Kwamamaza

Kigali: Abazunguzayi bashimiye Perezida Kagame wabahaye umutsima, bamusaba n’imboga

Yanditswe kuya 3-09-2016 saa 22:02' na Emma-Marie Umurerwa


Abahoze bacururiza mu muhanda bazwi ku izina ry’abazunguzayi mu Mujyi wa Kigali, bashimiye Perezida Kagame wabahaye amasoko (bagereranya n’umutsima) bacururizamo bakanasonerwa imisoro mu gihe cy’umwaka, ariko kandi ngo babuze igishoro (bagereranya n’imboga).

Ubwo hatahwaga amasoko yubakiwe abahoze bakora ubucuruzi bwo mu muhanda mu Mujyi wa Kigali, kuri uyu wa Gatandatu tariki ya 3 Nzeli 2016, abazunguzayi bashimiye byimazeyo Perezida Kagame, wabakuye mu muhanda aho bicirwaga n’izuba bategereje abakiliya.

Nyirabambogo Marthe w’imyaka 65 y’amavuko, uzwi ku izina rya Nyirakuru w’abazunguzayi kubera igihe kirekire amaze acururiza mu muhanda, mu izina rya bagenzi be yagejeje ku bayobozi batandukanye barimo Minisitiri w’Uburinganire n’Iterambere ry’Umuryango ubutumwa bifuza ko bwagezwa kuri Perezida Kagame.

Yagize ati “Turashima cyane Perezida wa Repubulika kuko yadutekereje twari turi nk’inyeshyamba none tukaba twarabaye abantu. Nongeye kubatuma rwose ba nyakubahwa mutubwirire Perezida muti ntabwo tukirushya Polisi na Dasso, muti wabahaye umutsima utagira imboga. Dufite isoko ariko nta gishoro.”

Uwimana Béatha, wahoze acururiza mu muhanda yatangaje ko kutagira igishoro bibashyira mu gihombo gikabije.

Ati “Bagize neza badukura mu muhanda, ariko rwose nta gishoro dufite turi mu gihombo, kubera ko abasigaye mu muhanda nibo bakora twe tukirirwa twicaye. Twifuzaga ko badufasha bakatwunganira bakaduha igishoro kandi abakiri mu muhanda nabo bakabakuramo.”

Umuyobozi wa Polisi y’u Rwanda, IGP Emmanuel Gasana, ntiyemeranya n’abazunguzayi basaba imboga.

Yagize ati “N’ufasha hari aho ageze, isoko Leta iraryubatse, imisoro n’amahoro baragusoneye, batanze inkunga ishoboka yose baguhaye umutekano, ntako batagize kugira ngo nawe uhabwe agaciro, […]ukavuga uti ariko ndashaka n’imboga.”

IGP Gasana yakomeje avuga ko umutekano utabaho mu gihe hari akajagari, asaba abahoze ari abazunguzayi gufatanya na Polisi kwirindira umutekano, batangira amakuru ku gihe.

Abazunguzayi basonewe umusoro wa miliyoni zisaga 400

Umuyobozi w’Akarere ka Nyarugenge, Kayisime Nzaramba yavuze ko abahoze ari abazunguzayi bagera 8300, Leta yabasoneye umusoro n’amahoro.

Yagize ati “Mu Karere ka Nyarugenge habaruwe abazunguzayi bagera kuri 5058, hamwe n’abari mu Mujyi wa Kigali bubakiwe amasoko yo gucururizamo agera kuri 12. Bakuriweho imisoro n’amahoro ndetse n’ubukode mu gihe kingana n’umwaka kugira ngo babashe kwiteza imbere, kandi nabo mu tundi turere twa Nyarugenge na Gasabo bahawe amasoko nabo barasonewe.”

Minisitiri w’Uburinganire n’iterambere ry’Umuryango, Diane Gashumba, yavuze ko amasoko yubakiwe abazunguzayi ari igisubizo ku bibazo bitandukanye.

Yagize ati “Bakiri mu muhanda nta muntu wari ubazi, gahunda za Leta ntizabashaga kubageraho. Iri soko ryo mu Karere ka Nyarugenge ririmo abagore n’abagabo barenga 2000 ni igisubizo ku kibazo cy’akajagari n’umutekano wabo na bagenzi babo. Ntabwo ikibazo gikemutse burundu ariko ni intangiriro.”

Yakomeje avuga ko aba bahoze ari abazunguzayi babonye inkunga ikomeye ya Leta y’u Rwanda.

Ati “Umuntu ntashobora guhabwa ibintu byose, niba ubonye ubukode bw’ubuntu ugakurirwaho imisoro nawe ugomba gukora iyo bwabaga, turimo kubigisha kwigira no kwizigamira kugirango biteze imbere.”

Mu rwego rwo kurushaho kurwanya ubucuruzi bukorwa mu kajagari, Akarere ka Nyarugenge kashyizeho urwego rushinzwe irondo ry’isuku, rugizwe n’abantu 135 biyongera ku rwego rwa Dasso.

Izindi nkuru bifitanye isano:

- Abazunguzayi bagejeje amaganya n’agahinda kabo kuri leta ibasezeranya kubahoza

- Umuzunguzayi yakubitiwe muri gare ya Nyabugogo ahita apfa

- Abishe umuzunguzayi i Nyabugogo bakatiwe

Abahoze ari abazunguzayi bishimiye ko bahawe isoko
Abahoze bacururiza mu muhanda bubakiwe isoko
Minisitiri w’Uburinganire n’iterambere ry’Umuryango, Diane Gashumba aganira n'abanyamakuru
Bamwe mu bapolisi bakuru bitabiriye uyu muhango
Umuyobozi wa Polisi y’u Rwanda, IGP Emmanuel Gasana
Minisitiri w’Uburinganire n’iterambere ry’Umuryango, Diane Gashumba(ibumoso) n'Umuyobozi w’Akarere ka Nyarugenge, Kayisime Nzaramba
Bamwe mu bapolisi bakuru bitabiriye uyu muhango
Abashinzwe kugenzura isuku bazafatanya na Dasso kurwanya ubucuruzi bukorwa mu kajagari
Abahoze ari abazunguzayi bacinye akadiho
Abayobozi bitabiriye uyu muhango bacinya akadiho

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 Nzeri 2016
Copyright © 2009 -2014 - IGIHE Ltd - All Rights Reserved