Ivumburamatsiko kuri Kate Bashabe: Uko yaretse ibyo kuba Miss, urukundo, inkomoko y’ubutunzi bwe (Video)

Yanditswe na Muvunyi Arsène
Kuya 25 Kamena 2019 saa 04:50
Yasuwe :
0 0

Mu 2011 nibwo Kate Bashabe wari urangije amashuri yisumbuye yatangiye kugaragara mu maso ya benshi.

Icyo gihe yari yitabiriye irushanwa rya Miss MTN abasha kuryegukana. Bidatinze, yitabiriye irushanwa rya Miss Nyarugenge nabwo arabahiga abona itike yo kwitabira irushanwa rya Nyampinga w’u Rwanda mu 2012 ariko ku munota wa nyuma ntibyamukundira.

Ni umwe kandi mu bari mu mushinga wa filime ya Ramsey Noah yagombaga gukorana n’abanyarwanda nubwo utarangiye.

Iby’amarushanwa y’ubwiza yabishyize ku ruhande yinjira iy’ubucurizi bw’imyenda bwaje kwaguka mu buryo bugari, bukanamufasha kugaba amashami mu buhinzi no mu bushabitsi bw’imitungo itimukanwa, abarira muri miliyoni amagana.

Kate Bashabe amaze igihe kinini ari umunyamideli

Afite impano yo kuririmba nubwo atifuje ko imenywa na benshi, akagira n’umutima ukunda agaragariza mu bikorwa bitandukanye agenda akorera abatishoboye.

IGIHE yaramuganirije ahishura byinshi, abantu batari bazi ku buzima bwe bwite n’urugendo rwe mu bucuruzi.

IGIHE: Kate Bashabe ni muntu ki?

Kate: Kate ni umukobwa usanzwe, ukunda abantu, ugira umutima mwiza, uhora yisekera.

IGIHE: Wakuze ufite izihe nzozi?

Kate: Navuga ko uyu munsi ndi gusa n’uri kwegera inzozi zanjye, kuko nakuze ndeba ibyo Mama akora, nawe yari umucuruzi kuva kera, nakuze mureba ashakisha hirya no hino nkavuga nti ‘nanjye ninkura ndashaka kuzikorera nkaba umucuruzikazi’. Uyu munsi rero navuga ko Imana iri kugenda ibigezaho.

IGIHE: Mu buzima busanzwe ukunda iki?

Kate: Mu buzima busanzwe nkunda kumva umuziki igihe cyose mu modoka yanjye, mu rugo mba ndi kumva umuziki, nkunda kureba filime, nkunda no gusabana n’inshuti zanjye.

IGIHE: Ubu ni iyihe filime uri kureba muri iyi minsi?

Kate: Nkunda kureba filime z’uruhererekane, “Game Of Thrones” abantu bose niyo bari kureba.

IGIHE: Ubwo indirimbo zo ni izihe?

Kate: Buriya umuhanzi nkunda kumva indirimbo ze ni Andy Bumuntu. Ni ukuri akora utururimbo twiza iyo naniwe akenshi nitwo niyumvira.

IGIHE: Uryoherwa no kwambara imyenda imeze ite?

Kate: Ntakubeshye, njye iyo ntafite umunsi mukuru cyangwa ibirori biri kunsaba kwambara neza, niyambarira bisanzwe pe! Mba niyambariye amapantalo n’udupira, imyenda ya siporo kuko akenshi n’iyo ndi mu kazi mba ndi kugenda.

IGIHE: Kwambara neza ubwo ni ukuhe?

Kate: Aho numva meze neza ni aho mba nashyizemo inkweto ndende. Ubundi hejuru nkambara haba ikanzu, Blazer [ikoti], biterwa n’aho ngiye.

IGIHE: Ukunda kwisiga ibirungu mu maso?

Kate: Oya! Ntabwo ari ibintu byanjye n’ubu aka Rouge à Lèvres na tilo ni uko nari nzi ko nje kuri Camera. Ariko mu busanzwe ndibyukira nkasiga akantu ku munwa rimwe na rimwe n’aga-poudre, ni ibyo.

IGIHE: Kuki ukunze kugaragara mu bikorwa byo gufasha?

Kate: Ni nk’umuco mfite natojwe n’umubyeyi wanjye, narezwe na Mama gusa papa ntabwo nagize amahirwe yo kubana nawe cyane. Njye nakuze mbona afasha abantu.

Twari tuzi ko buri kwezi cyangwa igihembwe uvuye ku ishuri uzana imyenda akavuga ati ‘iyi turayifashisha abantu, urasigarana iyi’. Ni ibintu nakuze mama adukoresha tujyana nawe mbikurana nk’umuco. Ni ibintu bimbamo mba numva ari inshingano zanjye.

IGIHE: Tubwire ku rugendo rwawe mu marushanwa y’ubwiza.

Kate: Habaye amarushanwa y’ibya Miss MTN niba nibuka neza ni mu 2011, byari ibintu byiza, nari nkiri umwana, twari benshi ntabwo niyumvishaga ukuntu nshobora gutsinda abantu benshi.

Hakurikiyeho irya Miss Nyarugenge byo byari no kujya muri Miss Rwanda. Umubyeyi wanjye yagize ibyago ngomba kujya guhatana muri Miss Rwanda, mpita mvuga nti wenda ntabwo ari ibyanjye. Kuva ubwo mpita mfata indi nzira y’ubucuruzi iby’ubwiza mbishyira ku ruhande.

IGIHE: Dusobanurire neza icyatumye utitabira Miss Rwanda 2012?

Kate: Icyo gihe baratoraga muri Nyarugenge, bagatora mu ntara zose nk’ibindi hanyuma abatsinze bakajya mu cyiciro cya nyuma.

Ndabyibuka icyo gihe kuko nari natsinze mpagarariye Nyarugenge twagombaga gukora andi marushanwa abanziriza umunsi wa nyuma ntibyanshobokera kuko iryo joro nahise mfata indege njya muri Kenya kureba papa wanjye yari yarakoze impanuka.

IGIHE: Mbere yo kwitabira amarushanwa wari usanzwe uri umunyamideli?

Kate: Nkiri no mu mashuri yisumbuye namurikaga imideli. Dady De Maximo mpora nshimira niwe wabinyinjijemo anyigisha no kugenda kuko nari meze nk’umuhungu, ntazi kwambara inkweto, ntazi kuzigenderamo. Ni nawe wanteye imbaraga zo kujya mu marushanwa.

IGIHE: Nyuma yo kureka amarushanwa y’ubwiza ukinjira mu bucuruzi, urugendo rwawe rwari rumeze gute?

Kate: Urugendo ntabwo rwari rwoshye na gato, nahuye n’inzitizi nyinshi. 2012 irangira, 2013 nibwo nafunguye iduka ndavuga nti ‘nzajya nishyura ubukode ncuruze. Rero ntabwo ari urugendo rwari rworoshye nagiye nkura ku buryo aho ngeze uyu munsi mfite ubunararibonye mu bucuruzi wenda butari ku rwego rwo hejuru ariko nshobora gucunga ubucuruzi.

Hari abantu benshi bagiye bafunga, twafunguriye icya rimwe amaduka, abafunguye nyuma yanjye kandi ari bakuru kundusha nabona ukuntu byabananiye ariko njye nkakomeza nkarwana. Uyu munsi ahubwo biri kugenda bitera imbere, navuga ko ari urugendo rwarimo ingorane ariko rwambereye rwiza.

Ni umwe mu bakobwa bamaze kugera kuri byinshi. Iyi ni imyenda yambara akumva araberewe

IGIHE: Ni ibiki wagiye wibandaho kugira ngo ugere aho uri?

Kate: Natangiye nibanda cyane ku bintu by’abagore nyuma nongeraho iby’abagabo. Mbere nagurishaga ibihendutse ariko nshyiramo n’ibihenze byo hejuru, ubu natangiye kwikorera imyenda yanjye, ni urugendo rushimishije.

IGIHE: Uri umwe mu bakobwa bakiri bato mu Rwanda biteje imbere mu buryo bugaragara. Ni irihe banga wakoresheje?

Kate: Nta rindi banga ni ugukora cyane, ugakomeza ugira ibitekerezo bishya, ntiwumve ibyo abantu bakubwira kuko baca intege. Nari mfite intego nzi icyo nshaka kugeraho, ntabwo nigeze mpa abantu umwanya wo kunca intege kandi n’ubu ndacyarwana.

IGIHE: Wigeze uhomba?

Kate: Nkitangira hari ubwo namaraga nk’ukwezi ncurujemo nka gatatu. Kandi urumva kwishyura ubukode biba bigoye, hari n’andi mezi wasanga nakoreye ayo kwishyura ubukode gusa.

IGIHE: Ubu ugeze ku ruhe rwego ugereranyije n’inzozi zawe?

Kate: Inzozi zanjye ni ukugira imideli yanjye kandi narabitangiye. Nahereye ku mapantalo kandi numva biranshimishije kuko byaturutse ku bantu barebare n’abantu banini.

Njye kubona ipantalo inkwira y’ikoboyi byabaga ari ikibazo n’abantu barebare bareshya nka njye bakajya bambwira bati ‘Kate wagiye udushakira ko tutabona ibidukwira’. Ndavuga nti ‘ese uwakoresha imideli yanjye y’amapantalo’ nkajya ku ruganda nkavuga nti ‘ndashaka amapantalo ameze gutya’ ndabikora.

IGIHE: Hari ibindi bikwinjiriza amafaranga bitari imideli?

Kate: Abantu benshi bazi ko nkora ubucuruzi bw’imyenda kuko ari byo nerekana ku mbuga nkoranyambaga ariko hari abantu natangiye gukorana nabo mu buhinzi n’ubworozi, ibijyanye n’imitungo itimukanwa, gushora mu bibanza n’inzu tukagurisha.

IGIHE: Uhinga iki?

Kate: Biterwa n’isoko twabonye. Mfite imirima hari igihe riba isoko ry’imiteja cyangwa iry’izindi mboga iyo isoko ribonetse turahinga tukagurisha.

IGIHE: Kumva ko uri umuhinzi biratangaje!

Kate: Abantu ntabwo baba babyumva nyine, nko ku mbuga nkoranyambaga bakunda kureba utuntu twiza, niyo mpamvu umuntu abereka nk’iduka, nkabereka nambaye neza nifotoje, hari ibintu byinshi abantu baba batazi.

IGIHE: Ubuhinzi bufatwa nk’ubw’abantu baciriritse umukobwa mwiza nkawe wabugiyemo ute?

Kate: Kuba mwiza cyangwa kuba umukobwa ntabwo bivuze ko hari ibintu utakora cyane cyane iyo uzi icyo ushaka. Iyo ushaka amafaranga ushakirikiriza ahantu hose kandi buriya umuntu utekereza neza ku bucuruzi wiga isoko, ukamenya ahantu amafaranga ari kuboneka, niba ari mu butaka ujya mu butaka ntabwo wakwicara mu myenda ngo kuko abantu bakuzi mu myenda.

Ugomba gukora ubushakashatsi ukamenya ni ibihe bintu nshobora gushoramo amafaranga yanjye bikanyungukira.

IGIHE: Wagiye uvugwa cyane mu nkuru zigaragaza isura yawe nabi, ubona byaratewe n’iki?

Kate: Abamvuga ibintu bibi bigomba kubaho, ahubwo umenya bamvuga bike. Ntabwo ukundwa na bose hari n’abantu bavuga ngo uyu mwana utwara imodoko, ufite iduka, cyane cyane iyo uri umukobwa batekereza ibindi bintu.

Ntabwo ushobora kubabuza ni uburenganzira bwabo bagomba kuvuga, bavuga ibintu bibi hakaba n’abandi babona ukuri bavuga bati ‘uyu mwana amaze imyaka itandatu tumureba akora, ibyo ari byose ni umwana uzi gushaka amafaranga.

Akunze gukora ingendo mu ndege mu bikorwa bye by'ubucuruzi

IGIHE: Nta ngaruka bijya bikugiraho?

Kate: Ntabwo binca intege na gato ahubwo bituma nshaka gukora cyane noneho kugira ngo ntazasubira inyuma wa muntu akazavuga ati ‘byamunaniye’.

IGIHE: Uri umwe mu bakobwa bakurikiranwa n’abagabo b’ibyamamare muri Afurika. Waba uzi impamvu?

Kate: Ntabwo mbizi, byatewe n’uko bansanze kuri Instagram bakankurikirana. Abenshi usanga tuba tutanaziranye ni kwa kundi umuntu areba ifoto yawe akayikunda agashyiraho ‘like’. Ntabwo namenya ikibitera wenda amafoto yanjye aba ari meza bayakunze. Harimo n’abo tuba tuziranye.

IGIHE: Izina Slay Queen rikunze kwitwa abakobwa bazwi cyane ku mbuga nkoranyambaga urivugaho iki?
Kate: Ukuntu babivuga sinzi igisobanuro babihaye. Urishyize mu cyongereza queen ni umwamikazi, slay ni imvugo yaje yo kuba wambaye neza, ukuntu babihuje bakabiha indi sura ntabwo nshobora kumenya icyo bisobanuye. Biterwa n’ukuntu umuntu yabifashe.

IGIHE: Umuntu abikwise wababara?

Kate: Nta n’ubwo mbizi, nta n’ubwo nabyitaho, ubuse wabinyita gute? Gusa icyo nabonye ni uko babihaye isura mbi ngo aba slay queen ni abantu badafite icyo bakora, birirwa berekana ibintu bihenze, ntabwo nzi impamvu babihaye icyo gisobanuro, rero kubera icyo gisobanuro babihaye ubinyise ntabwo byanshimisha.

IGIHE: Kuki utajya ugaragaza umusore mukundana?

Kate: Ni ibintu byihariye cyane kuko ntabwo ndi wa muntu ukunda, ngo uyu munsi nerekanye uyu… urabona kugira ngo uzamuke, uvugwe ni uko uba wakundanye n’uyu, mwashwanye, hari n’ababikora kugira ngo bamenyekane. Njye ntabwo meze gutyo.

Ikindi ndinda cyane ni umukunzi wanjye. Umuntu dukundana igihe nzamwerekanira, ni igihe nzaba nizeye ko ari we, hari ubukwe se, hari impeta se, nkamwereka abantu mvuga nti ‘noneho ndakomeje, nditeguye’. Nk’umuryango wanjye wo uba ubizi.

IGIHE: Ubu arahari?

Kate: Ubu arahari. Mu bigaragara ntabwo ndi mubi cyane wo kuba nta mukunzi mfite kuri iyi myaka.
IGIHE: Ni ibiki wumva bikwiye kuranga umugore mwiza?

Kate: Umugore ni umukozi, ni uwubaha umuryango we akawubahisha, ni uharanira ko abana be cyangwa se umugabo we batera imbere.

IGIHE: Ni iyihe nama wagira umwana w’umukobwa ushaka kugera nk’aho wageze.

Kate: Ntabwo wamera nka Kate, kuko Kate ubona ushobora gusanga afite ibindi bintu inyuma umenye utakwifuza kumera nkawe.

Ahubwo ba wowe uharanire kuba wowe urusha Kate cyangwa se ibyiza ubona kuri Kate uharanira kubigeraho noneho ukabigeraho kandi ukabigeraho binarenze.

Kugira ngo ugere kuri ibyo byose ni uko ukura amaboko mu mufuka ukareka ubunebwe.

Abana benshi ni abanebwe ntabwo bakunda gukora. Igihe cyose umuntu aguha amafaranga yaba umubyeyi wawe, yaba umukunzi wawe, wowe udashobora kuvuga uti uku kwezi byibuze ninjiza ibihumbi 50 Frw byanjye navunikiye n’iyo uriya ari kumpa ibihumbi 100 Frw ariko mfite ibihumbi byanjye 50 Frw. Igihe azaba adahari azamfasha.

Kugira inzozi mu mutwe wawe hatarimo guharanira kugira ikintu cyawe winjiza, uri umunebwe, udakunda gusoma ngo ukore ubushakashatsi biragoye.

Kate Bashabe avuga ko ibyo yagezeho abikesha kudacika intege

Reba amashusho y’indirimbo You & I ya Kate Bashabe aherutse guhuriramo n’abandi bahanzi batandukanye


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza