Kwamamaza

Kamonyi yaje ku isonga mu mihigo y’urubyiruko, Rulindo iba iya nyuma

Yanditswe kuya 23-09-2016 saa 12:57' na Emma-Marie Umurerwa


Ubwo hamurikwaga ku mugaragaro ibyavuye mu mihigo y’urubyiruko y’umwaka 2015-2016, akarere ka Kamonyi kaje ku mwanya wa mbere n’amanota 80.2% na ho Rulindo iherekeza utundi n’amanota 62.4%.

Iyi mihigo yahiguwe kuri uyu wa Gatanu tariki 23 Nzeri 2016, yahizwe mu byiciro bitatu birimo iterambere ry’ubukungu, imibereho myiza ndetse n’imiyoborere.

Utundi twakurikiye Kamonyi mu kwesa imihigo ku rwego rushimishije, harimo Ngororero yaje ku mwanya wa kabiri n’amanota 79.8% ndetse na Gasabo ku mwanya wa gatatu n’amanota 79.3%.

Muri rusange imihigo y’urubyiruko y’umwaka wa 2015-2016, yashyizwe mu bikorwa ku kigero cya 70.1%.

Umutahira mukuru w’Intore akaba n’Umuyobozi wa Komisiyo y’Itorero, Boniface Rucagu, yavuze ko u Rwanda rutewe ishema n’urubyiruko rwarwo rukomeje kuruteza imbere rutizigama.

Yagize ati" Urubyiruko ni rwo rwaguye u Rwanda, ni rwo rwakijije u Rwanda Abanyoro, ni rwo rwabohoye u Rwanda, dutewe ishema no kuba dufite urubyiruko rusobanutse."

Rucagu kandi yasabye urubyiruko rw’utundi turere tutabashije kwesa imihigo uko bikwiye kwikubita agashyi na bo bakazayesa neza ubutaha.

Fred Mufuluke, Umuyobozi mukuru ushinzwe imiyoborere n’imikorere y’inzego z’ibanze muri Minisiteri y’Ubutegetsi bw’Igihugu, yabwiye urubyiruko rutabashije kwesa neza imihigo ko rwabuze ubufatanye mu kuyishyira mu bikorwa.

Ati " Icyo mwabuze ni ubufatanye, imihigo murayihiga mukagenda mukayibika, ubu mushobora kwihanganirwa kuko bamwe muri mwe mwatowe ejobundi imihigo yarahizwe. Ariko umwaka utaha aba nyuma ntibazihanganirwa."

Yasabye abayobozi b’uturere kurushaho kwegera inzego z’urubyiruko kugira ngo babafashe kwesa imihigo baba bahize.

Kamonyi ibaye iya mbere mu mihigo y’urubyiruko, umwaka ushize yari yabaye iya nyuma igira amanota 54.08% na ho Rulindo yabaye iya nyuma yari iya 20 n’amanota 71.86%.

Kamanzi Ernest uhagarariye urubyiruko mu karere ka Kamonyi yishimiye igikombe begukanye
Boniface Rucagu yavuze ko ari ishema kugira urubyiruko rusobanutse
Umuyobozi w'inama y'igihugu y'urubyiruko Uwanyirigira Clarisse (ibumoso), Rose Mary Mbabazi,Umunyamabanga Uhoraho wa MYICT ndetse na Fred Mufuluke wa MINALOC
Umuyobozi w'Urubyiruko mu Karere ka Ngororero yishimira igikombe bahawe
Akarere ka Kamonyi kabaye aka mbere gahabwa igikombe
Abayobozi b'Urubyiruko mu turere basinya imihigo
Uko uturere twose twakurikiranye mu kwesa imihigo y'urubyiruko 2015-2016

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved