Kigali:Bakiranye yombi uburyo buzabafasha gutanga amakuru y’abana ku mashuri

Yanditswe na Jean Pierre Tuyisenge
Kuya 12 Ukwakira 2016 saa 08:09
Yasuwe :
0 0

Mu minsi yashize Ikigo “Smart Initiative”gikora ibijyanye n’ikoranabuhanga cyatangije porogaramu ya mudasobwa izajya ifasha umwarimu guha ababyeyi amakuru y’imimerere, imyitwarire n’imyigire y’abana ku mashuri bikohererezwa umubyeyi akabibona muri telefoni ye.

Ni gahunda yiswe “Smart parents” ikurikirana umwana mu buryo butandatu; burimo kumenya niba yitabiriye ishuri, igihe yagereye ku masomo, uko amerewe, isuku, n’uko agira uruhare mu ishuri.

Kuri uyu wa Gatatu tariki ya 12 Ukwakira 2016, Ikigo ‘Smart Initiative’ cyari mu ishuri ryisumbuye, Lycée Notre Dame de Citeaux cyereka abanyamakuru uburyo iyo gahunda yatangiye gukora n’uburyo ifasha abarimu n’ababyeyi.

Umuyobozi w’iki kigo Olivier Karasira yatangaje ko iyi gahunda bayitangije hagamijwe gukurikirana imyigire n’imyitwarire y’umunyeshuri ku ishuri, hakoreshejwe uburyo bw’ikoranabuhanga.

Yagize ati “ Iyi gahunda twayitangije nyuma yo kubona ko abana bata amashuri kubera kutabakurikirana, ubu rero biroroshye kuko ababyeyi bazajya babona amakuru y’uko abana babo bitwaye buri munsi kandi ku buryo bworoshye.”

Uhagaze Edouard ushinzwe amasomo muri Lycée Notre Dame de Citeaux, yavuze ko bayishimiye kuko igiye kubafasha mu kazi kabo ko kurera dore ko gasaba ubufatanye bw’abarezi, ababyeyi n’ubuyobozi.

Yagize ati“ Nubundi twajyaga tuvugana n’ababyeyi ariko ntabwo byihutaga nk’uko tubyifuza.Turabona iyi porogaramu ibyihutisha.”

Muri iyi porogaramu ngo Umwarimu ashobora gutanga amakuru y’abanyeshuri 30 mu minota itanu gusa akoresheje iri koranabuhanga.

Manirareba Casmir, umwarimu kuri iri shuri, yavuze ko iyi gahunda izabafasha gutanga amakuru y’abanyeshuri ku buryo bworoshye.

Yagize ati “ Nubundi twajyaga dukora raporo ya buri munsi ugasanga dukoresha impapuro zishobora no kwangirika, ubu rero bizatworohera kujya dukoresha uburyo bw’ikoranabuhanga, ndetse mu gihe gito nk’uko twabibonye.”

Batangiriye mu bigo byigenga ariko mu minsi iri imbere, ubuyobozi bw’iki kigo bukaba butangaza ko izaba yageze no mu bigo by’amashuri ya Leta.

Olivier Karasira, Umuyobozi mukuru wa Smart Initiative
Uhagaze Edouard ushinzwe amasomo muri Lycée Notre Dame de Citeaux
Manirareba Kazimiri ni Umwarimu kuri Lycée Notre Dame de Citeaux

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza