Kaminuza zikomeye zo mu Bwongereza zeretse Abanyarwanda amahirwe zibafitiye

Yanditswe na Kanamugire Emmanuel
Kuya 27 Nzeri 2016 saa 09:12
Yasuwe :
0 0

Kaminuza zisaga 10 zaje kwereka Abanyeshuri b’Abanyarwanda amahirwe bafite yo kwiga mu mashuri akomeye mu Bwongereza, aho basobanuriwe ibisabwa n’uburyo bakwinjira muri izo kaminuza ziri mu za mbere zikomeye ku Isi.

Kuri uyu wa Kabiri, kaminuza 11 zo mu majyaruguru y’u Bwongereza zihuriye mu cyitwa Northern Consortium, Kaminuza ya Coventry, London South Bank University na University of the West of Scotland, zahurije hamwe abanyeshuri bo mu mashuri atandukanye ya Green Hills, Excella, Riviera High School, Ecole Française de Saint Exupery na Wellspring Academy, babereka amahirwe ashoboka yo kwiga mu Bwongereza.

Georgina Jones wari uhagarariye kaminuza 11 zo muri Northern Consortium, yabwiye IGIHE ko hari amahirwe menshi cyane ashingira ku manota umunyeshuri yagize, ku buryo atoranywa kwiga nubwo yaba adafite ubushobozi buhagije.

Ati “Turashaka kubafasha kumenya uburyo bwo gusaba amashuri mu Bwongereza, imyanya ihari, ibisabwa n’ibindi kuko Abanyarwanda bakomeje kugaragaza ubushake bwo kwiga mu Bwongereza.”

“Njye mpagarariye kaminuza 11 hano, inyinshi zikaba zitanga amahirwe yo kuzigamo hagendewe ku manota umunyeshuri yagize. Nk’urugero nka Kaminuza ya Bradford iyo ugize A ebyiri na B urangije amashuri yisumbuye, ugabanyirizwaho £ 3000. Muri Sheffield Hallam University hari nka buruse ushobora gusaba ukagabanyirizwa 50% ku mafaranga wishyura, ku buryo yagufasha kwizigamira £ 12 000 ku mwaka.’’

Georgina Jones wari uhagarariye kaminuza 11 zo muri Northern Consortium, yabwiye IGIHE ko hari amahirwe menshi cyane ashingira ku manota umunyeshuri yagize

Georgina kandi yavuze ko bijyanye n’ubukungu bw’Abanyarwanda buri kugenda buzamuka ku buryo babasha kwiga muri Kaminuza zikomeye mu Bwongereza, ndetse na guverinoma y’u Rwanda ikaba itanga inguzanyo ku banyeshuri bajya kwiga mu mahanga binyuze mu Kigo cy’Igihugu cy’Uburezi.

Georgina yavuze ko imibare iheruka ya British Council yari iy’abanyarwanda 160 biga mu Bwongereza, ariko ngo bifuza kubona Abanyarwanda benshi basabayo amashuri.

Ati “Ikindi turi kurebaho ku Banyarwanda ni uburyo twatangira mu Rwanda amasomo ya nyuma y’icyiciro cya mbere cya kaminuza mu Rwanda, aho kugira ngo bajye bajya kwiga mu Bwongereza nk’ibintu byagabanya igiciro bibasaba.

Byaje Kate wiga muri Ecole Française, ni umwe mu bagaragaje ko hakiri ibiciro biri hejuru ku kwiga mu Bwongereza, nubwo ari ahantu bakura ubumenyi buhanitse.

Ati “Ndatekereza ko mu Bwongereza ari amahirwe akomeye y’ahantu nakura ubumenyi kuko nifuza kwiga ubuvuzi. Gusa nasanze ingorane ziri mu kubonayo ishuri, ngira n’impungenge ku biciro, basaba amanota menshi, ndetse kuko turi mu myigire y’Igifaransa, bizadusaba igihe ngo tujye mu myigishirize y’Icyongereza.”

Kaminuza 11 zo muri Northern Consortium zirimo nka kaminuza ya Bradford, Kaminuza ya Huddersfield, Kaminuza ya Liverpool, Kaminuza ya Salford, iya Manchester n’izindi.

Abanyeshuri biga mu mashuri atandukanye mu mujyi wa Kigali basobanurirwa amahirwe ahari yo kwiga muri Kaminuza zo mu Bwongereza
Bamwe basanga ibiciro bya zimwe muri Kaminuza zo mu Bwongereza bigihanitse
Abanyarwanda ngo bakomeje kugaragaza ubushake bwo kwiga mu Bwongereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza