Kwamamaza

Kaminuza iri mu Rwanda yigisha nka Harvard mu by’ubuzima yakiriye ubuheta

Yanditswe kuya 16-09-2016 saa 07:03' na Philbert Hagengimana


Kaminuza igamije kugeza ubuvuzi kuri bose (University of Global Health Equity/UGHE) yigisha nka Harvard yo muri Leta Zunze Ubumwe za Amerika, yakiriye ubuheta bwayo, abanyeshuri 25 baje basanga abandi 26 bari batangiranye na yo umwaka ushize.

Kaminuza nyinshi zikomeye ku Isi usanga zubatse mu Mijyi ari na yo mpamvu hari aboherezwa gutanga serivisi z’ubuvuzi mu cyaro bikabananira.

Aho ni ho havutse igitekerezo cyo kubaka Kaminuza izajya itanga inzobere mu by’ubuvuzi, zikazajya zigishwa hagendewe ku mibereho y’abaturage bo mu cyaro, dore ko bangana na 75% by’abatuye Isi nk’uko bitangazwa na Dr.Agnes Binagwaho, wahoze ari Ministiri w’Ubuzima mu Rwanda.

Ni muri urwo rwego mu mwaka wa 2015, Umushinga ‘Inshuti mu buzima’ (Partners In Health) watangije Kaminuza Mpuzamahanga, UGHE, izajya itanga impamyabumenyi z’icyiciro cya gatatu (Master of science in global health delivery/MGHD), itangirana n’abanyeshuri 26 baturutse hirya no hino ku Isi.

Mu ntangiriro z’iki cyumweru, iyo Kaminuza yakiriye ubuheta bwayo, bakaba abanyeshuri 25 barimo abanyarwanda 19 n’abanyamahanga batandatu baturutse muri Leta Zunze Ubumwe za Amerika, Australia, Mexique, Nepal n’u Burundi.

Abo banyeshuri barimo abakozi b’umwuga mu byo kuvura amatungo, abaganga, abahanga mu by’imiti ndetse n’abayobozi bashinzwe ubuzima mu turere.

Abo banyeshuri 25 batoranyijwe muri 250 bo mu bihugu 11 bari basabye kwiga muri iyo Kaminuza muri uyu mwaka, uwemererwa kwiga akaba ari ukora ibifite aho bihurira n’ubuzima, bityo bikaba atari ngombwa abaganga cyangwa abakora serivisi zishamikiye ku buvuzi gusa.

Peter Drobac, Umuyobozi wa UGHE yatangaje ko iyo Kaminuza yashyizwe mu Rwanda hagendewe ku ntego z’Umushinga Inshuti mu buzima no ku isura y’iki gihugu mu iterambere ndetse n’icyerekezo.

Ati “UGHE ni Kaminuza yo mu Rwanda ariko si iy’abanyarwanda gusa, ahubwo ni iy’Isi. Gahunda dufite ni uko abanyeshuri bo mu Rwanda n’abaturutse ahandi ku Isi, bazajya baza bagakura ubumenyi hano kandi bakabuhabwa n’abanyarwanda kuko ubu abarimu dufite baturuka muri Kaminuza ya Harvard no mu zindi zikomeye muri Amerika.”

Peter Drobac yakomeje agira ati “Benshi bakunda kutubaza impamvu twashinze Kaminuza mu Rwanda ntituyijyane muri Amerika, muri Afurika y’Epfo cyangwa n’ahandi, ariko impamvu ni ebyiri gusa. U Rwanda ruzwiho gahunda za Leta zimakaza iterambere no guhanga udushya mu nzego zose cyane cyane izigamije guteza imbere ubuzima bw’abaturage. Abantu baturuka hirya no hino muri Afurika n’ahandi ku Isi baza kurwigiraho, bityo natwe nka Kaminuza ya UGHE twasanze tugomba kugira uruhare muri ayo masomo baza kwigira ku Rwanda.”

Akomeza avuga ko indi mpamvu ari ugushyigikira gahunda ya Leta y’u Rwanda y’iterambere rishingiye ku bumenyi n’Ikoranabuhanga.
Iyi Kaminuza itanga ubumenyi bwo ku rwego bwa Kaminuza ya Harvard yo muri Leta Zunze Ubumwe za Amerika, dore ko gahunda y’imyigishirize n’uburyo amasomo atangwa ari bumwe, ndetse abarimu bamwe bakaba ari abo muri iyo kaminuza iri mu za mbere zikomeye ku Isi, bafatanya n’abo mu ishuri rya Tufts i Boston.

Willy Ingabire, Umwarimu muri Kepler, ishuri ritanga ubumenyi mu micungire y’ibigo nderabuzima, akaba umwe mu buheta bwa UGHE yatangarije IGIHE ko aje gukarishya ubushobozi afite mu mwuga we, akaba kandi atewe ishema n’ireme ry’ubumenyi azahakura.

Ati “Nahisemo kuza kwiga hano kuko nasanze hari ibyo mbura mu bumenyi bwanjye kugira ngo mbashe gufasha mu guteza imbere ubuzima bw’abantu. Muri iri shuri ntitwiga nk’uko bisanzwe, ahubwo twigira ku kibuga, tukajya mu cyaro tukareba niba ibyo twiga koko bibaho, twavayo tukicara tukajya impaka zigamije kureba uko ibyo twabonye n’amaso twabikemura.”

Iyi Kaminuza ifite icyicaro cy’agateganyo mu Murenge wa Rwinkwavu mu Karere ka Kayonza ho mu Ntara y’Iburasirazuba, ikaba iteganya ko mu mwaka wa 2018 izimukira i Butaro ho mu Karere ka Burera mu Ntara y’Amajyaruguru.

Dr Agnes Binagwaho imbere y'abanyeshuri ba University of Global Health Equity
Hagati ni Peter Drobac, Umuyobozi wa UGHE

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved