Kwamamaza

Kamonyi: Baravuga imyato Abanya-Korea babigishije kwiteza imbere badateze amaboko

Yanditswe kuya 25-09-2016 saa 18:57' na Philbert Hagengimana


Abatuye mu Murenge wa Nyarubaka, Akarere ka Kamonyi baravuga imyato Global Civic Sharing Rwanda (GCS-Rwanda), Umushiga w’Abanya-Korea y’Epfo, nyuma y’aho utangiriye ibikorwa byo kubatoza kwiteza imbere batabanje kugira uwo bategera amaboko.

Kwigira ni ihame Perezida wa Repubulika Paul Kagame adahwema gusaba abanyarwanda kugira iryabo mu rwego rwo kwihesha agaciro.

Nyamara bamwe mu banyarwanda usanga ntacyo bafite baheraho kugira ngo bigire mu bikorwa byabo bibateza imbere, cyane bitewe n’imyumvire yabo, dore ko hari n’ubwo usanga hari amahirwe bafite ariko ntibayabyaze umusaruro nk’uko bitangazwa n’umushinga GCS Rwanda.

Aho ni ho wahereye ufata gahunda yo guhugura abaturage ku birebana n’ibyatuma bahindura imyumvire bakabasha kwiteza imbere babigizemo uruhare ubwabo, kandi ntawe babanje gutegera amaboko ngo abahe imfashanyo.

Ni muri urwo rwego kuri uyu wa 23 Nzeri 2016 hasojwe amahugurwa y’icyiciro cya gatatu, yari agenewe abahagarariye ‘Amatsinda yo Kwigira’, abayagize bakaba ari bo bagenerwabikorwa ba GCS Rwanda.

Ntakirutimana Phanuel, wo mu Kagari ka Kigusa, mu Murenge wa Nyarubaka, Akarere ka Kamonyi, akaba Umuyobozi w’Itsinda ‘Abishyize Hamwe Kigarama’, yatangaje ko bahuguwe ku miyoborere, Kwizigama bifite intego, Kumenya gushyikirana n’abandi, gutanga ubutumwa bufite intego no gukorera ku ntego.

Ati “Batwigishije indangagaciro za kiyobozi, kugena intego y’igihe gito n’iy’igihe kirekire haba mu ngo zacu ndetse no mu Itsinda. Twashimiwe aho twaribwaga, kuko nk’abayobozi twari dukeneye kumenya amatsinda ayoborwa ate? Abantu bizigamira bate?”

Aya mahugurwa yahabwaga abantu bane muri buri tsinda, ari na yo mpamvu bahawe umukoro wo kujya guhugura bagenzi babo bagize itsinda, dore ko rimwe riba rigizwe n’abantu hagati ya 30 na 35.

Bifuje ko ibikorwa by’uwo mushinga inzego bwite za Leta zabigira ibyazo, kuko ubu bisa n’aho abayobozi batabyinjiramo cyane, ahubwo bakabiharira abo bafatanyabikorwa bo mu mushinga GCS Rwanda.

Umunyamabanga Nshingwabikorwa w’Umurenge wa Nyarubaka, Munyakazi Epimaque, yatangarije IGIHE ko GCS Rwanda ihugura abaturage ku byo kuyobora, bigatuma babasha guhugura bagenzi babo mu matsinda, maze imyumvire igahinduka, bikagira akamaro cyane mu iterambere.

Ati “Ibyo bahugurwamo usanga ari ingirakamaro cyane, kuko hari aho bikura abantu mu myumvire ndetse no mu mikorere bagatera imbere kuko usanga banahabwa inguzanyo bamwe bagakora ubuhinzi abandi ubworozi, bityo bakabasha gucunga neza imishinga yabo baba bakoze.”

Uyu muyobozi avuga ko ibikorwa by’abo baturage babikurikirana, gusa ngo uwo mushinga uba ufite abavuzi b’amatungo n’abagoronome bawo, ariko mu igenabikorwa ndetse no mu gukora igenzura, inzego z’ibanze ngo zibigiramo uruhare rukomeye.

Hitimana Muhirwa Eric, Umuyobozi mukuru wungirije wa GCS Rwanda, yatangaje ko umushinga wabo ari umufatanyabikorwa w’Akerere ka Kamonyi, wibanda ku bice by’icyaro, ari na yo mpamvu abagenerwabikorwa bawo bibumbira mu ‘mu matsinda yo kwigira’, bakabatoza kwiteza imbere babyikoreye ubwabo.

Hitimana yagize ati “Bahugurwa kuri byinshi baba bafitemo intege nke mu bikorwa byabo, aho ubu hibanzwe ku miyoborere myiza, kwimenya, kwizigamira binyuze mu matsinda, ndetse n’iterambere ry’Umuryango.’’

Uwo muyobozi avuga ko abo baturage bari basanzwe bizigamira ariko bakabikora mu buryo budashobora kubateza imbere, ari na yo mpamvu babanje kubafasha kwimenya by’ukuri, ubundi bikaba byabafasha kwiha intego ngufi ndetse n’izigihe kirekire.

Uwo mushinga kandi ngo uzakomeza gukurikirana ibikorwa by’ayo matsinda, ndetse hakajya hanagenzurwa umusaruro wayo, dore ko ari n’umwaka wa mbere uwo mushinga umaze utangiye ibyo bikorwa. Aho ngo ni na ho hazamenyekanira ibyifuzo byabo ndetse n’izindi ntege nke bafite, ku buryo ari byo byazibandwaho mu mahugurwa ataha.

Mu gihe bamwe bibazaga ko ibyo bikorwa by’umushinga GCS Rwanda byatuma abaturage ba Kamonyi n’ab’u Rwanda muri rusange batera imbere insigane, Hitimana abamara impungenge, akavuga ko bateganya kwagura ibikorwa, ku buryo ubushobozi bubonetse banabisakaza igihugu cyose.

Nyarubaka umurenge utuwe n’abaturage 25,515, ukaba umwe muri 12 igize Akarere ka Kamonyi.

Abahuguwe batewe inkunga y'amasuka kuri buri wese
Abahuguwe bahawe impamyabumenyi
Abahuguwe bishimiye ubumenyi bakuye muri aya mahugurwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved