Kicukiro:ACP Basabose yasobanuriye urubyiruko bimwe mu biranga ubuhezanguni

Yanditswe na Kanamugire Emmanuel
Kuya 17 Nzeri 2016 saa 06:41
Yasuwe : XX
0

Umuyobozi w’ishami rya Polisi rishinzwe kurwanya iterabwoba, ACP Denis Basabose yasobanuriye urubyiruko bimwe mu bishobora kurwereka ko abantu bafite amatwara n’imyitwarire ya gihezanguni, kugira ngo na rwo rufashe mu rugamba rwo kubarwanya.

Kurwanya ubuhezanguni no kwirinda ibiyobyabwenge ni ibiganiro bibiri by’ingenzi byahawe urubyiruko rushamikiye kuri FPR Inkotanyi ku rwego rw’Akarere ka Kicukiro, mu nteko rusange yarwo yaruhuje ku wa Gatandatu tariki ya 17 Nzeri 2016.

ACP Basabose yabasobanuriye ko ubuhezanguni ari imyitwarire iranga abagambiriye guhungabanya umutekano yagiye inavumburwa kuri bamwe mu Banyarwanda, bagamije kujya mu mitwe y’iterabwoba ababwira ko bikwiye kuruhagurutsa mu gihe abafashwe biganjemo urubyiruko.

Asobanura bimwe mu biranga ubuhezanguni,ACP Basabose yagize ati “Birimo kwambara nikab [umwambaro usigaza amaso gusa,ku bagore n’abakobwa],abahungu bagatereka ubwanwa n’ibindi birimo kwambara amapantalo acitse n’ibitambaro mu mutwe bimeze nk’ibyambarwaga na Ossama Bin Laden, wari umuyobozi w’Umutwe w’iterabwoba wa Al Qaeda wishwe na Amerika.”

Usanga ngo barangwa n’agasuzuguro ku bantu bose bita abakafiri, bigatuma n’iyo babajijwe amakuru batayatanga bakaba ntawe basuhuza, ndetse n’ababyeyi babo ntibanarebera izuba kuko bemera ko buri wese azibarizwa ibyo yakoze, bakagaragara ahabona mu ijoro, kuko ku manywa birirwa bahabwa inyigisho z’ubuhezanguni.

Nk’uko uyu muyobozi yakomeje abivuga, bumva buri wese utemera kimwe na bo bamwica ngo basukure Isi, ubundi bazigire mu ijuru aho imana izabaha abagore beza.

Ati “Bemera ko igitonyanga cy’amaraso yabo kigwa hasi,roho yabo yamaze kugera mu ijuru.”

ACP Basabose yababwiye ko abenshi bafatwa ari urubyiruko rurimo n’urufite imyaka iri munsi ya 20.

Yasabye urwo rubyiruko guhaguruka mu gihe babonye amakuru afitanye isano n’abajya muri iyo mitwe bagahita bayatanga.

Urubyiruko rwanzuye guhagurukira gutanga amakuru ku gihe no guhugura bagenzi babo bifashishije imbuga nkoranyambaga bahuriraho, kuko ibikorwa by’iterabwoba nta we birobanura, kandi ko byahungabanya umutekano waruhije Abanyarwanda kugira ngo bawugereho.

ACP Basabose asobanura bimwe mu biranga ubuhezanguni

Umuyobozi wungirije w’urwo rubyiruko mu karere ka Kicukiro, Niyonshuti Kelly Christophe yavuze ko ubutumwa bahawe bagiye kuzabusangiza urubyiruko rwose rwo muri ako karere.

Ati “Kubusakaza biroroshye kuko haba inteko rusange y’urubyiruko guhera mu mudugudu, kubageraho biba byoroshye, kandi twiyemeje kuzabubagezaho ngo tubikumire mbere y’uko biba.”

Yasabye urubyiruko guhugira mu bikorwa byiza bituma batera imbere, aho kujya mu bituma bikururira ibyago.

Urwo rubyiruko kandi rwasobanuriwe ibijyanye n’ibiyobyabwenge n’uko rukwiye kubirwanya kuko abo byasaritse usanga babera umutwaro igihugu aho kukibera igisubizo.

Bamwe mu rubyiruko bari bitabiriye ibi biganiro
Urubyiruko rwiyemeje gusigasira ibyagezweho
Abayobozi b'urubyiruko mu Karere ka Kicukiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza