Kaminuza yo mu Birwa bya Maurice igiye gufungura ishuri ry’Ubumenyingiro mu Rwanda

Yanditswe na Kanamugire Emmanuel
Kuya 7 Nzeri 2016 saa 10:27
Yasuwe : XX
0

Kaminuza y’Ikoranabuhanga ya Rushmore, imaze imyaka 14 yigisha amasomo atandukanye y’imyuga n’Ubumenyingiro mu Birwa bya Maurice, igiye gufungura ishami mu Rwanda.

Nyuma yo gusura u Rwanda ubugira kabiri bareba aho bagomba gushora imari yabo, ku nshuro ya gatatu abahagarariye iyi kaminuza basinye amasezerano n’Ikigo cy’Igihugu gishinzwe guteza imbere imyuga n’Ubumenyingiro WDA, kugira bemererwe kuba batangira ibikorwa byo gushora imari yabo mu burezi.

Mu muhango wo gusinya amasezerano y’ubufatanye,Dr Priya Ramluggun-Essoo, Umuyobozi ukuriye Ishami ryo guteza imbere ubucuruzi muri iyo Kaminuza yatangaje ko baje kongera umubare w’abiga amasomo y’ubumenyingiro mu Rwanda.

Ati “Turateganya ko bigenze neza twatangira mu kwezi kwa mbere 2017, tugatangirana n’abanyeshuri bari hagati ya 500 na 800 .Tuzibanda ku masomo y’ubwubatsi, ubugeni mu guhanga inyubako(architecture) ,ubuhanga mu kugenzura inyubako (construction survey), ikoranabuhanga n’andi masomo atandukanye.”

Yakomeje avuga ko bagamije gusohora abakozi bafite ubushobozi bwo kujya guhangana ku isoko ry’umurimo kuko bazazana abarimu baturutse mu Birwa bya Maurice akaba ari bo bazajya bigisha bakanahugura abarimu bo mu Rwanda ku buryo abanyarwanda bazabonamo akazi.

Dr Priya avuga ko mu myaka itatu iyi kaminuza izaba ifite inyubako yayo mu Rwanda.

Jerome Gasana, Umuyobozi wa WDA, ari na we washyize umukono kuri ayo masezerano ku ruhande rw’u Rwanda, yatangaje ko bishimiye ko Leta ibonye umuterankunga mu burezi cyane cyane mu masomo y’imyuga n’ubumenyingiro kandi ko biteze umusaruro mwiza.

Ati “Twishimiye ko twungutse undi mufatanyabikorwa mu masomo y’imyuga n’ubumenyingiro(TVET),bafite ubushake kandi babizobereyemo ndetse akarusho banakorana na kaminuza zo mu Bwongereza ku buryo abo bahanga bose bazafasha gusohora abakozi bafite byinshi bazi gukora.”

Kuri ubu Leta y’u Rwanda ishyize imbere guteza imbere ibikorerwa mu Rwanda ku buryo hakenewe umubare munini w’abahanga ibintu bishya kandi byiza bishobora guhangana n’ibindi bicuruzwa ku isoko.

Aba bayobozi bombi bagiranye ikiganiro n'itangazamakuru
Umuyobozi wa WDA, Gasana Jerome na Dr Priya Uhagarariye Kaminuza ya Rushmore yo mu birwa bya Maurice
Dr Priya ahamya ko bazatanga ubumenyi ku buryo abasohotse bazaba bafite ubushobozi bwo kwihangira imirimo
Gasana Jerome, Umuyobozi Mukuru wa WDA

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza