Kwamamaza

Kicukiro igiye guhozwa amarira yo kubura amazi

Yanditswe kuya 19-09-2016 saa 15:22' na Hagengimana Philbert


Mu nama y’Inteko rusange ya FPR-Inkotanyi mu Murenge wa Kigarama ho mu Karere ka Kicukiro, abanyamuryango bamurikiwe bimwe mu bikorwa byimirijwe imbere mu ngengo y’imari y’uyu mwaka wa 2016/2017, aho izasiga buri muturage wo mu Karere afite amazi meza, hakanahangwa imihanda.

Muri iyo nama y’Inteko rusange, Umuyobozi w’Umujyi wa Kigali wungirije ushinzwe Imibereho myiza y’abaturage, Judith Kazayire, yibukije Abanyamuryango ba FPR-Inkotanyi ko mu mihigo y’Akarere ka Kicukiro harimo ko uyu mwaka uzarangira buri muturage wese afite amazi.

Ati “Hari umushinga wo kwagura imiyoboro y’amazi ku bufatanye na WASAC ndetse n’Umushinga witwa ‘Water for People’, ‘Amazi kuri bose’, ku buryo rwose dufite icyizere cy’uko uriya mwaka uzajya kurangira akarere kose gafite amazi, biri mu mihigo kandi tuzakora ibishoboka byose tubigereho ariko by’umwihariko nk’abanyamuryango, natwe twabigiramo uruhare maze ikibazo cy’amazi kigakemuka.”

Ruhurura imwe mu Mujyi wa Kigali

Nk’uko Judith Kazayire yakomeje abigaragariza abo banyamuryango, ikibazo cya ruhurura mu Mujyi kirazwi, ariko ikigaragara cyo ntikiri mu bigomba gukemurwa vuba dore ko muri uyu mwaka w’imihigo hazubakwa imwe yonyine.

Ati “Ikibazo cya ruhurura si mu Murenge wa Kigarama kiri gusa, ariko mu by’ukuri mu rwego rw’Umujyi wa Kigali hari za ruhurura nyinshi zikeneye kubakwa, tukaba duteganya kujya twubaka izigera kuri eshatu mu mwaka, ariko muzi ko kuzubaka bihenze, ariko kandi ubu hari gukorwa inyigo, …uyu mwaka turateganya kubaka ruhurura imwe mu karere ka Nyarugenge, ariko nabizeza ko n’iziri muri uyu murenge wacu na zo zizagerwaho.”

Yakomeje asaba ko mu butore abo banyamuryango basanganywe, bajya bishakira ibisubizo igihe ibirambye bitaraboneka, bagakora umuganda, bareba ibikenewe byose byakwitabwaho kugira ngo ruhurura zitaba imbogamizi ku buzima bw’abaturage.

Hazahangwa imihanda mishya

Muri gahunda y’ibikorwa by’Umujyi wa Kigali harimo guhanga imihanda no gusana ihasanzwe yashaje. Muri iyo mishya hakaba harimo n’izatuma uduce tw’icyaro duhahirana byoroshye n’utwo mu Mujyi mu Karere ka Kicukiro n’utundi bituranye.

Kazayire ati “Hari umushinga dufite mu Mujyi wa Kigali witwa ‘Ibirometero 54’, bikazubakwa n’abashinwa, ndetse amakuru meza ku murenge wa Kigarama ni uko hari imihanda itatu igomba kububakirwa. Imihanda ya kaburimbo, hari uzava Nyamirambo ugaca mu Miduha, ukazamuka muri Kariyeri-Rebero ukagera i Nyanza. Hari undi uzaturuka ku wa Cercle Sportif mu Rugunga, ukazatambika ugahura n’uwo mu Cyumbati.”

Yakomeje avuga n’indi mihanda yafunguwe mu Kagari k’Akarugira na Kigarama izatunganywa ikubakirwa n’imiyoboro y’amazi, ndetse hagahangwa n’indi mu Kagari ka Bwerankori.

Umunyamabanga Nshingwabikorwa w’Umurenge wa Kigarama, Mugabo Alexis yatangarije IGIHE ko mu mwaka w’ingengo y’imari washize, ku bufatanye n’abaturage, babashije gutunganya imihanda ihuza utugari, bagakusanya n’amafaranga yifashishijwe mu gusana iyangiritse.

Ati “Abaturage bakusanyije amafaranga yo korozanya muri gahunda ya Girinka, ahaguzwe inka 10 zatanzwe mu tugari dutandukanye.”

Yakomeje atangaza ko abaturage baniyubakiye ibiro by’utugari bigezweho by’amagorofa, aho yatanze urugero rw’Akagari ka Bwerankori n’aka Kigarama, byatangiye kubakwa mu mwaka washize, aho byitezwe kuzuzwa muri uyu mwaka.

Umurenge wa Kigarama ugizwe n’utugari dutanu, tubiri tukaba ari two tutarubakirwa ibiro, ak’Akarugira ko kakaba gasigaje kubakirwa inzu mberabyombi, ibikorwa byose bigirwamo uruhare n’abaturage b’uwo murenge.

Umuyobozi w’Umujyi wa Kigali wungirije ushinzwe Imibereho myiza y’abaturage, Judith Kazayire
Umunyamabanga Nshingwabikorwa w’Umurenge wa Kigarama, Mugabo Alexis
Abanyamuryango bitabiriye inteko rusange ya FPR-Inkotanyi mu Murenge wa Kigarama

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved