Kigali: Ba gitifu bahuguwe ku mikorere y’urubuga Irembo

Yanditswe na Ishimwe Israel
Kuya 3 Nzeri 2016 saa 10:13
Yasuwe :
0 0

Ba gitifu b’imirenge, abashinzwe irangamimere n’abashinzwe ubutaka bagize imirenge yose mu turere tugize Umujyi wa Kigali bari guhabwa amahugurwa ku mikorere y’urubuga Irembo rutangirwaho serivisi zitandukanye za Leta.

Aya mahugurwa y’iminsi ibiri yasojwe kuri uyu wa Gatanu, tariki 2 Nzeli 2016 yateguwe n’Ikigo Rwanda Online gifite mu nshingano zacyo urubuga rwa interineti ‘Irembo’ rutangirwaho serivisi za leta, agamije gufasha abayobozi kwihutisha serivisi kuko usanga hakiri abatarabisobanukirwa bagitinza abaturage kandi umuturage we yarujuje ibyo asabwa.

Umuhuzabikorwa w’Urubuga Irembo mu mujyi wa Kigali n’Uturere twa Kamonyi, Bugesera na Gicumbi, Robert Habimana yatangaje ko impamvu y’aya mahugurwa ari ukugira ngo nk’abantu bategerejweho gukora impinduka mu baturage be gutuma bakomeza kuvunika.

Ati “Hari aho ujya kureba ugasanga gitifu cyangwa undi wagombaga gutanga icyangombwa atarabikoze kandi umuturage ibye yarabirangije,ugasanga hari nk’ufite amadosiye arenga ibihumbi bitanu atarakoraho. Icyo gihe umuturage arakomeza akavunika ,agasiragira kandi yari kujya kwikorera indi mirimo yinjiriza igihugu.”

Yakomeje avuga ko gutanga serivisi nziza biri mu bituma abaturage babaho bishimye bityo ntawe ukwiye kubatesha imirimo yabo kandi ibyabo barabirangije.

Ku kibazo cya internet igenda buhoro cyagaragaye nk’ inzitizi ituma akazi kadindira, Habimana yavuze ko uturere twatangiye kugishakira umuti.

Ati “Uturere twemeye gukemura ikibazo cya internet, nko mu karere ka Kicukiro ubuyobozi bwahise bwemerera buri murenge 4G kugira ngo hato izo serivisi zidakomeza kudindira .”

Umunyamabanga Nshingwabikorwa w’Umurenge wa Gikondo muri Kicukiro, Nathan Kanyesigye umwe mu bahuguwe ku mikoreshereze y’urubuga Irembo yatangaje ko aya amahugurwa yatumye basobanukirwa kurushaho imikorere y’urubuga Irembo.

Ati “Byadufashije kuko hari n’abari bataratangira kubishishikariza abaturage kuko nabo batabyumva neza ariko ubu ni ukubagaragariza ko mu gukoresha Irembo ubona serivisi zitandukanye kandi udatakaje umwanya.”

Hubert Kiteretse ushinzwe irangamimerere mu murenge wa Nyarugunga we ati “Ubu buryo bw’ikoranabuhanga iyo bunogejwe nta kibazo kitakemuka kandi turabyishimira .Ikindi twungutse ni uko akarere kemeye ko muri buri murenge bagiye kuduha 4G, ubu ngubu nta kirarane kizajya kibaho kuko hari nubwo gukora raporo byatinzwaga na internet yabaga itagenda neza.”

Meya w’Akarere ka Kicukiro Dr Jeanne Nyirahabimana ati “Nk’akarere icyo tugomba gukora mu guteza imbere serivisi z’urubuga Irembo ni ugushyiraho ibikorwa remezo nka internet yihuse ku buryo ibyo umuturage yasabye bitarenza iminsi kuko haba hari iminsi yagenwe.”

Yavuze ko kuba serivisi zitangirwa kuri internet bizabafasha kugenzura abadakora uko bikwiriye bakabakebura nko nkureba igihe dosiye yaziye n’igihe ubuyobozi bwagiye busubiriza uwasabye.

Abagize imirenge y’akarere ka Kicukiro bahuguriwe ku biro by’akarere ,mu gihe abo mu karere ka Gasabo bahuguriwe ku murenge wa Kimihurura naho abagize imirenge ya Nyarugenge bahugurirwa ku biro byako karere.

Abayobozi bahuguwe basabwe kwihutisha serivisi
Robert Habimana ahugura abayobozi ku mikorere y'urubuga Irembo
Umunyamabanga Nshingwabikorwa w’Umurenge wa Gikondo, Nathan Kanyesigye
Umuhuzabikorwa w’Urubuga Irembo mu mujyi wa Kigali n’Uturere twa Kamonyi, Bugesera na Gicumbi, Robert Habimana ahugura abayobozi

tombola@igihe.com


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza