Kwamamaza

“Jenoside yakorewe abatutsi ni ugutsindwa gukomeye kwa Loni”

Yanditswe kuya 31-10-2016 saa 15:53' na Rabbi Malo Umucunguzi


Umunyamabanga Mukuru Wungirije w’Umuryango w’Abibumbye, Jan Eliasson, yavuze ko Jenoside yakorewe Abatutsi mu 1994 ari ugutsindwa kwa Loni, asaba ibihugu kuhakura isomo ryo kujya bigira igikorwa mu gihe hakigaragara ibimenyetso ko amahano yaba agiye kuba.

Kuri uyu wa Mbere, Eliasson yari ku rwibutso rwa Jenoside rwa Kigali ku Gisozi, uruzinduko rwa nyuma agiriye mu kindi gihugu, mbere yo gusoza ubutumwa bwe mu Muryango w’Abibumbye, agasubira mu gihugu cye cy’amavuko, Suède

Yasobanuriwe amateka ya Jenoside yakorewe Abatutsi kuva igitutumba, iminsi yayo ya mbere ndetse n’urugendo rwayikurikiye, agera ku cyiciro kigaragaza uko mu Rwanda hoherejwe intumwa z’Umuryango w’abibumbye ariko ntizibashe guhagarika Jenoside.

Ati “Uku ni ugutsindwa gukomeye k’umuryango w’abibumbye, ni ugutsindwa gukomeye.’’

Jan Eliasson yabwiye itangazamakuru ko igihe kigeze ngo Umuryango Mpuzamahanga utangire kujya ugira icyo ukora mbere y’uko ibibazo bikenera imbaraga zidasanzwe ngo bikemuke.

Avuga ku bu bantu bagihakana Jenoside yakorewe abatutsi, Eliasson yagize ati “Nabatumira bakaza aha hantu, cyangwa bakajya no ku zindi nzibutso bakareba. Nageze mu bihugu byinshi, nabonye ingaruka za Jenoside yakorewe Abayahudi, ibi biriyongera ku bitekerezo nsanganwe ko tugomba gukora ibishoboka ngo bitazongera ukundi.’’

Yakomeje agira ati “Ndifuza no gukoresha uyu mwanya ngo nshimire Abanyarwanda, bishyize hamwe nyuma y’ibi. Imitekerereze ya muntu rimwe na rimwe iba ku guhora nyuma yo gusanga abana, papa cyangwa mama bishwe,’’

Yashimye uruhare rw’ubutabera mpuzamahanga n’ubwo uyu munsi Urukiko Mpuzamahanga Mpanabyaha ruri kunengwa, ariko ngo ibihugu bifite inshingano ko nta wakoze amabi ugomba gusigara atabiryojwe.

Ati “Ndagaruka ku buyobozi bw’iki gihugu n’abaturage bafashe icyemezo ko ahazaza hakeneye guhindurwa. Ahazaza hagenwa n’abaturage banyu, hafi kimwe cya kabiri cy’abaturage bavutse nyuma ya Jenoside, ni ahazaza habo. Bagomba kumenya ibi byose byabaye mbere y’uko bavuka, bakiyongera imbaraga zo kubaka u Rwanda rukomeye.’’

Yavuze ko yabonye u Rwanda rushya ruri kubakwa agasanga ari icyitegererezo cyo gukura amasomo ku bibazo, no kwemera ko igihugu cyongera kubakwa binyuze mu kunga ubumwe.

Ati “Hari ibibazo mu Burasirazuba bwo hagati, hari ibiri muri Afurika, dukeneye ubu butumwa ko nta hazaza haba mu guca abaturage mo ibice no kurema inzangano hagati y’imiryango, nk’uko biri kuba mu bice bitandukanye ku Isi. Tugomba kubakira ku bumwe, tukagaragaza intego dusangiye kandi tugashingira ku byo duhuje.’’

Jan Eliasson yabwiye itangazamakuru ko mu mpera z’uyu mwaka agomba kurangiza manda ye mu Muryango w’Abibumbye, gusoza manda asura u Rwanda bikaba bifite igisobanuro gikomeye kuri we.

Biteganyijwe ko uyu Munyamabanga Mukuru Wungirije w’Umuryango w’Abibumbye akomereza urugendo rwa i Bangui muri Repubulika ya Centrafique, aho azamara amasaha 48, mu ruzinduko rugamije gushimangira ubufasha bw’umuryango mpuzamahanga mu kugarura amahoro muri icyo gihugu, cyugarijwe n’ubugizi bwa nabi kuva mu 2013.

Umunyamabanga Mukuru Wungirije w’Umuryango w’Abibumbye, Jan Eliasson yunamiye abazize Jenoside bashyinguye ku rwibutso rwa Kigali
Umunyamabanga Mukuru Wungirije w’Umuryango w’Abibumbye, Jan Eliasson yavuze ko Jenoside yakorewe Abatutsi ari ikimenyetso cyo gutsindwa kwawo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved