Karongi: Hatangijwe urugamba rwo guhangana n’abanywa, abambutsa n’abacuruza ibiyobyabwenge

Yanditswe na David Eugène Marshall
Kuya 3 Gicurasi 2018 saa 10:39
Yasuwe :
0 0

Gukumira ibiyobyabwenge n’inzira binyuramo, guhana ababikoresha no guhangana n’ingaruka mbi bigira ku baturage muri Karongi ni imwe mu ngamba zafatiwe mu nama yahuje inzego zose z’ubuyobozi muri aka karere.

Ni igikorwa cy’iminsi itatu cyatangijwe ku wa 26 Mata gihuriweho na Minisiteri zitandukanye zirimo iy’Ubutegetsi bw’Igihugu, iy’Ubuzima, iy’Urubyiruko, iy’Uburinganire n’Iterambere ry’Umuryango zifatanyije n’Ubushinjacyaha bukuru, Polisi y’Igihugu, abanyamadini, Inama y’igihugu y’Urubyiruko n’Akarere ka Karongi.

Umuyobozi Mukuru ushinzwe Amajyambere Rusange n’Imibereho Myiza y’Abaturage muri Minisiteri y’Ubutegetsi bw’Igihugu (Minaloc), Sheikh Bahame Hassan, yasabye Abanya-Karongi guhagurukira iki kibazo, ashimangira ko iterambere igihugu kigezeho n’iryo kimirije imbere byubakiye ku mibereho myiza y’Umunyarwanda uzira ibiyobyabwenge.

Akarere ka Karongi, uretse kuba gahana imbibi na Repubulika Iharanira Demokarasi ya Congo, ni ihuriro ry’abagenzi bava mu bice bitandukanye by’igihugu ibyo bikaba bituma hatagize igikorwa haba indiri y’ abakoresha ibiyobyabwenge.

Sheikh Bahame Hassan yagize ati “Ese bavandimwe mwakwemera ko koko uwo mwanda w’ibiyobyabwenge utumeneramo? Si urugamba rwa visi meya gusa, ahubwo dufatanyirize hamwe kurandura iki kibazo. Ese nitugira abana bishwe n’urumogi, ni nde uzasimbura Sheikh, ninde uzaba Meya w’ejo hazaza? Niba twararwanije nyakatsi, tukarwanya Jenoside yakorewe Abatutsi ikarangira, kurwanya urumogi bizatunanira?”

Umuyobozi w’Akarere ka Karongi Wungirije Ushinzwe Ubukungu, Bagwire Espérance, yasabye abayobozi bose kugenzura neza ko Inkeragutabara zashyizwe ku byambu biri ku Kiyaga cya Kivu ahanyura urujya n’uruza rw’abantu n’ibintu bituruka muri Repubulika Iharanira Demokarasi ya Congo zikora akazi kazo neza.

Yagize ati “Abayobozi b’inzego z’ibanze na ba mudugudu mufatanye kureba niba inkeragutabara zikora neza, ndetse irondo rigenzurwe ku manywa na nijoro, turebe ko ibinyura ku byambu bigenzurwa neza umunsi ku wundi. Abatwara ibintu n’abantu ku binyabiziga nibagira uwo bakeka ko yaba atwaye ibiyobyabwenge batange amakuru ku nzego z’umutekano byihuse.”

Abari aho kandi basabwe gushyira nimero za Polisi zitishyura ku Biro byose by’ahatangirwa serivisi mu Karere ka Karongi kugira ngo ahabonetse amakuru ku bakora, abatwara n’abakoresha ibiyobyabwenge atangirwe igihe.

Umunyamabanga Nshingwabikorwa w’Umurenge wa Rubengera, Niyonsaba Cyriaque, yatangarije IGIHE ko nta rindi banga bazakoresha ritari ugukangurira abaturage kugira iki gikorwa icyabo ndetse no gufatanya n’ubuyobozi n’inzego z’umutekano.

Higaniro Hermogène wari uhagarariye Ubushinjacyaha muri ubu bukangurambaga yagaragaje uko imibare y’abahaniwe ibyaha bifitanye isano n’ikoreshwa ry’ibiyobyabwenge yagiye izamuka, aho kuva mu 2012 abantu 2 196 bahaniwe ibyo byaha, naho mu 2017 bakagera ku 5 584.

Indi mibare kandi ituruka mu nzego z’ubuvuzi mu Rwanda yerekana ko mu Bitaro bya CARAES-Ndera byita ku bafite uburwayi bwo mu mutwe bufite aho buhurira n’ibiyobyabwenge hakiriwe abarwayi 994 mu 2010, mu gihe mu 2017 hakiriwe 1 960, ibi kandi bikiyongera ku bashegeshwe na byo bitabwaho mu bigo ngororamuco.

Ingingo ya 594 mu gitabo cy’amategeko ahana ibyaha mu Rwanda ivuga ko “Umuntu wese ufasha undi kubona uburyo bumworoheye bwo gukoresha ibiyobyabwenge n’urusobe rw’imiti ikoreshwa nkabyo, amuha aho ikoresherezwa cyangwa amubonera ubundi buryo ubwo aribwo bwose ahanishwa igifungo kuva ku mwaka umwe kugeza ku myaka itatu n’ihazabu y’amafaranga y’u Rwanda ibihumbi magana atanu kugeza kuri miliyoni eshanu.

Igikorwa cyo kurwanya ibiyobyabwenge cyakozwe mu turere icumi mu mpande z’igihugu, mu Ntara y’Uburengerazuba cyakorewe muri Rubavu, Rusizi na Karongi.

Umuyobozi Mukuru ushinzwe Amajyambere Rusange n’Imibereho Myiza y’Abaturage muri Minaloc, Sheikh Bahame Hassan, yasabye Abanya-Karongi guhagurukira ikibazo cy'ibiyobyabwenge
Sheikh Kassim ukuriye Inama y'Aba-Sheikh mu Rwanda yasabye ko hatekerezwa ku nyungu z'igihugu mbere ya byose
Umuyobozi ushinzwe Politiki n'Uburere mboneragihugu muri Polisi y'Igihugu, SSP Irere René
Umushinjacyaha Higaniro Hermogène yasobanuye amategeko ahana ibyaha bifitanye isano n'ibiyobyabwenge
Umuyobozi wa Polisi mu Karere ka Karongi, SP Karuranga Emmanuel
Iyi nama yitabiriwe n'abahagarariye inzego zitandukanye
Hatangijwe urugamba rwo guhangana n’abanywa, abambutsa n’abacuruza ibiyobyabwenge mu Karere ka Karongi
Umuyobozi w'Akarere ka Karongi Wungiririje Ushinzwe Ubukungu, Bagwire Espérance, yasabye abayobozi kugenzura y'ahanyura urujya n’uruza rw’abantu n’ibintu bituruka muri Repubulika Iharanira Demokarasi ya Congo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza