Kicukiro: Umwana w’imyaka ibiri yapfuye azize inkoni

Yanditswe na Uwishyaka Jean Louis
Kuya 18 Ukwakira 2016 saa 10:09
Yasuwe :
0 0

Umwana witwa Uwawe Agasaro Keilla, wari ufite imyaka ibiri n’igice, ku Cyumweru yakubitiwe kwa se, mu Mudugudu w’Indamutsa, Akagari ka Nyakabanda, Umurenge wa Niboye, mu Karere ka Kicukiro bimuviramo kwitaba Imana.

Uyu mwana wari usanzwe arerwa na nyina, mu Mudugudu wa Sano, Akagari ka Kimisagara, mu Murenge wa Kimisagara, ngo yahavuye agiye gusura se nkuko yari yabyifuje kandi ngo yari asanzwe ajyayo.

Gusa ngo mu kugera kwa se uyu mwana yaje gukubitwa n’umukobwa ubana na se, bimuviramo kwitaba Imana akigezwa ku ivuriro Polyfam riherereye ku Kisimenti.

Umubyeyi w’uyu mwana ukiri mu gahinda, yatubwiye ko uyu mwana yari yagiye gusura se tariki 5 Ukwakira 2016, akaba apfuye yari akiriyo.

Umukuru w’Umudugudu ubu bwicanyi bwabereyemo, Nuwanjye Olivier, yaduhamirije ko koko ibi byabaye atubwira ko bishoboka ko uyu mwana yishwe n’inkoni yakubiswe.

Yagize ati "Ni umwana se yari yamuzanye ngo amusure hanyuma aza kugira ikibazo, niba yarakubiswe, gusa muganga we yambwiye ko yakubiswe. Nta nubwo yari ahamaze iminsi myinshi, ashobora kuba yari ahamaze iminsi nk’itatu."

Nuwanjye avuga ko se w’umwana witwa Nuwe Elivis, ngo abana n’undi mukobwa badafitanye isano, gusa ngo ntibizwi niba ari umugore we. Uyu mukobwa rero ngo niwe bivugwa ko yakubise uyu mwana kugeza ashizemo umwuka.

Uyu muyobozi avuga ko uyu mwana atari ubwa mbere yari aje muri uru rugo kuko ngo bwari ubwa kabiri ahaza gusura se.

Umuvugizi wa polisi mu Mujyi wa Kigali, Spt Emmanuel Hitayezu, yabwiye IGIHE ko se w’uyu mwana ndetse n’umukobwa babana batawe muri yombi, bakaba bafungiwe kuri sitasiyo ya polisi ya Kicukiro mu gihe hagikorwa iperereza ku mvano y’uru rupfu.

Ati "Aya makuru yamenyekanye ku itariki ya 16 Ukwakira 2016 mu gihe cya saa kumi n’ebyiri, ko umwana witwa Agahozo Keilla yapfuye, ariko muri uko kumenyeshwa ko yapfuye twatangiye iperereza ubwo umurambo twawujyanye ku bitaro bya Kacyiru kugira ngo turebe icyaba cyishe uwo mwana kubera ko hari abavugaga ko uwo mwana yari amaze iminsi akubitwa n’umukobwa ubana na se tutari twamenya niba ari umugore we byemewe n’amategeko cyangwa niba ari umukozi umukorera.

Muri uko gukora iperereza habayeho guta muri yombi abo bakekwa, ari uwo mukobwa ndetse na se w’umwana, ubu bafungiye kuri sitasiyo ya polisi ya Kicukiro, iperereza riracyakorwa kugira ngo babashe kutugaragariza icyaba cyatumye uriya mwana yitaba Imana."

Spt Hitayezu kandi yatubwiye ko bitewe n’ubuhamya bahabwa, ngo aba bombi bakurikiranyweho icyaha cyo gukubita no gukoretsa byateye urupfu, ariko ko bitewe n’uko iperereza rigikomeza, ngo birashoboka ko iki cyaha cyahinduka.

Yasabye abantu bose kujya bubahiriza uburenganzira bw’umwana, bamurinda ihohoterwa iryo ari ryo ryose. Yasabye kandi kujya bihutira gutanga amakuru y’aho uburenganzira bw’umwana bubangamiwe kugira ngo ababishinzwe babashe kumutabara hakiri kare.

Nyakwigendera we yashyinguwe kuri uyu wa Kabiri tariki 18 Ukwakira 2016.

Biravugwa ko Keilla yakubiswe n'umukobwa ubana na se

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza