Perezida Kagame yitabiriye inama yiga ku buhinzi ibera muri Kenya

Yanditswe na Kanamugire Emmanuel
Kuya 7 Nzeri 2016 saa 12:03
Yasuwe : XX
0

Muri iki gitondo Perezida Kagame yasesekaye i Nairobi muri Kenya aho yitabiriye inama yiga ku buhinzi muri Afurika ‘African Green Revolution Forum’, itegerejwemo abanyacyubahiro benshi barimo n’umuherwe wa mbere ku Isi Bill Gates.

Ni ku nshuro ya gatandatu inama nk’iyi ibaye ikaba ihuriza hamwe abantu barenga 1500 biga ku ngamba zo guteza imbere ubuhinzi muri Afurika no kubushoramo imari, kugira ngo bukomeze kuzanira imibereho myiza miliyoni z’abahinzi n’abandi batunzwe na bwo kuri uyu mugabane.

Abitabiriye iyi nama yatangiye kuwa 5-9 Nzeli 2016, ni amahirwe babonye yo guhura ngo baganire, basangire ibitekerezo ku mpinduka zakorwa mu buhinzi.

Raporo ku miterere y’ubuhinzi yakozwe na AGRA, igaragaza ko kuva mu 2005 mu bihugu bya Afurika umusaruro ukomoka ku buhinzi wiyongereye bikagabanya ubukene muri Ghana,u Rwanda, Ethiopia na Burkina Faso.

Izi mpinduka ahanini ngo zabaye mu bihugu byubahirije gahunda y’Umuryango wa Afurika yunze Ubumwe CAADP igamije guhamagarira za Guverinoma gushyira 10% by’ingengo y’imari zazo mu buhinzi no kubuteza imbere nibura 6% buri mwaka.

Perezida Kagame aritabira iyi nama kuri uyu wa Gatatu, ku munsi w’ejo yerekeze i Dar es Salaam muri Tanzania mu nama idasanzwe y’abakuru b’ibihugu bigize Umuryango wa Afurika y’Iburasirazuba, EAC.

Mu bandi banyacyubahiro bategerejwe muri iyi nama harimo, umuherwe Bill Gates, John A Kufuor wahoze ayobora Ghana, Perezida Muhammadu Buhari wa Nigeria, John Dramani Mahama uyobora Ghana, Perezida Museveni wa Uganda, Dr. Akinwumi Adesina uyobora Banki Nyafurika itsura amajyambere n’abandi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE