayitwaye akayabo ka miliyari umunani z’amafaranga y’u Rwanda, nyuma y’imyaka ine yubakwa kugira ngo izajye ifasha mu iterambere ry’ibikorwa bya Kiliziya.

Muri Kamena 2012 nibwo Ste Famille Hotel Ltd yatangiye kubakwa ahahoze amacumbi hazwi nka ‘Procure’ mu gikari cya Kiliziya yitiriwe Umuryango Mutagatifu ‘Ste Famille’ ikaba ari umutungo bwite wa Arikidiyosezi ya Kigali.

Umuyobozi wa Ste Famille Hotel Ltd, Padiri Bernardin Banituze yatangarije IGIHE ko izatangira gukorerwamo muri uyu mwaka wa 2017.

Yagize ati “Imirimo yose biteganyijwe ko izaba yarangiye mu kwezi kwa gatandatu 2017 igahita itangira gukorerwamo. Ni yo Hotel ya mbere ya Kiliziya Gatolika iri ku rwego rwo hejuru kuko igiye kuzura itwaye akayabo ka miliyari umunani z’amafaranga y’u Rwanda. Izindi Hotel nkiri muri Diyoseze ya Butare ndetse na Kibuye ziri ku rwego ruciriritse.”

Akomeza avuga ko igice kimwe cy’aya mafaranga ari inguzanyo bahawe na Banki y’Igihugu Itsura Amajyambere ‘BRD’, ikindi gice cyavuye mu mutungo wa Arikidiyosezi ya Kigali.

Ati “Ni Hotel igizwe n’ibice bitandukanye birimo ibyumba byo kuraramo bigera kuri 68, ibyumba by’inama bitandukanye birimo icyakira abantu bagera kuri 500. Harimo piscine (urwogero) igezweho, restaurant zitandukanye na Bar (urunywero) nziza cyane hamwe n’ibyumba bizakorerwamo ubucuruzi.”

“Nta kabyiniro, nta gakingirizo muri Hotel Ste Famille”

Mu gihe mu yandi mahoteli usanga bashyiramo udukingirizo mu rwego rwo kurinda abakiriya gukora imibonano mpuzabitsina idakingiye, muri Hotel Ste Famille ngo nta gakingirizo kazarangwamo.

Padiri Bernardin yakomeje agira ati “Hotel yacu ntabwo izaba ifite urubyiniro kubera ko buri muntu agira umurongo agenera ibikorwa bye, kandi iyi hotel ifite umurongo wayo, hari ibyo tugenera abakiriya bazaza badusanga hanyuma ibindi bakazabishaka ahandi [...] twebwe ntabwo tuzashyira udukingirizo muri Hotel yacu, kubera ko mu muco wa Kiliziya Gatolika ntabwo iyo ari serivisi dutanga. Inzoga zo zirahari kuko dufitemo Bar nziza cyane.”

Icyifuzo cy’uyu mupadiri ni uko Hotel Ste Famille abayigana bazaba ari inyangamugayo. Ati “Twifuza ko abantu bazagana iyi Hotel bazaba ari inyangamugayo, abantu bataza kuhakorera ibyaha, abantu baza bakeneye kuruhuka no gukora kandi ntibabangamire bagenzi babo.”

“Kuba Hotel ifatanye na Kiliziya y’Umuryango Mutagatifu hari icyo bivuze”

Padiri Bernardin avuga ko mu mateka y’Umujyi wa Kigali aho iyi Hotel yubatse ariho hantu hubatswe amacumbi bwa mbere, ibi rero ngo ni amateka akwiye gusigasirwa.

Yagize ati “Aha hahoze icyitwa ‘Procure de mission’ hari ahantu hagenewe kwakira abamisiyoneri kimwe n’abandi babaga bakora hirya no hino mu gihugu, ndetse na ba mukerarugendo. Ubu rero icyo twakoze ni uguhindura ayo macumbi tukahubaka inyubako igezweho ijyanye n’igishushanyo mbonera cy’Umujyi wa Kigali. Iyi Hotel ni iya mateka kandi na Kiliziya ya Ste Famille ni iy’amateka.”

Iyi hotel ya Kiliziya Gatolika ije nyuma yaho Itorero rya Pentekote mu Rwanda ritashye ku mugaragro Dove Hotel yubatswe ku Gisozi mu Karere ka Gasabo, yuzuye itwaye asaga miliyari esheshatu z’amafaranga y’u Rwanda.

Mu kwezi kwa Gatandatu nibwo byitezwe ko izafungurwa ku mugaragaro
Padiri Bernardin Banituze avuga ko aho yubatse ariho hubatswe amacumbi bwa mbere mu Mujyi wa Kigali
Ifatanye na Kiliziya y'Umuryango Mutagatifu
Izaba ifite piscine igezweho ndetse n'urunywero
Ni Hotel igizwe n’ibice bitandukanye birimo ibyumba byo kuraramo bigera kuri 68
Iyi hotel izuzura itwaye akayabo ka miliyari umunani z'amafaranga y'u Rwanda

Amafoto: Mahoro Luqman

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza