00:00:00 IGIHE NETWORK KN KINYARWANDA EN ENGLISH FR FRANCAIS

Kicukiro: Batatu bafashwe bakekwaho kwiba televiziyo muri ‘Motel’ bakoreraga

Yanditswe na Tuyishimire Raymond
Kuya 6 Gicurasi 2021 saa 03:28
Yasuwe :
0 0

Polisi y’Igihugu kuri uyu wa Kane tariki ya 6 Gicurasi 2021,yeretse itangazamakuru abagabo batatu bakekwaho kwiba televiziyo eshatu muri Motel Auberge St Jean Léopold iherereye mu Karere ka Kicukiro.

Aba bagabo bafashwe kuwa 3 Gicurasi 2021,bafatiwe mu Karere ka Gasabo mu Mujyi wa Kigali nyuma yo kwiba aho bari basanzwe bakorera.

Umwe mu bafashwe yabwiye itangazamakuru ko bapanze uwo mugambi ndetse ukanozwa hanyuma bashaka umukiliya abishyura 65000Frw. Yavuze ko we yafashaga bagenzi be bakamuha aya komisiyo angana 5000Frw bajya no kumugurira icyo kunywa.

Ngo bari bamwijeje ko hari indi televiziyo nini yo muri iyo motel bagiye kugurisha kandi nayo bazamuha komisiyo.

Gusa mu gihe bari bagishaka umukiliya, baguwe gitumo na Polisi, abarangira aho bayigurishije.

Ati “Nagiye kubona mbona baraje nibwo bahise badufata, bakimara kudufata nahise mbabwira ko televiziyo yagurishijwe n’uwo wayigurishije arahari. Na we bahita bamuzana na televiziyo barayizana”.

Uwari ushinzwe kurinda umutekano w’iyo motel, yavuze ko amaze imyaka ine ahakora uburinzi. Yavuze ko yagize uburangare nk’umuntu wari ushinzwe kuharinda gusa ko atemera uruhare rwe mu kwiba nkuko bagenzi be babimushinja.

Yavuze ko na we amakuru yo kwibwa yayabwiwe n’uwari ushinzwe gukora amasuku ndetse ko yatunguwe abonye byabaye.

Ati “Umwana wozaga ibyombo no gukora amasuku aho abakiriya bicara niwe wavuze ati ese ya televiziyo bayimuriye hehe ko mbona nta yihari,? Mu gihe ngiye kubwira mabuja, ahita ambwira ngo na ya yindi yari hariya nta yihari, mpita mvuga ngo ibyanjye birarangiye”.

Yavuze ko yahise amenyesha umukoresha ko bamaze kwibwa , na we yemera ko yagize uburangare kuko yibwe yasinziriye.

Bwanakeye François wari wibwe yavuze ko akimara kwibwa yahise amenyesha Urwego rw’Ubugenzacyaha ndetse na Polisi , bamufasha gushaka abibye.

Yashimiye inzego z’umutekano ndetse n’iz’ibanze uburyo zakoranye zikihutira kugarura ibyibwe

Umuvugizi wa Polisi y’Igihugu, CP John Bosco Kabera, yasabye abantu gukura amaboko mu mufuka bakareka kwiba, bagashaka ikindi bakora.

Ati “ Tuba tubwira abana b’urubyiruko gushaka ikindi bakora, bagakura amaboko mu mufuka bakareka kwiba kuko kwiba birababuza amahirwe menshi cyane y’ibyo bakagezeho mu buzima bwabo”.

Yavuze ko Polisi itazarambirwa kwereka itangazamakuru abiba iby’abandi mu rwego rwo guca ubujura.

Aba nibaramuka bahamijwe ibyaha bazafungwa igihe kitari munsi y’umwaka umwe ariko kitarenze imyaka ibiri n’ihazabu y’amafaranga y’u Rwanda atari munsi ya miliyoni imwe ariko atarenze miliyoni ebyiri.

Aba bafashwe nyuma yo kwiba uwo bari basanzwe bakorera muri motel imwe muri Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .