Kigali: Abahinga mu bishanga batabibyaza umusaruro bashobora kubyamburwa

Yanditswe na Kanamugire Emmanuel
Kuya 1 Nzeri 2016 saa 05:30
Yasuwe :
0 0

Minisiteri y’Ubuhinzi n’Ubworozi yagaragaje ko ibishanga byo muri Kigali bitabyazwa umusaruro uko bikwiye ku buryo mu birenga icumi bihari biri ku buso bwa hegitari zirenga igihumbi, bitanga umusaruro ubarirwa hagati ya 30 na 70% gusa by’uwo bikwiye kuba bitanga.

Umunyamabanga wa Leta muri Minagri ushinzwe ubuhinzi,Tony Nsanganira, yavuze ko bagiye gukorana amasezerano n’abahinzi bakoresha ibyo bishanga agamije kongera umusaruro,ku buryo abatabashije kubona ukwiye bashobora kubyamburwa bigahabwa abandi babishoboye.

Hari kuri uyu wa Kane mu nama mpuzabikorwa ku buhinzi mu Mujyi wa Kigali, aho hagarutswe cyane ku ikoreshwa ry’ibishanga, imbogamizi zihari n’ibiri gukorwa kugira ngo birusheho kubyazwa umusaruro.

Mu bitabiriye iyo nama harimo abayobozi mu turere tugize Umujyi wa Kigali, abahagarariye amakoperative ahakorera ubuhinzi, abashinzwe ubuhinzi muri utu turere n’abandi batandukanye bafite aho bahuriye na bwo.

Nsanganira yagize ati “Turashaka kugirana amasezerano n’abahinzi aho bazagaragaza ibyo bagiye gukora mu mishinga yabo,hanyuma abananiwe kuyubahiriza ngo umusaruro uzamuke bakaba bashobora kwamburwa ibishanga bahingagamo bigahabwa abandi. Abenshi usanga nta masezerano bafitanye na Leta n’abayafite ibikorwa ntibitanga umusaruro uko bikwiye.”

Icyakora hari zimwe mu mbogamizi zagaragajwe zituma umusaruro wifuzwa utaboneka zirimo nk’ ikibazo cy’amazi menshi yangiza imyaka cyangwa akaba make ntabe ahagije, ibishanga bimwe bidatunganyije, ababikoramo ibindi bikorwa nko kuhacukura umucanga no kudahuza imikoreshereze y’ubutaka.

Gahutu Ignace wari uhagarariye koperative CORIKA ihinga umuceri mu gishanga cya Kabuye, yagize ati “ Kubera ko dukoresha ingomero za gakondo bitewe n’ubushozi buke, amazi yabaye makeya ndetse ubu hari hegitari zigera ku 150 tutarahinga kubera ikibazo cy’amazi. Mu gufata amazi dushinga ibiti tugashyiraho imifuka nta rugomero rukomeye dufite kuko ruba ruhenze ntitwarwikorera.”

Ku kijyanye n’amazi, Tony Nsanganira, yasabye inzego bireba zose kugeza muri Minisiteri y’Ibikorwaremezo kwicara zikareba icyakorwa mu kurinda ibishanga ku buryo imvura izagwa mu gihembwe cy’ihinga A itagira ibyo yangiza.

Yagize ati “Uturere dukwiye gufata iya mbere mu gufata amazi,abantu bicare barebe icyakorwa by’igihe gito ariko hanarebwe iby’igihe kirekire turebe ko imvura izagwa itagira ibyo yangiza.”

Yasabye abantu kongera imbaraga mu guhuza imikoreshereze y’ubutaka kugira ngo bakorere hamwe kandi no kubagezaho inyongeramusaruro byorohe mu gihe hitegurwa igihembwe cy’ihinga A.

Yagaragaje ko kugeza ubu ibishanga bitunganyije muri Kigali biri ku buso bwa hegitari 600, ibigera kuri hegitari 400 bikaba bitaratunganywa.Bimwe muri ibi bishanga bihingwamo imboga, umuceri, ibigori n’ibindi.

Intego ni uko aba bahinzi babona umusaruro uhaza abaturage mu gihugu ndetse bagasagurira n’amasoko yo hanze.

Meya w'Akarere ka Kicukiro, Dr Nyirahabimana Jeanne, Tony Nsanganira na Telesphore Ndabamenye Wungirije wa RAB
Umunyamabanga wa Leta ushinzw eubuhinzi n'Ubworozi, Tony Nsanganira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza