Kayonza: Abagore bahawe amagare azabafasha kwihuta mu iterambere

Yanditswe na Philbert Girinema
Kuya 27 Kanama 2016 saa 07:38
Yasuwe : XX
138 71

Abagore bagera kuri 30 baturuka mu Turere twa Kayonza, Rwamagana, Gasabo, Kicukiro, Muhanga na Nyaruguru nyuma y’amahugurwa y’iminsi 5 bahugurwa n’umuryango Women for Women International ku bijyanye no kwihangira imirimo, bashyikirijwe amagare 30 azabafasha kwihutisha no kugeza kure ubumenyi bahawe muri bagenzi babo.

Kuri uyu wa Gatanu tariki ya 26 kanama 2016, abo bagore bari bamaze iminsi itanu kubera uruhare bagaragaza mu gufasha bagenzi babo kubigisha uko bagera ku iterambere. Ni amasomo yatangirwaga mu kigo Women’s Opportunity Center mu Karere ka Kayonza mu Ntara y’Iburasirazuba,

Aba bagore batangaje ko bagiye kwigisha bagenzi babo basize hirya no hino mu turere baturukamo, bakazabafasha mu kumenya no kwitabira ibikorwa by’iterambere, kwibumbira mu makoperative bakanakorana n’ibigo by’imari hamwe no kubashishikariza kurushaho kwitabira gahunda za leta.

Bishimiye ubufasha bahawe

Florida Muhongerwa nyuma yo guhabwa igare, yavuze ko rizamworohereza kugera kure kandi vuba mu kujya gusangiza bagenzi be ubumenyi yungutse.

Umuyobozi w’Umuryango Women for Women International, Antoinette Uwimana, ku rwego rw’igihugu, yashimye ubuyobozi bw’Akarere ka Kayonza bubaba inyuma mu gufasha abaturage mu bikorwa bibateza imbere.

Uwimana yavuze ko ntawigisha ibyo adafite, bityo ko ubumenyi aba bagore bungutse bagomba kubusangiza abandi.

Umuyobozi w’Akarere ka Kayonza, Murenzi Jean Claude, yashimye gahunda z’umuryango Women for Women International zigamije kuzamura imibereho myiza n’ubukungu by’umuturage kuko ariyo ntego y’igihugu, yizeza uyu muryango gukomeza kuwuba hafi mu gufatanya mu iterambere ry’abaturage.

Muri uyu muhango wo gushyikiriza abagore 30 amagare banahawe impamyabushobozi zigaragaza ibyo bungukiye muri aya mahugurwa.

Abagore bahawe amagare azajya aborohereza kugera kuri bagenzi babo babahugura
Umuyobozi w’Akarere ka Kayonza, Murenzi Jean Claude
Umuyobozi w’Umuryango Women for Women International, Antoinette Uwimana
Bacinye akadiho bishimira ibyo bamaze kugeraho
Ni abagore bibumbiye muri koperative zikora ibikorwa bitandukanye birimo n'ubukorikori

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE