Izamurwa ry’imisoro ku modoka zishaje ntirizibuza kwiyongera muri EAC

Yanditswe na Uwishyaka Jean Louis
Kuya 26 Nzeri 2016 saa 08:29
Yasuwe : XX
0

Imodoka zishaje zikomeje kwiyongera cyane muri Kenya no mu Rwanda n’ubwo ibihugu bigize Umuryango wa Afurika y’u Burasirazuba (EAC) byafashe umwanzuro wo kongera imisoro ku bikoresho byakoze byinjira muri aka karere.

The East African dukesha iyi nkuru, itangaza ko imodoka zakoze zinjiye mu Rwanda mu mezi umunani ya mbere y’umwaka wa 2016 ziyongereyeho 1,200 ugereranyije n’izinjiye muri ayo mezi mu mwaka wa 2015.

Icyo kinyamakuru gikomeza kivuga ko ubwo Kenya yatangiraga kuzamura imisoro mu Ukuboza 2015, umubare w’imodoka zahise zigabanuka, ariko nyuma gato zongera kwiyongera kugeza ubwo muri Mata 2016 hinjiye imodoka 13,693 zivuye ku 10,280 zinjiye muri Werurwe.

Ubwiyongere bw’izo modoka buteye impungenge z’uko ifaranga ry’u Rwanda n’Ishilingi rya Kenya bishobora kurushaho gutakaza agaciro, cyane ko ‘Yen’ (Ifaranga ry’u Buyapani) rirusha ingufu idorali rya Amerika ku isoko ry’ifaranga ku Isi.

N’ubwo imodoka zakoze zinjijwe mu Karere mu mezi umunani ya mbere y’umwaka wa 2016 zitazwi, abazicuruza bavuga ko 70% yazo ari izituruka mu Buyapani.

Komiseri ushinzwe za gasutamo mu kigo cy’imisoro n’amahoro mu Rwanda, RRA, Tugirumuremyi Raphael, yatangaje ko “umubare w’imodoka zinjira mu gihugu ugenda uzamuka bijyanye n’uburyo ibyo abaturage binjiza nk’umusaruro bigenda bizamuka.”

Inama y’Abaminisitiri bo muri aka karere yateranye muri Mata 2015 ni yo yashyizeho umurongo wo gusoresha ibinyabiziga byakoze byinjizwa mu Muryango w’Ibihugu bya Afurika y’u Burasirazuba (EAC).

Nyuma y’icyo cyemezo cy’Inama y’Abaminisitiri, izo modoka zaje gushyirirwaho ibipimo by’ubusaze bizagenderwaho mu gusoreshwa, aho imodoka nshya zisoreshwa 20% na 80% ku modoka zishaje kuva ku myaka 10 no gusubiza hejuru.

Iki cyemezo cyari cyitezweho kugabanya umubare w’imodoka zishaje zinjizwa mu bihugu, ariko uko bigaragazwa ngo ntibyaciye intege abazigura kuko n’ubu ngo bakizitumiza ku bwinshi.

Imodoka zakoreshejwe zikomeje kugenda ziyongera mu bihugu bigize EAC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza