Kwamamaza

Kayonza: Batewe impungenge n’inkunga y’ibiribwa yatangiye kugabanuka bagifite amapfa

Yanditswe kuya 21-09-2016 saa 08:45' na Emma-Marie Umurerwa


Abaturage bo mu Murenge wa Mwiri mu Karere ka Kayonza baravuga ko bahangayikishijwe n’uko ibiribwa byiganjemo ibinyampeke bahabwa na Leta kubera amapfa bahuye nayo, byagabanutse kandi ikibazo cyatumye bafashwa kitararangira.

Muri Gicurasi 2016, nibwo Leta y’u Rwanda yatangiye kugoboka abaturage bazahajwe n’amapfa by’umwihariko mu Ntara y’Iburazirazuba, ibaha inkunga y’ibiribwa byiganjemo ibinyampeke.

Mu mpera z’umwaka ushize nibwo mu turere twa Kayonza, Nyagatare, Kirehe na Ngoma hateye amapfa kuva muri Nzeri 2015 kugeza Gashyantare 2016.

Bamwe mu batuye mu Murenge wa Mwiri mu Karere ka Kayonza, bavuga ko iyi nkunga igitangira gutangwa bahabwaga ibiro bitandatu by’ibigori hamwe n’ibiro bine by’ibishyimbo. Kuri ubu bakaba bari guhabwa ibiro bine by’ibigori gusa.

Igabanuka ry’iyi nkunga ryatumye bavuga ko batangiye kugira impungenge ko mu minsi iri imbere bashobora kugira ikibazo gikomeye cyo kwicwa n’inzara.

Umwe mu baturage wifuje ko amazina ye agirwa ibanga yagize ati “Ibiribwa baduhaga byaragabanutse cyane. Ese ko icyatumye badufasha kitararangira ni iki cyatumye babigabanya, mu kigega cya Leta byashizemo?”

Undi muturage avuga ko imitangirwe y’ibiribwa igenda ihindura isura bitewe n’amazina y’abantu bahamagarwa mu bagomba gufata inkunga y’ibiribwa, kandi batazwi muri ako gace.

Yagize ati “Ujya kumva ukumva bahamagaye umuntu utazwi muri aka gace, noneho umuyobozi w’umudugudu cyangwa uw’akagari agahita avuga ngo ‘ndamufatira’ hari n’abandi ujya kumva ngo ‘ndibuze’ kandi batuye aho ngaho. Ibi bintu biraduhangayikishije cyane.”

Umunyamabanga Nshingwabikorwa w’Umurenge wa Mwiri, Mwizerintwari Gilbert avuga ko ibiribwa byagabanutse inshuro imwe gusa.

Yagize ati “Byagabanutse muri iki cyumweru gishize bitewe n’uko hari habuze uburyo bwo kubikura mu bubiko bw’Akarere babitwara ku ma site ariko ubundi abaturage bahabwa ibiryo by’iminsi irindwi. Buri muryango uhabwa hakurikijwe umubare w’abawugize. Kuva ku muntu umwe kugeza kuri bane, bahabwa ibiro bibiri by’ibishyimbo kugeza ku biro bine by’ibigori. Kuva ku muryango w’abantu bane kuzamura bahabwa ibiro bitatu by’ibishyimbo na bitanu by’ibigori.”

Mwizerintwari yakomeje avuga ko ikibazo cy’abayobozi batwara ibyagenewe gufasha abaturage atakizi.

Yagize ati “Icyo kibazo sinkizi, mu minsi ishize hari ibiribwa byafatanywe umucuruzi wari wabiguze n’abaturage bari babigurishije kugira ngo bagure umunyu n’utundi tuntu bakenera mu rugo. Naho abafatira abandi ni abayobozi bo mu mudugudu cyangwa abaturanyi b’umuntu udafite imbaraga zo kuza kubyifatira kandi bikorwa mu mucyo kuko bitangirwa mu matsinda y’umudugudu.”

Umuyobozi w’Akarere ka Kayonza wungirije ushinzwe Ubukungu n’Iterambere, Uwibambe Consolée, nawe ashimangira ko ibiribwa bihabwa abaturage bitigeze bigabanuka.

Yagize ati "Ntabwo ingano y’ibyo kurya abaturage bahabwa yagabanutse, ariko bigitangira bose bafataga ku gipimo kingana, ubu rero icyo twakoze ni uko abantu basigaye bahabwa ibiribwa hashingiwe ku mubare w’abagize umuryango.Icyo kibazo cya ndibuze na ndamufatira ndumva aricyo umuntu yakurikirana."

Tariki ya 24 Kamena 2016, Inama y’Abaminisitiri idasanzwe yateraniye muri Village Urugwiro, iyobowe na Perezida wa Repubulika, Paul Kagame; Minisitiri w’Ubuhinzi n’Ubworozi yamenyesheje ko Uturere twa Kayonza, Nyagatare, Kirehe na Ngoma hateye amapfa kuva Nzeri 2015 kugeza Gashyantare 2016, imiryango yo mu Turere twibasiwe n’amapfa, yahawe ibiribwa.

Umurenge wa Mwiri uri mu yibasiwe n'amapfa cyane

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved