00:00:00 IGIHE NETWORK KN KINYARWANDA EN ENGLISH FR FRANCAIS

Inzozi za Iyamuremye uri kubaka urubuga ruzahugura abarimu ku ikoreshwa ry’ikoranabuhanga

Yanditswe na Hakizimana Jean Paul
Kuya 30 Nzeri 2021 saa 12:59
Yasuwe :
0 0

Iyamuremye Eric wigisha mu Murenge wa Nyamirama mu Karere ka Kayonza, ari kubaka urubuga rwitezweho kuzafasha abandi barimu gukarishya ubumenyi mu ikoranabuhanga, kugira ngo barusheho gutanga ubumenyi bugezweho.

Uyu mwarimu wigisha mu Rwunge rw’Amashuri rwa Nyamirama, avuga ko igitekerezo cyo kwigisha abarimu bagenzi be yakigize amaze kubona icyuho mu bumenyi bw’ikorabuhanga, ahitamo gushyiraho urubuga azajya yifashisha mu kwigisha bagenzi be.

Yavuze ko Leta iri gushyira imbaraga mu kugeza mudasobwa ku mashuri menshi, ndetse Ikigo cy’Igihugu cy’Uburezi, REB, gihugura abarimu mu buryo buhoraho kugira ngo bamenye gukoresha izo mudasobwa, ariko kenshi usanga umubare w’abahugurwa ari muke ugereranyije n’abakeneye ubumenyi.

Iyamuremye wahuguwe na REB ku ikoreshwa ry’ikoranabuhanga, ariko akaba yari asanganywe ubumenyi mu bijyanye na mudasobwa, yabonye uburyo abarimu bagenzi bagira ingorane zo gukoresha izo mudasobwa, ahitamo gushyiraho uburyo azajya abafasha mu gihe bategereje amahugurwa yisumbuye ashobora gutangwa na REB.

Yagize ati “Icyo umushinga ugamije ni ugufasha bagenzi banjye kumenya gukoresha ikoranabuhanga kuko ni ryo rizajya rikoreshwa cyane mu myigishirize igezweho. Ni ngombwa ko abarimu tuba tuzi gukoresha ikoranabuhanga, tukamenya gushakisha amakuru ajyanye n’ibyo twigisha ku buryo ubumenyi duha abana buba bwagutse kandi buri ku rwego mpuzamahanga.”

Iyamuremye yavuze ko hari n’abandi barimu bafite ubumenyi buhagije mu by’ikoranabuhanga bashimye iki gitekerezo yagize, bakazajya bamufasha kwigisha bagenzi babo, ibikorwa bakora nyuma y’amasomo asanzwe agenerwa abanyeshuri.

Yavuze ko kuva yatangira iki gikorwa, “Mbona abarimu benshi babyitabira, bafite ubushake bwinshi ku buryo benshi bifuza kwinjizwa muri iki gikorwa. Ndacyari mu kubaka urubuga tuzajya dukoresha (website), ariko ubu tumaze guhugura abarimu 27, kandi intego ni ukuzahugura abarimu bose twigisha hamwe bitarenze igihembwe gitaha, nkazabona no gukomereza ahandi.”

Igitekerezo cya Iyamuremye kiri mu mishinga iharanira igihembo cy’umwarimu w’indashyikirwa ku rwego rw’igihugu, uretse ko avuga atagitangije kubera aya marushanwa, bityo akazagikomeza nubwo atatsinda.

Uyu mwarimu kandi yasabye bagenzi be kwitinyuka. Yagize ati “Leta yarabitweretse ko Isi tuganamo ari iy’ikoranabuhanga, nk’abarimu rero tugomba gutinyuka tukarikoresha, tukaribyaza umusaruro, rukarigira umusemburo wateza imbere ireme ry’uburezi dutanga, bityo abana bacu bagakura bahangana n’abo mu bindi bihugu kuko bafite ubumenyi bwisumbuye ku ikoranabuhanga no mu bindi byose bize. Ikoranabuhanga ubwaryo ni ishuri, ntabwo dukwiye kuryirengagiza.”

Yashimye uburyo Leta iri kugerageza kugeza ibikoresho mu mashuri, ati “Abana bakeneye kubona izo mudasobwa bakazikoresha, abarimu bakeneye kuzitunga kugira ngo bakore ubushakashatsi, byose Leta iri kubishyiramo imbaraga nubwo atari mu gihugu hose, ariko hari intambwe nini yatewe.”

Iyamuremye yavuze ko igikorwa cye kizakomeza kikagera ku barimu bose babikeneye, akavuga ko ari umusanzu ari kwitura igihugu mu rwego rwo kugira uruhare mu iterambere ry’urwego rw’uburezi.

Iyamuremye afite inzozi zo guteza imbere ikoreshwa ry'ikoranabuhanga mu barimu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .