Kayonza: Hafunguwe inyubako izifashishwa mu kwegereza ifumbire abahinzi basaga ibihumbi 150

Yanditswe na Jean Pierre Tuyisenge
Kuya 21 Gashyantare 2018 saa 08:26
Yasuwe :
0 0

Umuryango ufasha mu kwegereza abahinzi inyongeramusaruro One Acre Fund-Tubura, wafunguye inyubako ifite ubushobozi bwo kubika toni 4600 mu Murenge wa Mukarange mu Karere ka Kayonza.

Iyo nyubako yafunguwe ku mugaragaro n’Umunyamabanga wa Leta muri Minisiteri y’Ubuhinzi n’Ubworozi ushinzwe ubuhinzi, Nsengimana Fulgence, mu mpera z’icyumweru gishize.

Umuyobozi wa One Acre Fund mu Rwanda, Eric Pohlman, yavuze ko bubatse iyo nzu hagamijwe kwegereza abahinzi inyongeramusaruro kugira ngo bajye bayibona itabagoye bibafashe mu bikorwa byabo bya buri munsi.

Yagize ati “Ubuhinzi ni umurimo w’igihe kirekire, muri iki gihe usanga ahanini hariho ubuhinzi bwo gutunga ababukora gusa, dufite inshingano zo kuraga abana bacu ubuhinzi bubyara inyungu. Kugira ngo bigerweho dukwiye gushoramo imari tukanashyiramo ikoranabuhanga.”

Yakomeje agira ati “Mu myaka 11 ishize One Acre Fund-Tubura yatangiye ifasha ingo z’abahinzi 38 gusa mu 2007 none kugeza ubu ifasha izigera ku 285,000. Umuhigo wacu w’igihe kirekire ugaragazwa n’impamvu twubatse iyi nzu, izafasha abaturage bose mu Ntara y’Iburasirazuba mu myaka 30 iri imbere, ikazatuma bahabwa inyongeramusaruro bitabagoye.”

Nsengiyumva Fulgence, yashimye Tubura yubatse ahazajya hahunikwa ifumbire avuga ko nta buhinzi bubaho bitagira inyongeramusaruro.

Yagize ati “ Uramutse udakoresha ifumbire cyangwa ngo wumve inama impuguke mu buhinzi zikugira ntabwo wabona umusaruro, kuba abahinzi begerejwe amafumbire bizatuma hakemuka cya kibazo twajyaga tugira cyo kuba hari abahinzi batangira guhinga ibyangombwa bimwe na bimwe bitarabegerejwe.”

Yavuze ko nka Minisiteri y’Ubuhinzi n’Ubworozi, basabye abantu bose batumiza ifumbire hanze kureka kujya bayibika mu Mujyi wa Kigali ahubwo bakayegereza abahinzi hirya no hino mu Ntara.

Kugeza ubu habarurwa abacuruzi batumiza inyongeramusaruro hanze bageze ku 1000, gusa ngo usanga abenshi batagira inyubako nini zabugenewe.

One Acre Fund-Tubura ikorera mu turere 15 kuva mu 2007, ikaba imaze kubaka inzu nini zibikwamo inyongeramusaruro zigera kuri eshanu.

Abahinzi bakorana na Tubura, bahabwa ifumbire ku nguzanyo bakazishyura bamaze kweza, banahabwa amahugurwa y’uko bashobora kuzikoresha n’uko bashobora kongera umusaruro.

Biteganyijwe ko muri uyu mwaka, iyo nzu izabikwamo ifumbire igera kuri toni 2000, ikazahabwa abacuruzi bagera kuri 203 bazayigeza mu Ntara yose y’Iburasirazuba.

Inyubako izajya ihunikwamo inyongeramusaruro
Umunyamabanga wa Leta muri Minisiteri y’Ubuhinzi n’Ubworozi ushinzwe ubuhinzi, Nsengimana Fulgence
Umuyobozi wa One Acre Fund mu Rwanda, Eric Pohlman
Abayobozi batemberejwe muri iyo nyubako

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza