00:00:00 IGIHE NETWORK KN KINYARWANDA EN ENGLISH FR FRANCAIS

Karongi: Umugore wafungiwe kuruma umwana we; yongeye kumuruma aramukomeretsa

Yanditswe na Nsanzimana Erneste
Kuya 28 Nzeri 2021 saa 08:11
Yasuwe :
0 0

Mu Murenge wa Rubengera mu Karere ka Karongi, haravugwa umugore witwa Mukantaganda Domitille ufite ingeso yo guha umwana we ibihano bikomeye, birimo guhora amuruma akamukomeretsa.

Uyu mugore yari yatawe muri yombi mu ntangiriro z’uyu mwaka, azira guha umwana we ibihano biremereye, icyo gihe yashinjwe kumurumisha amenyo ye akababaza uyu mwana w’imyaka 12 gusa.

Nyuma y’ibyumweru bibiri, uyu mugore yaje kuva muri gereza asubira mu muryango, gusa ejo bundi yongeye kuruma umwana we mu mugongo, aho uyu mwana afite ibikomere bitatu byatewe n’icyo gikorwa cy’umubyeyi we.

Uyu mwana yabwiye IGIHE ko nyima amuruma bitewe no gutaha yasinze, akamukubita cyane ndetse akanamukorera ibindi bikorwa bibabaza umubiri.

Uyu mubyeyi yavuze ko impamvu ahanisha umwana we ibihano biremereye, “Ari uko akunda kuzerera hirya no hino ndetse hari ubwo adataha mu rugo, akarara mu gasozi.”

Abaturanyi b’uyu mubyeyi bavuze ko uyu mwana “Agenda iyo nyina yatashye yasinze, ameze nk’ubana n’ihahamuka kuko nyina buri gihe amuha ibihano biteye ubwoba, bigatuma umwana adatuza, aho amubonye yasinze agahunga.”

Umunyamabanga Nshingwabikorwa w’Umurenge wa Rubengera, Nkusi Medard, yavuze ko iki kibazo atari akizi, ariko akaba agiye kugikurikirana, agira ababyeyi inama yo “Kubaha abana babo, bakirinda ubusinzi kuko bushobora kuba intandaro yo guhohotera umwana n’undi muntu, kandi ibyo amategeko arabihanira. Abana ntibakwiye gukubitwa, ntibakwiye kwimwa uburenganzira bwabo.”

Umugore uherutse gufungirwa kuruma umwana we, yongeye kumuruma aramukomeretsa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .