00:00:00 IGIHE NETWORK KN KINYARWANDA EN ENGLISH FR FRANCAIS

Kajugujugu z’Ingabo z’u Rwanda zatangiye gukwirakwiza inkingo za Covid-19 mu ntara z’igihugu

Yanditswe na Prudence Kwizera, Sitio Ndoli
Kuya 28 Gicurasi 2021 saa 12:47
Yasuwe :
0 0

Mu gitondo cyo kuri uyu wa 28 Gicurasi 2021, Kajugujugu z’Ingabo z’u Rwanda (RDF) zatangiye gukwirakwiza icyiciro cya kabiri cy’inkingo za Covid-19 mu ntara zose z’u Rwanda, mu rwego rwo kwitegura ibikorwa by’ikingira biteganyijwe gutangira ku munsi w’ejo tariki ya 29 Gicurasi.

Akarere ka Huye ni kamwe mu twa mbere twakiriye izi nkingo, aho kajugujugu za RDF zahageze ahagana Saa tatu z’igitondo cyo kuri uyu Gatanu. Byitezwe ko izi nkingo zitangira gukwirakwizwa mu bitaro n’ibigo nderabuzima biri muri ako Karere ndetse n’ibiri mu Karere ka Gisagara.

Inkingo kandi zamaze kugezwa mu Karere ka Nyaruguru na Nyamagabe, mu gihe byitezwe ko uturere twa Nyanza, Ruhango, Muhanga na Kamonyi twakira inkingo mu modoka ziturutse mu Mujyi wa Kigali. Akarere ka Nyaruguru kakiriye inkingo 5 500 zazanywe na kajugujugu za RDF.

Inkingo kandi zamaze kugezwa mu Karere ka Rusizi mu Ntara y’Iburengerazuba bw’u Rwanda, aho biteganyijwe ko aka Karere ka Rusizi kari bwakire inkingo 10 000, izingana na 5 000 ziri bujyanwe mu Bitaro bya Gihundwe izindi 5 000 zikaba ziri bujyanwe mu Bitaro bya Mibirizi.

Byitezwe ko Akarere ka Nyamasheke nako gahabwa inkingo ziturutse mu Karere ka Rusizi, ndetse Umuyobozi w’Agateganyo w’Ibitaro bya Bushenge, twavuganye yagiye kwakira izi nkingo, yavuze ko ku munsi w’ejo bazatangira gutanga inkingo 2490 bemerewe.

Yagize ati “Twamaze kwakira inkingo [mu Karere ka Rusizi], ubu ziri kwerekeza ku bitaro bya Bushenge, turatangira kuzikwirakwira ku bigo nderabuzima, ejo turatangira gukingira.”

Ibitaro bya Kibogora nabyo biherereye mu Karere ka Nyamasheke biri bwakire inkingo 3 010 kuri uyu munsi.

Kajugujugu ya RDF yajyanye inkingo za COVID-19 zigenewe Ibitaro bya Ruhengeri mu karere ka Musanze n’ibya Shyira muri Nyabihu, yahageze saa Sita na 40 zo kuri uyu wa 28 Gicurasi 2021.

Ibitaro bya Shyira byakiriye inkingo 5.500, naho ibya Ruhengeri bihabwa izigera ku 10.500.

Amakuru ahari ni uko ibigo nderabuzima birebererwa n’ibyo bitaro nabyo byari byiteguye kuzihabwa, ku buryo biteganyijwe ko zirarara zihagejejwe.

Umuyobozi w’Ibitaro bya Ruhengeri, Dr Muhire Philbert, yijeje abahawe urukingo rwa mbere batarabona urwa kabiri ko n’izindi zirahita zitangwa, abasaba kwitabira iryo kingira.

Ati "Twakiriye inkingo 10.500 z’icyiciro cya kabiri, mbere twari twakiriye 11.711. Ubu turarara tuzigejeje ku bigo nderabuzima no ku ma site yateguwe abaturage bakingiriweho, [ku buryo] iza mbere ejo mu gitondo zizatangira gutangwa."

Umuyobozi w’Akarere ka Musanze, Nuwumuremyi Jeannine, yavuze ko hagiye guhita hatangira uburyo bwo kumenyesha abaturage gahunda yo kuzihabwa zikimara kugezwa aho zizatangirwa

Yagize ati "Tugiye guhita dutangira gahunda yo kumenyesha abaturage uko barahabwa izi nkingo twifashishije radiyo zitandukanye n’uburyo bwo kubabwira hifashishijwe radiyo igendanwa mu modoka. Icyo tubasaba ni ukwitabira bakagana aho baherewe iza mbere ariko tunirinda ko bamwe bajya bahahurira ari benshi ahandi ugasanga babuze."

Inkingo zabyutse zikwirakwizwa mu bice bitandukanye by’igihugu n’izo u Rwanda rwahawe muri gahunda ya Covax igamije kugoboka ibihugu bikennye n’iz’inkunga rwatewe n’u Bufaransa, zisaga 247.000.

Byitezwe ko inkingo zose zirara zigejejwe ku bigo nderabuzima zizatangirwaho kuri uyu wa 28 Gicurasi 2021, ku wa 29 Gicurasi zigatangira gutangwa.

Abarazihabwa biganjemo abahawe dose ya mbere ya AstraZeneca bari bategereje iya kabiri.

Abagera ku 350.400 ni bo bamaze guhabwa urukingo rwa COVID-19 mu Rwanda, barimo abamaze guhabwa dose ebyiri za Pfizer.

Indege imaze kugeza izo nkingo ku bitaro byavuzwe haruguru yakomereje ku Bitaro bya Butaro muri Burera.

Ubwo inkingo zari zimaze kugezwa mu Karere ka Nyaruguru mu Ntara y'Amajyepfo y'u Rwanda
Inkingo za Covid-19 zatangiye gukwirakwizwa mu turere twose tw'u Rwanda
Inkingo zakwirakwijwe n'indege ya RDF
Inkingo zahitaga zijyanwa ku bigo nderabuzima bizazitanga
Indege yahageraga bayiteguye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .