Kicukiro: Abagore 500 bahuguwe gukoresha mudasobwa

Yanditswe na David Eugène Marshall
Kuya 30 Gicurasi 2018 saa 09:52
Yasuwe :
0 0

Akarere ka Kicukiro katanze impamyabumenyi ku bagore 500 baturutse mu mirenge 10 ikagize, basoje amahugurwa yo gukoresha za mudasobwa.

Umuhuzabikorwa w’Inama y’Igihugu y’Abagore mu Mujyi wa Kigali, Umuhoza Aurore, yabwiye IGIHE ko aho Isi igeze ibikorwa hafi ya byose byifashisha ikoranabuhanga ko rero umugore atasigara inyuma muri ubwo bumenyi kandi ari we mutima w’urugo.

Yagize ati “Abenshi muri bo nta mirimo bagiraga, bagiye kubasha kwihangira imirimo, ikoranabuhanga kandi rizabafasha kwamamaza ibyo bazakora, kandi muzi ko ibintu byinshi muri iki gihe, mu buzima busanzwe bikenera ikoranabuhanga; nko gufasha abaturage kwishyura ubwisungane mu kwivuza, kwishyura imisoro hifashishijwe Irembo n’ibindi, kumenya uko iteganyagihe rihagaze, kwivuza hifashishijwe telefoni zigendanwa n’ibindi byose bikenera iryo koranabuhanga.”

Mujawamariya Spéciose wo mu Murenge wa Niboye, yavuze ko amahugurwa azamufasha kumenyekanisha ibikorwa ahuriyemo na bagenzi mu itsinda ‘Gira Amahoro’ rikora ibijyanye no kuboha inigi n’imitako kuko yamenye gukoresha internet, akajya abishyira ku mbuga nkoranyambaga.

Yanavuze ko amahugurwa bahawe azanabateza imbere mu mibanire n’abo bashakanye, bagahugura abagabo babo.

Muheto Jackson uhagarariye Umuryango Better Future for Generation wateye inkunga ibi bikorwa, yavuze ko kimwe mu byahagurukije Akarere n’umuryango ahagarariye ari uko ubusanzwe byagiye bigaragara ko abagore rimwe na rimwe bajyaga batinya iby’ikoranabuhanga kandi rikenewe.

Yagize ati “Twasanze kugira ngo tujyere ku iterambere rihamye, hakenewe gukoresha ikoranabuhanga mu bucuruzi abagore bakora ndetse no mu turimo twabo twa buri munsi dukenera ICT.”

Yakomeje avuga ko abagore bagira uruhare mu kwishyura ubwisungane mu kwivuza bw’imiryango babereye ba mutima w’urugo.

Umugore wihangiye umurimo kandi ngo azakenera kwishyura imisoro yifashishije ikoranabuhanga.

Umuyobozi w’Akarere wungirije Ushinzwe Iterambere ry’Ubukungu muri Kicukiro, Mukunde Angélique, yabwiye abagore bari aho ko akarere kazabashyigikira mu bikorwa byose, abakangurira kuzishyira hamwe mu makoperative, bagahanga uturimo tubazanira inyungu, nka serivisi z’Irembo, abadozi bakajya bareba imideli igezweho n’ahandi ku Isi.

Ibikorwa nk’ibi kandi ngo bizakomeza no mu minsi iri imbere, aho bizanibanda mu guhuriza hamwe abagabo n’abagore bakigishirizwa hamwe, mu rwego rwo kugendera mu murongo w’iterambere igihugu kigamije nta n’umwe usigaye inyuma.

Amahugurwa yatanzwe mu gihe cy’amezi ane, aho buri tsinda ry’abagore 15 ryahabwaga amahugurwa yo gukoresha mudasobwa na internet iminsi itanu kugeza uyu mubare wuzuye, nk’uko byari mu muhigo w’Umwaka wa 2017-2018 w’Akarere ka Kicukiro.

Abagore bigishijwe gukoresha mudasobwa, basaba serivisi z'Irembo zitangirwaho bimwe mu byangombwa hifashishijwe ikoranabuhanga
Abagore 500 bahuguwe gukoresha mudasobwa muri Kicukiro

Umuyobozi w’Akarere wungirije Ushinzwe Iterambere ry’Ubukungu muri Kicukiro, Mukunde Angélique

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza