Kigali: Harigwa uburyo bwo gukemura ikibazo cy’amazi adahagije muri Afurika

Yanditswe na Ishimwe Israel
Kuya 22 Nzeri 2016 saa 10:58
Yasuwe :
0 0

Bimwe mu bihugu byo ku mugabane wa Afurika bikunze guhura n’ikibazo cyo kutagira mazi ahagije bitewe n’ubushobozi buke mu kuyafata ndetse no
kuyabyaza umusaruro ngo ahari atunganywe.

Mu nama y’iminsi itatu iteraniye i Kigali ihuje ibihugu bya Afurika bihuriye ku byogogo bibarizwa mu Muryango RAOB (Réseau Africain des Organismes de Bassins) harigwa uburyo bwo kunoza imicungire y’amazi, ibibazo by’imihindagurikire y’ikirere, imyuzure n’ibindi bituma abaturage batabona amazi neza.

Umuyobozi wungirije mu Ishami ribungabunga amazi mu Kigo cy’Umutungo Kamere mu Rwanda, Vincent de Paul Kabalisa, yavuze ko bari kureba uburyo bashyiraho ingamba zihamye, bagakemura ibibazo bijyanye n’amazi ndetse hakarebwa n’imishinga itandukanye yateza imbere ibi bihugu.

Yagize ati “Hari ibibazo by’imyuzure, kubura amazi, turi kubirebera hamwe kugira ngo dufate ingamba hanyuma bya byogogo turusheho kugenda tubibungabunga kandi nubwo ibibazo biba bihoraho ariko iyo abantu bishyize hamwe bagahuza imbaraga, birakemuka.”

Kabalisa avuga ko muri gahunda ya Leta y’u Rwanda buri wese agomba kugira amazi meza kandi akayabona adahenzwe bityo iyi nama akaba ari ingenzi.

Ati “Iyi nama ifite inyungu ku Rwanda, tuzumviramo uburyo bujyanye n’imicungire y’amazi, kuko ibibazo by’amazi ntabwo ari ibibazo bireba igihugu kimwe gusa, ahubwo biba birenze umupaka kuko hari imigezi ifata ku bihugu byinshi bikaba bigomba kurebera hamwe uko imigezi yabungabungwa ndetse n’ibiciro by’amazi hakigwa uburyo byagabanuka.”

Dr. EricTardieu uhagarariye RAOB yavuze ko bashishikajwe no kubungabunga amazi y’ibiyaga kugira ngo habeho imicungire myiza yayo.

Yagize ati “Kugira ngo habeho imicungire myiza y’amazi bisaba kumenya aho aherereye ndetse no guhanahana amakuru ku bihugu biyafite kugira ngo bigufashe kumenya ingano z’amazi mu migezi n’uburyo yakwitabwaho .”

Dr. Tardieu avuga ko imicungire y’amazi ijyana n’uburyo akoreshwa haba mu buhinzi ndetse no mu bindi bikorwa bya buri munsi kandi hakenewe ubukangurambaga kugira ngo ahari,uko ari kose akoreshwe neza.

Ibihugu bihuriye muri iyi nama y’iminsi itatu ni ibikora ku bibaya bya Sénégal, bya Nil, uyu muryango ukaba warashyizweho kugira ngo harebwe uburyo amazi yabungabungwa kandi agakoreshwa neza mu Banyafurika.

Bamwe mu bitabiriye inama
Abitabiriye iyi nama bari kwiga ku micungire y'amazi
Umuyobozi wungirije mu Ishami ribungabunga amazi mu Kigo cy’Umutungo Kamere, Vincent de Paul Kabalisa, yavuze ko hari byinshi u Rwanda ruzungukira muri iyi nama
Dr Eric Tardieu uhagarariye umuryango RAOB
Ifoto rusange y'abitabiriye inama y'umuryango w'ibihugu bikora ku byogogo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza