Kwamamaza

Kenya: Perezida Kagame yasabye ibihugu kubyaza umusaruro ubushobozi byifitemo

Yanditswe kuya 1-09-2016 saa 08:30' na IGIHE


Perezida Paul Kagame kuva kuwa Gatanu ari muri Kenya aho yitabiriye inama mpuzamahanga ya Tokyo yiga ku iterambere rya Afurika, ‘Tokyo International Conference on African Development, TICADVI, inama isozwa kuri iki Cyumweru tariki 27 Kanama.

Perezida Kagame ni umwe mu batanze ikiganiro hamwe na Ellen Johnson Sirleaf wa Liberia, Olusegun Obasanjo wigeze kuyobora Nigeria, Akinwumi Adesina uyobora Banki Nyafurika Itsura Amajyambere na Joseph Stiglitz, Umunyamerika w’umuhanga mu bukungu akaba n’Umwarimu muri Kaminuza ya Columbia.

Abakuru b’ibihugu muri iyi nama barahuriza ku ntego ibihugu by’uyu mugabane bisangiye, irimo gukoresha neza ubushobozi ibihugu bifite aho gukomeza gutegereza gutungwa n’imfashanyo.

Perezida Kagame yavuze ko politiki nziza igomba guhera mu bihugu imbere, bigakoresha ubushobozi bifite byifashishije n’ibyo bikura ahandi.

Ati “Mu Rwanda duhera ku byacu tukabihuza n’ibyo twigira ahandi ariko bishobora gukora mu buryo bwacu.”

Perezida Kagame yavuze ko kimwe no muri Demokarasi, ibiba ahandi bitavuga ko ari byo bikora ku mugabane wa Afurika, asaba ko ibihugu bireba ibyo abandi bakora, bikabihuza n’indangagaciro bifite hagendewe ku cyo ibi bihugu bikeneye.

Iyi nama itegerejwemo ko abakuru b’ibihugu bashyira umukono ku masezerano n’u Buyapani mu mishinga itandukanye. Perezida Uhuru Kenyatta wa Kenya yavuze ko umugabane wa Afurika ukeneye gutera indi ntambwe.

Ati “Turifuza guhindura ubukungu bwacu bukava ku gutanga ibintu byifashishwa mu gukora ibindi bikoresho, bukagera mu gutanga ku isoko ibikoresho byuzuye.’’

Perezida wa Ghana, John Dramani Mahama, yavuze ko igihe kigeze kugirango umugabane wa Afurika uve mu bihe byo gutegereza inkunga ahubwo ushyire imbaraga mu bucuruzi.

Mahama yavuze ko guverinoma y’u Buyapani ikwiye no kureba uko bimwe mu bikorwa birimo gukora ibikoresho bitandukanye by’ikoranabuhanga harimo n’imodoka, byazanwa ku mugabane wa Afurika.

Ati “Turashaka gukorana ku bijyanye n’ivugururwa ry’amategeko kugira ngo dukurure abashoramari benshi b’Abayapani ku mugabane wacu.”

Ubufatanye bushya bw’u Buyapani na Afurika

Minisitiri w’Intebe w’u Buyapani Shinzo Abe, kuri uyu wa Gatandatu nibwo yatangarije abitabiriye TICAD VI ko igihugu cye kigiye gushora miliyari 30$ muri Afurika, mu myaka itatu iri imbere.

Guhera muri uyu mwaka, u Buyapani buzashora miliyari 10$ mu iterambere ry’ibikorwa remezo, rikibanda ahanini ku ngufu z’amashanyarazi, ubwikorezi bwo mu mijyi, imihanda n’ibiraro, naho izindi miliyari 20$ zizanyuzwa mu ishoramari ry’abikorera b’Abayapani muri Afurika.

Umunyamabanga wa Leta muri Minisiteri y’Imari n’Igenamigambi, ushinzwe igenamigambi Dr.Uzziel Ndagijimana, yabwiye abitabiriye iyi nama ko ayo mafaranga yakoreshwa nko mu gufasha ibihugu bya Afurika y’u Burasirazuba, EAC, muri gahunda yo kwishyira hamwe.

Ati “Kwishyira hamwe nk’ibihugu nibwo buryo dushobora gukoresha mu kwagura isoko ryacu muri Afurika, ni nabwo twakoresha mu guteza imbere ubucuruzi hagati muri Afurika, ishoramari no kugabanya igiciro bidufata mu gukora ibintu bitandukanye no kubikwirakwiza.”

“Icyo nasaba ni uko ikigega twagejejweho ejo na Minisitiri w’Intebe w’u Buyapani, cyakwita cyane ku mishinga y’ibikorwa remezo mu karere, nk’imihanda ya gari ya moshi, imihanda isanzwe n’imirongo y’amashanyarazi, ibi bikazafasha mu kwihutisha gahunda yo kwishyira hamwe kw’ibihugu muri Afurika.”

Iyi nama yitabiriwe n’abakuru b’ibihugu na za guverinoma bagera kuri 34, hamwe n’abandi bayobozi bakomeye mu nzego zinyuranye ku Isi. Inama ya gatanu ya TICAD ari nayo iheruka yabereye Yokohama mu Buyapani.

Perezida Kagame yasabye ibihugu kubyaza umusaruro ubushobozi byifitemo
Olusegun Obasanjo wigeze kuyobora Nigeria
Minisitiri w’Intebe w’u Buyapani,Shinzo Abe

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved