Kayonza: Cyamunara y’inka 158 zafatiwe mu kigo cya Gabiro yahagaritswe ku nshuro ya kabiri

Yanditswe na Hakizimana Jean Paul
Kuya 6 Nzeri 2019 saa 01:35
Yasuwe :
0 0

Urukiko rwisumbuye rwa Ngoma rwafashe umwanzuro wo gusubika cyamunara ku nshuro ya kabiri y’inka 158 zafatiwe mu kigo cya gisirikare cya Gabiro.

Umwaka ushize Inama njyanama z’uturere dutatu dukora kuri iki kigo cya gisirikare cya Gabiro aritwo Nyagatare, Gatsibo na Kayonza, zafashe umwanzuro ko inka zizajya zifatirwa muri iki kigo zizajya zitezwa cyamunara amafaranga azivuyemo akajya mu isanduku ya leta.

Byari biteganyijwe ko tariki 11 Nzeri izi nka aribwo zari kuzatezwa cyamunara ariko umuhesha w’Inkiko Me Ndayobotse Silas wari kuzaziteza cyamunara yabwiye IGIHE ko yasubitswe n’urukiko nyuma y’ikirego cy’umuturage witwa Safari Steven.

Yagize ati “Hari umuturage wari waregeye urukiko avuga ko inka ze ngo zitigeze zigera mu kigo ahubwo ngo bazimwibye, aregera urukiko noneho rufata umwanzuro wo kuba ruhagaritse iyi cyamunara by’agateganyo.”

Me Ndayobotse yakomeje avuga ko “Akarere kagiye kujuririra iki cyemezo cy’urukiko rwafashe hanyuma hakarebwa igihe bazafatira icyemezo niba zigurishwa cyangwa zitazagurishwa.”

Safari Steven watanze ikirego mu rukiko avuga ko inka ze yari yarazibuze akaza kumenya ko zafatiwe ku butaka bwa gisirikare bwa Gabiro. Ngo yasobanuriye ubuyobozi uko byagenze ngo abure inka ze ariko ntibwabasha kumwumva ahitamo kuregera urukiko rwisumbuye rwa Nyagatare kuwa 22 Nyakanga.

Mu minsi ishize Minisitiri w’ubutegetsi bw’Igihugu Prof Shyaka Anastase yaburiye abaturage baturiye iki kigo cya Gabiro ababwira ko bagiye gukarishya ibihano ku bantu bazajya bafatwa baragiye muri iki kigo.

Yagize ati “Ntabwo dushaka ko mwongera kuduha inka zanyu ngo tuzigurishe, ntabwo dushaka ko mwongera kuriha inka zanyu, aho kugira ngo uzirohe zigurishwe niba ufite inka 50 warebamo inka imwe cyangwa eshanu ukazigurisha zikaragira izisigaye aho kuzishora mu kigo cyagisirikare.”

Minisitiri Shyaka yanakomoje kungaruka zo kuragira mu kigo cya Gabiro ngo byakururaga uburenge bigatuma turiya turere dushyirwa mu kato.

Ati “Kuragira mu kigo byatumaga inka zizerera zimwe zikanazana uburenge, uburenge bwaza tugafunga ibiterane inka ntizongere kugurishwa abaturage bagakena amata ntaboneke kuburyo intara yose yasubiraga inyuma.”

Kuva iki cyemezo cyafatwa mu kigo cya Gabiro hamaze gufatirwayo inka 831 z’abaturage 35. Akarere ka Gatsibo niko gafite inka nyinshi 493 z’abaturage 18 zikaba zaragurishijwe miliyoni 83 263 00. Nyagatare hafshwe inka 180 z’abaturage 13 zagurishijwe miliyoni 25 033 00. Naho Kayonza ni inka 158 z’abaturage bane zikaba zizagurisha kuri uyu wa gatanu.

Cyamunara y’inka 158 zafatiwe mu kigo cya Gabiro yahagaritswe ku nshuro ya kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza