Kamonyi: Imiryango 60 yasenyewe n’ibiza yahawe amabati n’ibindi bikoresho bya miliyoni 30 Frw

Yanditswe na Thamimu Hakizimana
Kuya 28 Ugushyingo 2019 saa 09:57
Yasuwe :
0 0

Imiryango 60 yo mu mirenge itandukanye yo mu Karere ka Kamonyi yasenyewe n’ibiza mu mwaka ushize yahawe amabati n’ibikoresho nkenerwa byo mu nzu birimo matola, imikeka n’ibidomoro mu kuyifasha gusubira mu buzima bwiza.

Kuri uyu wa Kane, tariki ya 28 Ugushyingo 2019, nibwo ku bufatanye bw’Umuryango wa ARDE/Kubaho, abaturage basenyewe n’ibiza mu 2018 mu mirenge irimo uwa Kayenzi, Runda, Rugarika, Gacurabwenge, Ngamba na Karama baremewe.

Buri muryango wahawe ibikoresho bifite agaciro k’ibihumbi 500 Frw birimo amabati 30 n’ibiringiti bibiri, imikeka ibiri n’ikidooro kijyamo litiro 100 z’amazi.

Ndagijimana Iddi w’imyaka 44 ufite abana umunani wasenyewe n’ibiza yabwiye IGIHE ko yishimiye inkunga yahawe kuko izamufasha mu mibereho ye.

Ati “Nishimye cyane, ubu ngiye gusakara inzu yanjye neza ku buryo njye n’umuryango wanjye tugiye kongera gusubira mu buzima bwiza.”

Muyemungu Rachel ufite abana bane yashimangiye ko yanejejwe no kuba atazongera kuvirwa mu gihe cy’imvura.

Yagize ati “Byatunejeje cyane guhabwa amabati kuko twari mu buzima bubi. Inzu yanjye ibiza byari byarayisenye, twaryamaga tukanyagirwa kandi n’abana baryama hasi ariko kuba twahawe iyi nkunga twabyishimiye cyane kuko igiye kuduhindurira imibereho.”

Umunyamabanga wa ARDE/KUBAHO, Bahati Augustin, yavuze ko bahisemo gufasha iyi miryango yo mu Karere ka Kamonyi kuko ari ko basanzwe bakoreramo.

Ati “ Twafashije imiryango 60 yatoranyijwe muri 900 twahawe n’akarere ariko nayo hagiye harebwa ikeneye ubufasha kurusha indi. Iyi gahunda twayikoreye Kamonyi kuko n’ubusanzwe umuryango wacu ukorera mu mirenge umunani yaho muri gahunda z’iterambere nko kugeza amazi ku baturage, kubashishikariza kubungabunga ibidukikije no kubigisha ubuhinzi bugezweho.”

Umuyobozi wungirije Ushinzwe Iterambere ry’Ubukungu mu Karere ka Kamonyi, Tuyizere Thaddée, yavuze ko inkunga yatanzwe izafasha yagizweho ingaruka n’ibiza.

Ati “Twabyishimiye kuko twari dufite abantu benshi basenyewe n’ibiza kuko n’Akarere ka Kamonyi kari mu twahuye n’ibiza umwaka ushize. Iyi nkunga igiye gufasha imiryango itagiraga aho iba kuhabona, biyifashe kugira imibereho myiza.”

Yongeyeho ko iyi nkunga igiye gutuma umubare w’abasenyewe n’ibiza batari bafite aho kuba ugabanuka.

Yasabye abagenerwabikorwa kwirinda kugurisha inkunga bahawe kugira ngo izabafashe mu buzima busanzwe.

Byari ibyishimo bidasanzwe ku baturage basenyewe n'ibiza bahawe inkunga y'amabati n'ibindi bikoresho
Umuturage yahawe matola yanga kuyivaho kubera ibyishimo
Umwe mu baturage wahawe amabati n'ibindi bikoresho nkenerwa byo mu nzu yari afite akanyamuneza
Imiryango 60 yasenyewe n’ibiza mu Karere ka Kamonyi yahawe amabati n’ibindi bikoresho bya miliyoni 30 Frw
Umunyamabanga wa ARDE KUBAHO, Bahati Augustin, yavuze ko bahisemo gutangirira ibikorwa byo gufasha abahuye n'ibiza muri Kamonyi kuko ari basanzwe bakorera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza