Kaminuza y’u Rwanda yahagurukiye ikibazo cya ruswa y’igitsina ivugwamo

Yanditswe na Habimana James
Kuya 16 Kanama 2019 saa 10:14
Yasuwe :
0 0

Ubuyobozi bwa Kaminuza y’u Rwanda bwatangaje ko bwahagurukiye mu buryo bukomeye, abarimu bavugwaho kwakira ruswa y’amafaranga ndetse no kwaka abanyeshuri ruswa y’igitsina kugira ngo babahe amanota.

Iki kibazo cyagarutsweho mu nama yahuje ubuyobozi bw’iyi Kaminuza muri iki cyumweru, harebwa imwe mu myitwarire itari myiza ivugwa kuri bamwe muri aba barezi.

Umukobwa umwe wiga muri Kaminuza y’u Rwanda, yavuze ko ubwo yayitangiragamo mu mwaka wa mbere, yumvaga ko ari amahirwe yo kuhabonera impamyabumenyi bityo agashobora kujya guhangana ku isoko ry’umurimo.

Yavuze ko yari azi neza ko kubona iyi mpamyabumenyi bitazoroha ahubwo yagombaga gukora cyane mu ishuri ndetse no gutsinda neza ibizamini.

Ibitekerezo bye byaje kugenda biyoyoka nyuma yo kwiga cyane ariko akabona umusaruro abona ntuhura n’imbaraga yashyizemo.

Ati “Nagombaga kwiga cyane nk’umwana wiga mu mwaka wa mbere ariko buri gihe ubwo twakoraga ibizamini amanota akajya hanze, natungurwaga n’umusaruro navanyemo, nabonaga amanota atandukanye kure n’ayo numvaga ndi bubone nabaga nakoreye.”

Uyu mukobwa ubu wiga mu mwaka wa Gatatu, yavuze ko yaje kubivumbura ubwo umwe mu barimu bamwigishaga yamwegeraga akamubaza impamvu ari gutsindwa.

Yavuze ko uwo mwarimu yakomeje kwimwiyegereza undi amubwira ko nta wundi mubano bafitanye uretse kuba umunyeshuri undi akamubera mwarimu.

Byaje kugera ubwo mwarimu atumira uyu mukobwa kumusura iwe mu rugo, undi arabyanga.

Ati “Umunsi umwe mwarimu yansabye kumusura iwe mu rugo anyizeza ko azamfasha nkabasha gutsinda neza amasomo. Nagize impungenge ndabyanga. Kuva ubwo ntabwo yongeye kumvugisha.”

Uyu mukobwa w’imyaka 24 yemeza ko hari abandi banyeshuri b’abakobwa bagenzi be bahura n’ikibazo cye cyangwa bahuye nacyo.

Uyu munyeshuri yakomeje guhanyanaza aza kwimuka, ariko avuga ko bigoye kumenyekanisha ikibazo nk’icyo kuko uhabwa akato muri bagenzi bawe ndetse bikaba bigoye no kubona ibimenyetso bihagije.

Inama yahuje ubuyobozi bw’abanyeshuri n’ubwa Kaminuza y’u Rwanda kuri uyu wa Gatatu, yagaragaje icyo kibazo, ivuga ko gihangayikishije.

The New Times dukesha iyi nkuru yatangaje ko itangazo ryasohowe nyuma y’iyi nama ryagaragaje ko akenshi bamwe mu barimu bakorana n’abanyeshuri mu kubona cyangwa gutanga amanota y’ubuntu hakoreshejwe ruswa.

Umuyobozi wungirije w’abanyeshuri muri Kaminuza y’u Rwanda muri iryo tangazo yagize ati “Bamwe mu barimu basaba abanyeshuri amafaranga cyangwa ruswa y’igitsinda ku banyeshuri b’abakobwa.”

Iyi nama ibaye nyuma y’iminsi mike Urwego rw’Igihugu rw’Ubugenzacyaha rutangaje ko rwataye muri yombi Umuyobozi Ukuriye ishami ryo gutera ikinya, muri Koleji y’ubuvuzi ya Kaminuza y’u Rwanda.

Uwo muyobozi yafashwe akekwaho kwaka abanyeshuri amafaranga abashukisha kuzabaha amanota.

Umuvugizi wa Kaminuza y’u Rwanda, Mike Karangwayavuze ko inama yabaye yiga kuri icyo kibazo igamije gukumira ibibazo nk’ibyo .

Ati “Kaminuza yatumije inama hagamijwe gukumira ko byongera kuba. Kaminuza y’u Rwanda ibifata nk’ibibazo bikomeye kandi twafashe umwanzuro wo kutihanganira ruswa, niyo mpamvu iriya nama yari ingenzi.”

Karangwa yavuze ko atari ubwa mbere ikibazo nk’icyo kivugwa muri Kaminuza, kuko umwaka ushize hari umwarimu wirukanywe ubu akaba afunzwe azira ruswa.

Nubwo bidakunze kuboneka cyane, Karangwa yabwiye IGIHE ko ikibazo cyose cya ruswa muri Kaminuza kibatera impungenge.

Ati "Mu myaka ibiri ishize twabonye ikibazo kimwe gusa n’ikindi kiri mu iperereza ariko kuri Kaminuza y’u Rwanda n’ikibazo kimwe iyo kibonetse kidutera impungenge bigatuma dufata ingamba zo kubikumira".

Ubusanzwe Kaminuza y’u Rwanda ifite abanyeshuri n’abakozi bose hamwe bagera ku bihumbi 32.

Karangwa yavuze ko kuba hamaze kubonekamo ibibazo bibiri bya ruswa bidateye ubwoba cyane ariko badakwiriye kwicara ngo barebere.

Ati "Kugeza uyu munsi ntabwo biraba icyorezo abantu ntabafet ko byacitse kuko mu myaka ibiri ishize ni ibibazo bibiri tubonye . Mu muryango w’abantu ibihumbi 32 ntabwo ari byacitse ariko n’iyo yaba ikibazo kimwe tucyitaho cyane."

Nubwo bivugwa ko abanyeshuri b’abakobwa bakwa ruswa y’igitsina, Karangwa yabwiye IGIHE ko mu bibazo bya ruswa byagaragaye muri iyo Kaminuza mu myaka ibiri ishize, nta cya ruswa y’igitsinda kirimo.

Yasabye abahura n’icyo kibazo kujya bihutira kubimenyesha ubuyobozi bwa Kaminuza kugira ngo bikumirwa hakiri nkare.

Umuntu wese ufatiwe mu cyaha cya ruswa muri Kaminuza y’u Rwanda arirukanwa burundu kandi nyuma agakurikiranwa n’amategeko.

Abanyeshuri bemeza ko ruswa mu mashuri ari mbi cyane kuko igira ingaruka ku ireme ry’uburezi bikarangira abasohotse mu mashuri batabasha guhangana ku isoko ry’umurimo.

Ubuyobozi bwa Kaminuza y’u Rwanda bwatangaje ko bwahagurukiye mu buryo bukomeye, abarimu bavugwaho kwakira ruswa y’amafaranga ndetse no kwaka abanyeshuri ruswa y’igitsina

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza