00:00:00 IGIHE NETWORK KN KINYARWANDA EN ENGLISH FR FRANCAIS

Kenya: Birakekwa ko hatangwa imibare mike y’abahitanwe na Covid-19

Yanditswe na Muhonzire Sylvine
Kuya 18 Kanama 2021 saa 04:59
Yasuwe :
0 0

Imibare y’abahitanwa na Covid-19 itangwa na Minisiteri y’Ubuzima muri Kenya birakekwa ko ari mike ugereranyije n’umubare nyawo kuko hari abahitanwa n’iki cyorezo ibipimo bafashwe bitaraza, abandi bagapfira mu rugo leta ntimenye ko bishwe na Coronavirus.

Ibi ngo biterwa ahanini no kudakurikirana neza abarwariye Covid-19 mu rugo, gutinda gutanga ibisubizo by’abapimwe Coronavirus ndetse n’uburyo buhenze bwashyizweho na leta bwo gushyingura abahitanwe n’iki cyorezo.

Minisiteri y’Ubuzima muri iki gihugu yagaragaje ko kuwa 17 Kanama 2021 muri Kenya handuye abantu 1.488 mu bantu 9.773 bari bapimwe n’igipimo cy’ubwandu kiri kuri 15.2%.

Nubwo bigaragara ko hari ubwandu bwinshi uwo munsi iyi ministeri yagaragaje ko abantu 4 aribo bahitanwe na Covid-19, mu gihe umunsi wawubanjirije hari hapfuye 10.

Umwe mu baturage baganiriye na Africa Nation yagize ati “Umuvandimwe wanjye yishwe n’ingaruka za Covid-19 mu cyumweru gishize, ariko kubera ko amafaranga yose twayamariye mu miti, twahisemo gusukura umurambo mu buryo busanzwe ubundi turamushyingura.”

Umukozi ukora mu buruhukiro bw’ibitaro bya “Mukumu Mission” avuga ko amafaranga asabwa kugira ngo umuntu wishwe na Covid-19 ashyingurwe atera ubwoba abantu.

Ati “Haherutse gutangazwa ko imirambo [yabishwe na Covid-29] igomba gufatwa kuwa Gatanu guhera saa kumi n’ebyiri za mu gitondo kugeza saa yine z’amanywa kandi igashyingurwa mu masaha 72. Abantu bamwe ntibabona amafaranga mu gihe gito nk’uko biba byasabwe ahubwo bahitamo uburyo buboroheye bwo guhangana n’ikibazo cyabo.”

Umuganga ukorera ahitwa Machakos yavuze ko ikibazo gikomeye ari uko leta idakurikirana neza abarwariye mu rugo, ntipime abantu Covid-19 ndetse n’abapimwe bakabona ibipimo bitinze bamwe bagapfira no mu rugo batanditswe.

Ati “Hari abaturage bicwa na Coronavirus mbere y’uko ibipimo byabo biboneka. Bivuze ko imibare yabo itandikwa mu y’abahitanwe na Covid-19.”

Ministeri y’ubuzima muri iki gihugu yemera ko iki kibazo gihari, aho ivuga ko giterwa n’amavuriro n’ibitaro bidatanga imibare y’abahitanwe n’iki cyorezo, kuko hari ubwo umuntu apfira mu rugo bakora ikizamini cy’icyamwishe [autopsy] bagasanga yishwe na Coronavirus ntibabitangaze, cyo kimwe n’abajyana b’ubuzima badatanga imibare muri Ministeri.

Muri Kenya hamaze kwandura abantu 222.894, abakize ni 205.912 mu gihe abamaze guhitanwa n’iyi ndwara ari 4.354.

Abantu benshi bicwa na Covid-19 muri Kenya bivugwa ko badatangazwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .